Nabeela Syed scripts history তেওঁৰ বয়স মাত্ৰ ২৩ বছৰ। ইমান কম বয়সতে ভাৰতীয় বংশোদ্ভূত নাবিলা চৈয়দে চমক সৃষ্টি কৰিছে। এই যুৱতীগৰাকীয়ে আমেৰিকা যুক্তৰাষ্ট্ৰৰ মধ্যৱৰ্তী নিৰ্বাচনত তেওঁৰ ৰিপাব্লিকান প্ৰতিদ্বন্দীক পৰাস্ত কৰি ইতিহাস গঢ়িছে। তেওঁ ইলিনয় প্ৰদেশৰ আটাইতকৈ কনিষ্ঠতম জনপ্ৰতিনিধি হিচাপে নিৰ্বাচিত হৈছে।
নাবিলা নিৰ্বাচিত হোৱা আসনখন দীৰ্ঘদিন ধৰি ৰিপাব্লিকানসকলৰ হাতত আছিল। নাবিলাই অহা জানুৱাৰীত আটাইতকৈ কনিষ্ঠতম জনপ্ৰতিনিধি হিচাপে শপত গ্ৰহণ কৰিব।
ভাৰতীয় বংশোদ্ভূত নাবিলাক জো বিডেনৰ দলৰ হৈ প্ৰতিদ্বন্দিতা কৰিবলৈ টিকট দিয়া হৈছিল। তেওঁ ৫২.৩ শতাংশ ভোট লাভ কৰি ইতিহাস সৃষ্টি কৰিছে। এই মুছলমান ছোৱালীজনীয়ে দীৰ্ঘদিন ধৰি ৰিপাব্লিকানসকলৰ হাতত থকা আসনখন আজুৰি আনিছে। স্বাভাৱিকতে ইতিহাস ৰচনা কৰি উৎসাহিত নাবিলা।
নাবিলাই টুইট কৰি লিখিছে, “মোৰ নাম নাবিলা চৈয়দ। এগৰাকী ২৩ বছৰীয়া ভাৰতীয়-আমেৰিকান মুছলমান মহিলা। আমি ৰিপাব্লিকানসকলৰ হাতত থকা এখন আসন জিকিছো। অহা জানুৱাৰীত ইলিনয় প্ৰদেশৰ আটাইতকৈ কনিষ্ঠ সদস্য হিচাপে শপত গ্ৰহণ কৰিবলৈ আগবাঢ়িছো।‘’ তেওঁ ৰিপাব্লিকান প্ৰাৰ্থী ক্ৰিছ বছক পৰাজিত কৰিছে।
কেৱল বয়সতে নহয়, প্ৰথম দক্ষিণ এছিয়াৰ ব্যক্তি হিচাপেও এই প্ৰদেশৰ আইনসভালৈ নিৰ্বাচিত হৈছে নাবিলা। নিৰ্বাচনত জয়ী হোৱাৰ পিছত তেওঁ ইনষ্টাগ্ৰামত এটা দীঘলীয়া পোষ্টত তেওঁৰ সহকৰ্মীসকলক ধন্যবাদ জনাইছে।
নাবিলাই কৈছে, “নিৰ্বাচনত থিয় হোৱাৰ পিছত মই প্ৰতিজন ভোটাৰৰ ঘৰলৈ যোৱাৰ সিদ্ধান্ত লৈছিলো। একেদৰে, মই সকলোৰে ঘৰলৈ গৈ প্ৰচাৰ কৰিছিলো। কাইলৈৰ পৰা মই একেধৰণে সকলোৰে ঘৰলৈ যাম, মোক ভোট দিয়াৰ বাবে সকলোকে ধন্যবাদ জনাইছো। মই মানুহৰ বাবে কাম কৰিবলৈ সাজু।”
নাবিলাই ৰাজনীতি বিজ্ঞান অধ্যয়ন কৰিছিল। ইয়াৰ উপৰিও তেওঁ বিভিন্ন সমাজ কল্যাণমূলক কামৰ সৈতেও জড়িত। তেওঁ বিশেষকৈ মুছলমান যুৱতীসকলক সমাজৰ নেতৃত্ব দিবলৈ প্ৰস্তুত কৰিব বিচাৰে।
My name is Nabeela Syed. I’m a 23-year old Muslim, Indian-American woman. We just flipped a Republican-held suburban district.
And in January, I’ll be the youngest member of the Illinois General Assembly.
— Nabeela Syed (@NabeelaforIL) November 9, 2022
দৰাচলতে, আমেৰিকা যুক্তৰাষ্ট্ৰৰ মধ্যৱৰ্তী নিৰ্বাচনত ডেম’ক্ৰেট আৰু ৰিপাব্লিকানসকলৰ মাজত তীব্ৰ যুঁজ হৈছে। উচ্চ সদনত ৪৮ খন আসন লাভ কৰাৰ পিছতো নিম্ন সদনত ডেম’ক্ৰেটসকল যথেষ্ট চাপত আছে। এনে পৰিস্থিতিত বিডেনৰ দলটো প্ৰাদেশিক আইনসভাসমূহত নাবিলাৰ দৰে প্ৰাৰ্থীৰ বিজয়ক লৈ যথেষ্ট আশাবাদী।
