দেশৰ সীমান্তত নিয়োজিত ভাৰতীয় সামৰিক বাহিনী ‘সীমান্ত সুৰক্ষা বাহিনী’, চমুকৈ বি.এছ.এফ- ৰ এগৰাকী জোৱানে ভুলৱশত: পাকিস্তানৰ ভূখণ্ডত প্ৰৱেশ কৰাৰ ফলত বন্দী হৈছে পাকিস্তানৰ নিৰাপত্তা বাহিনীৰ হাতত।
বুধবাৰে পঞ্জাৱৰ আবোহৰ খণ্ডত সীমান্তত এই অথন্তৰৰ সন্মুখীন হয় ভাৰতীয় জোৱান গৰাকী। বৃহস্পতিবাৰে এই বিষয়ে সদৰী কৰি দেশৰ সেনা বিষয়াসকলে জোৱানগৰাকীক পাক ৰেঞ্জাৰে শীঘ্ৰেই মুকলি কৰি দিব বুলি আশা প্ৰকাশ কৰে।
বিষয়াসকলে এক বিবৃতিত উল্লেখ কৰা মতে বুধবাৰে পুৱা ঘন কুঁৱলীৰ ফলত পৰিৱেশ ভালদৰে দৃশ্যমান নোহোৱাৰ বাবে জোৱানগৰাকী ভুলৱশতঃ পাকিস্তানৰ ফালে পাৰ হৈ গৈছিল আৰু পাকিস্তানৰ ৰেঞ্জাৰসকলে তেওঁক গ্ৰেপ্তাৰ কৰিছিল।
সীমান্ত সুৰক্ষা বাহিনীৰ এগৰাকী জ্যেষ্ঠ বিষয়াই ঘটনা সন্দৰ্ভত কয় যে ইতিমধ্যে পাক ৰেঞ্জাৰ্ছৰ সৈতে এই বিষয়ত যোগাযোগ কৰা হৈছে আৰু জোৱান গৰাকীৰ মুক্তিৰ বাবে অপেক্ষা কৰা হৈছে।
উল্লেখ্যে যে, বিগত ৮ দিনৰ ভিতৰত দ্বিতীয়বাৰৰ বাবে সীমান্তত এনে ঘটনাৰ মুখামুখি হৈছে ভাৰতীয় জোৱান। যোৱা ১ ডিচেম্বৰতো ভাৰত-পাকিস্তান আন্তঃৰাষ্ট্ৰীয় সীমান্তত জিৰ’ লাইন পৰীক্ষণৰ সময়ত এগৰাকী ভাৰতীয়ে জোৱানে ভুলৱশত: পাক ভূখণ্ডত প্ৰৱেশ কৰিছিল।
অৱশ্যে একেদিনাই এক বৈঠকৰ অন্তত পাকিস্তানৰ ৰেঞ্জাৰসকলে ভাৰতীয় ‘সীমান্ত সুৰক্ষা বাহিনী’ৰ হাতত গতাই দিছিল জোৱান গৰাকীক।
