দেশৰ ৰাজধানী চহৰ দিল্লীতে নিৰাপত্তাহীন হৈ পৰিছে সাধাৰণ জনতা। শুকুৰবাৰে পূব দিল্লীৰ কল্যাণপুৰী অঞ্চলত সংঘটিত হোৱা এক ডকাইতি কাণ্ডই পুনৰবাৰ দিল্লীৰ নিৰাপত্তা ব্যৱস্থাৰ ওপৰত প্ৰশ্ন উত্থাপিত কৰিছে।
প্ৰকাশিত খবৰ অনুসৰি শুকুৰবাৰে সন্ধিয়া প্ৰায় ৬.৩০ বজাত কল্যাণপুৰী অঞ্চলত এখন চলন্ত বাছতে গ্ৰাহকক লুটি নিয়ে তিনি ডকাইতে।
ঘটনা সন্দৰ্ভত আৰক্ষীয়ে জানিবলৈ দিয়া মতে বাছখন ২১ ব্লক কল্যাণপুৰীৰ ওচৰত উপস্থিত হোৱাৰ সময়ত হাতত ছুৰীসহ তিনিগৰাকী ব্যক্তি বাছখনত উঠে।
তাৰ পিছতে তিনিও দুৰ্বৃত্তই বাছত থকা যাত্ৰীসকলক ভাবুকি দি-ভীতিগ্ৰস্ত কৰি কেইবাগৰাকীও যাত্ৰীৰ পৰা মোবাইল ফোন, পাৰ্চ, বেগ আদি লুটি নিয়ে।
ডকাইতিৰ পিছত তেওঁলোকে সেই বাছখনৰ পৰা নামি আন এখন বাছত উঠি পলায়ন কৰে। ইফালে প্ৰায় ৭ বজাত ডকাইতি কাণ্ডৰ বিষয়ে অৱগত হয় স্থানীয় আৰক্ষী।
লগে লগে আৰক্ষীয়ে কাৰিকৰী কৌশলৰ সহায়ত লাল বাহাদুৰ শাস্ত্ৰী চিকিৎসালয়ৰ কাষত দুৰ্বৃত্ত কেইগৰাকীয়ে পলায়ন কৰা বাছখনৰ অৱস্থান ধৰা পেলায় আৰু তিনিওকে গ্ৰেপ্তাৰ কৰে।
ধৃত তিনি দুৰ্বৃত্তক ২৮ বৰ্ষীয় প্ৰদীপ, ২৩ বৰ্ষীয় সুগম আৰু ২৩ বৰ্ষীয় অভিষেক বুলি চিনাক্ত কৰা হৈছে।
তিনিও দুৰ্বৃত্তৰ পৰা তিনিখন ছুৰী জব্দ কৰাৰ লগতে মোবাইল ফোন, নগদ ধন, পাৰ্চ আৰু অন্যান্য লুণ্ঠন কৰা সামগ্ৰী উদ্ধাৰ কৰা হৈছে বুলি এগৰাকী আৰক্ষী বিষয়াই জানিবলৈ দিয়ে।
পূৰ্বেও ধৃত প্ৰদীপ ডকাইতি, চুৰি আৰু অস্ত্ৰ আইনৰ ১৬ টা গোচৰত আৰু সুগম ডকাইতি, চুৰি আৰু অস্ত্ৰ আইনৰ ৪ টা গোচৰত জড়িত থকাৰ বিপৰীতে অভিষেক ৬ টা গোচৰত জড়িত থকাৰ অভিযোগ আছে বুলি বিষয়াগৰাকীয়ে লগতে কয়।
