দেশত বৰ্দ্ধিত ধৰ্ষণৰ দৰে ঘৃণনীয় কাণ্ডৰ সময়তে এটি তিনি বছৰীয়া শিশু বলাৎকাৰীক ২০ বছৰৰ কাৰাদণ্ডৰে দণ্ডিত কৰি এক নজিৰ সৃষ্টি কৰিছে।
ৰাজ্যখনৰ বুন্দি জিলাত বিগত বৰ্ষত সংঘটিত এই নিন্দনীয় কাণ্ডৰ অভিযুক্ত ২১ বছৰীয়া যুৱকক দোষী সাব্যস্ত কৰি POCSO আদালতে এই শাস্তি প্ৰদান কৰে।
মানৱ সমাজক লজ্জানত কৰা এই শিশু বলাৎকাৰৰ দৰে নিকৃষ্ট কাণ্ড সংঘটিত হৈছিল যোৱা বৰ্ষৰ ১৪ আগষ্টত।
আজি আদালতে দোষী সাব্যস্ত কৰা অপূৰ্ব ওৰফে ৰমন গোস্বামী (২১)য়ে ঘটনাৰ দিনা শিশুটিক চকলেট দিয়াৰ চলেৰে ঘৰলৈ নি ধৰ্ষণ কৰিছিল।
ধৰ্ষণৰ বলি হোৱাৰ পিছত শিশুটিয়ে কান্দি থকা দেখা পাই পৰিয়ালৰ সদস্যসকল চিন্তিত হৈ পৰিছিল আৰু মাত্ৰ তিনি বছৰীয়া শিশুটিয়ে দিয়া সাধাৰণ বৰ্ণনাতে ঘটনাৰ ভয়াৱহতাৰ বিষয়ে অনুমান কৰিব পাৰি আৰক্ষীৰ কাষ চাপে।
ঘটনাৰ পিছদিনাই শিশুটিৰ পৰিয়ালে স্থানীয় আৰক্ষী থানাত গোচৰ ৰুজু কৰে আৰু এই গোচৰৰ ওপৰত ভিত্তি কৰি আৰক্ষীয়ে ভাৰতীয় দণ্ডবিধিৰ ধাৰা ৩৭৬ আৰু POCSO আইনৰ অধীনত অভিযুক্ত গোস্বামীক গ্ৰেপ্তাৰ কৰিছিল।
দ্ৰুত বিচাৰৰ বাবে আৰক্ষীয়ে এই গোচৰটো বিশেষ কেছ অফিচাৰ আঁচনিৰ অধীনত শ্ৰেণীবদ্ধ কৰি ২২ দিনৰ ভিতৰতে চাৰ্জশ্বীট দাখিল কৰিছিল।
আজি জিলাখনৰ পকচো আদালতে অভিযুক্ত গোস্বামীক দোষী সাব্যস্ত কৰি ২০ বছৰৰ কাৰাদণ্ডৰ শাস্তিৰ লগতে ৫০,০০০ টকা জৰিমনাও আৰোপ কৰিছে।
