বিভিন্ন দেশত কোভিডৰ ঘটনা হঠাৎ বৃদ্ধি হোৱাৰ পৰিপ্ৰেক্ষিতত ভাৰতীয় চিকিৎসা সংস্থা (ইণ্ডিয়ান মেডিকেল এছ’চিয়েশ্যন)ই ৰাইজক সতৰ্ক কৰি দিছে। সংস্থাই কৈছে যে কোভিড সম্পৰ্কীয় নিয়মবোৰ সোনকালে অনুসৰণ কৰাৰ প্ৰয়োজন আহি পৰিছে।
সংস্থাটোৰ তৰফৰ পৰা কোৱা হয় যে প্ৰতিবেদন অনুসৰি আমেৰিকা যুক্তৰাষ্ট্ৰ, জাপান, দক্ষিণ কোৰিয়া, ফ্ৰান্স আৰু ব্ৰাজিলৰ দৰে ডাঙৰ দেশসমূহৰ পৰা যোৱা ২৪ ঘণ্টাত প্ৰায় ৫.৩৭ লাখ নতুন আক্ৰান্ত পোৱা গৈছে। ভাৰতে যোৱা ২৪ ঘণ্টাত ১৪৫ টা নতুন আক্ৰান্তৰ ঘটনা ঘটিছে যাৰ ভিতৰত চাৰিটা চীনৰ নতুন প্ৰকাৰৰ – বিএফ.৭ দ্বাৰা আক্ৰান্ত হৈছে।
লগতে পঢ়ক: চীনত বিএফ.৭-ৰ আতংক; দৈনিক ১০লাখ সংক্ৰমণ, ৫হাজাৰ মৃত্যু! প্ৰতিবেদনকলৈ চাঞ্চল্য
ভাৰতীয় চিকিৎসা সংস্থাই কৈছে যে ৰাজহুৱা আৰু ব্যক্তিগত খণ্ড, চিকিৎসক আৰু চিকিৎসা কৰ্মচাৰী, চৰকাৰৰ সক্ৰিয় নেতৃত্ব, পৰ্যাপ্ত ঔষধ আৰু ভেকচিনৰ উপলব্ধতা পৰীক্ষা কৰিব লাগিব, যাতে ভাৰতে অতীতৰ দৰে যিকোনো ঘটনা সম্পূৰ্ণৰূপে চম্ভালিবলৈ সক্ষম হয়।
ভাৰতীয় চিকিৎসা সংস্থাই জৰুৰীকালীন ঔষধ, অক্সিজেন যোগান আৰু এম্বুলেন্স সেৱা প্ৰদান কৰাৰ বাবে সংশ্লিষ্ট মন্ত্ৰালয় আৰু বিভাগসমূহক প্ৰয়োজনীয় নিৰ্দেশনা জাৰি কৰি ২০২১ চনত দেখা যিকোনো পৰিস্থিতিৰ বাবে প্ৰস্তুতি বৃদ্ধি কৰিবলৈ চৰকাৰক আহ্বান জনাইছিল।
ইপিনে, ভাৰতীয় চিকিৎসা সংস্থাই ইয়াৰ ৰাজ্যিক আৰু স্থানীয় শাখাসমূহক তেওঁলোকৰ এলেকাত কোভিডৰ প্ৰাদুৰ্ভাৱৰ ক্ষেত্ৰত প্ৰয়োজনীয় প্ৰাৰম্ভিক পদক্ষেপ ল’বলৈ পৰামৰ্শ জাৰি কৰিছে। সংস্থাই ইয়াৰ সকলো সদস্যক প্ৰাদুৰ্ভাৱৰ বিৰুদ্ধে যুঁজিবলৈ আগৰ দৰে সক্ৰিয়ভাৱে কাম কৰিবলৈ আহ্বান জনাইছে।
লগতে পঢ়ক:চীনত বিএফ.৭-ৰ আতংক; দৈনিক ১০লাখ সংক্ৰমণ, ৫হাজাৰ মৃত্যু! প্ৰতিবেদনকলৈ চাঞ্চল্য
সংস্থাই কয় যে বৰ্তমান পৰিস্থিতি উদ্বেগজনক নহয়, সেয়েহে আতংকিত হোৱাৰ কোনো প্ৰয়োজন নাই। ৰোগৰ চিকিৎসাতকৈ প্ৰতিৰোধ ভাল। সেয়েহে আগন্তুক কোভিড প্ৰাদুৰ্ভাৱৰ বাবে সকলোকে নিম্নলিখিত প্ৰয়োজনীয় পদক্ষেপবোৰ ল’বলৈ পৰামৰ্শ দিয়া হৈছে:-
*সামাজিক দূৰত্ব অনুসৰণ কৰা
*নিয়মীয়াকৈ হাত ধোৱা
*আন্তৰ্জাতিক ভ্ৰমণ পৰিহাৰ কৰা
*যিমান সম্ভৱ সোনকালে বুষ্টাৰ পালি গ্ৰহণ কৰা
*ৰাজহুৱা সভালৈ যোৱা পৰিহাৰ কৰা
*যদিৰ ডিঙিৰ বিষ, কাহ আদিৰ দৰে লক্ষণ আছে তেনেহ’লে চিকিৎসকৰ পৰামৰ্শ লোৱা
*সময়ে সময়ে জাৰী কৰা চৰকাৰী পৰামৰ্শ অনুসৰণ কৰা
লগতে পঢ়ক: কিছুমান দেশৰ নেতাৰ আমেৰিকা নিৰ্ভৰশীলতাৰ পৰিণতিৰ পৰা শিক্ষা লওক জেলেনস্কিয়ে: ইৰান
লক্ষণীয় যে চীনত কোভিড আক্ৰান্তৰ ঘটনা দ্ৰুতগতিত বৃদ্ধি পাইছে, যাৰ পৰিপ্ৰেক্ষিতত ভাৰত চৰকাৰ সতৰ্ক হৈ পৰিছে। অ’মিক্ৰনৰ এক চাব-ভেৰিয়েন্ট বিএফ.৭-ৰ বিপদৰ কথা মনত ৰাখি কেন্দ্ৰীয় চৰকাৰে ইয়াৰ প্ৰস্তুতি আৰম্ভ কৰিছে। ভাৰতত এই ভেৰিয়েন্টটোৰ দ্বাৰা আক্ৰান্তৰ মুঠ চাৰিটা ঘটনা পোহৰলৈ আহিছে।
