বৰ্তমান পৃথিৱীৰ অন্যতম ধনী ব্যক্তি তেওঁ। হঠাতে কি কোনো উদাসীনতাই আহি তেওঁক গ্ৰাস কৰিছে নেকি? নে বিবাহ বিচ্ছেদৰ পিছত মনত জাগি উঠা কোনো নিস্পৃহতা বা অনাসক্তিয়ে ইয়াৰ কাৰণ? সেয়া যদি নহয়, তেন্তে তেওঁ কিয় ইমান টকা বিলাই দিয়াৰ সিদ্ধান্ত ল’লে? শুনিবলৈ আচৰিত লাগিলেও কিন্তু ঘটনা এয়া প্ৰায় সেইটোৱেই।
এমাজনৰ প্ৰতিষ্ঠাপক জেফ বেজোছে আমেৰিকা যুক্তৰাষ্ট্ৰৰ এক সংবাদ মাধ্যমক দিয়া সাক্ষাৎকাৰত কৈছে যে তেওঁ তেওঁৰ জীৱনকালত তেওঁৰ ১২৪ বিলিয়ন ডলাৰৰ (ভাৰতীয় মুদ্ৰাত ১০,০০০ কোটি টকাৰ অধিক) বৃহৎ সম্পত্তিৰ বেছিভাগ বিভিন্ন সংগঠনক দান কৰিব। এই অনুদানবোৰৰ বেছিভাগেই জলবায়ু পৰিৱৰ্তনৰ বিৰুদ্ধে যুঁজত যাব। বৰ্তমান ইজিপ্তত এখন জলবায়ু সন্মিলন চলি আছে। এই আন্তৰ্জাতিক সন্মিলন প্ৰায় ১১ দিন ধৰি চলি আছে। সেই সময়তে জেফৰ ঘোষণাটো নিঃসন্দেহে অতি গুৰুত্বপূৰ্ণ।
উল্লেখ্য যে বেজোছৰ প্ৰাক্তন পত্নী মেকেঞ্জি স্কটে ২০২০ চনত দাতব্য প্ৰতিষ্ঠানসমূহক ৫৮ লাখ ডলাৰৰো অধিক দান কৰিছিল। সেই বছৰতে তেওঁক বিশ্বৰ সৰ্ববৃহৎ দাতা হিচাপে মনোনীত কৰা হয়। ২০২১ চনত তেওঁ আৰু ২৭ লাখ ডলাৰ দান কৰিছিল। জেফ বেজোছে স্কটৰ সৈতে বিবাহ বিচ্ছেদত যথেষ্ট সম্পত্তি হেৰুৱাইছে। তেওঁলোকৰ বিয়াখন সৰ্বকালৰ আটাইতকৈ ব্যয়বহুল আছিল। জনা মতে এই বিবাহ বিচ্ছেদৰ আগতে জেফ বেজোছৰ মুঠ সম্পত্তি আছিল প্ৰায় ১৬ হাজাৰ কোটি মাৰ্কিন ডলাৰ। বিচ্ছেদৰ পিছত ই প্ৰায় ১২ হাজাৰ কোটি মাৰ্কিন ডলাৰলৈ হ্ৰাস পাইছিল!
পৃথিৱীৰ প্ৰাক্তন সৰ্বোচ্চ ধনী ব্যক্তিজনক সোধা হৈছিল যে তেওঁ তেওঁৰ সম্পত্তি দান কৰিব বিচাৰে নেকি? বেজোছে কৈছিল যে হয়, কিন্তু টকাবোৰ ক’লৈ যাব সেয়া সিদ্ধান্ত লোৱা সহজ নহয়। কিন্তু কঠিন যদিও তেওঁ ইয়াক কেনেদৰে বিতৰণ কৰিব লাগে সেইটো বিচাৰি উলিয়াব।
লগতে পঢ়ক: এইবাৰ গাজিয়াবাদ: প্ৰেমিকৰ সৈতে মিলি পত্নীয়ে হত্যা কৰি পুতি থলে স্বামীৰ মৃতদেহ
জেফে ৱাশ্বিংটন ডি.চি.-ত থকা তেওঁৰ ঘৰত সাক্ষাৎকাৰটো দিছিল। জেফে কৈছিল যে এমাজন গঢ়ি তোলাটো ইমান সহজ নাছিল। ইয়াৰ বাবে যথেষ্ট পৰিশ্ৰম কৰিব লগা হৈছিল। এতিয়া আমি লাহে লাহে উপলব্ধি কৰিছোঁ যে টকা বিলাই দিয়াটোও সমানে কঠিন কাম।
