অৰুণাচল প্ৰদেশত প্ৰস্তাৱিত উজনি চিয়াং বহুমুখী নদীবান্ধ প্ৰকল্পৰ বিৰুদ্ধে প্ৰতিবাদ সাব্যস্ত কৰা মহিলা আৰু যুৱক-যুৱতীকে ধৰি শান্তিপূৰ্ণ প্ৰতিবাদকাৰীৰ ওপৰত চৰকাৰী বলপ্ৰয়োগক কঠোৰ ভাষাৰে সমালোচনা কৰিছে ভূমি অধিকাৰ যৌথ সংগ্ৰাম সমিতিয়ে। গুৱাহাটীত এক প্ৰেছ বিবৃতিযোগে সমিতিৰ অন্যতম আহ্বায়ক কৃষ্ণ গগৈ, বিদিশা বৰ্মন আৰু সুব্ৰত তালুকদাৰে কয় যে গণতান্ত্ৰিক ব্যৱস্থাত জনসাধাৰণৰ শান্তিপূৰ্ণ প্ৰতিবাদৰ অধিকাৰ আছে আৰু ইয়াৰ বিৰুদ্ধে চৰকাৰী বলপ্ৰয়োগ কোনো কাৰণতে গ্ৰহণযোগ্য নহয়।
প্ৰস্তাৱিত নদীবান্ধৰ জৰীপ আৰু নিৰ্মাণকাৰ্যৰ বিৰোধিতা কৰি তথা ‘অৰুণাচল প্ৰদেশ বেআইনী কাৰ্যকলাপ (প্ৰতিৰোধ) আইন’ৰ, ২০১৪ ৰ অধীনত চিয়াং নদীবান্ধ বিৰোধী স্থানীয় নেতাক প্ৰশাসনে গ্ৰেপ্তাৰ কৰাৰ প্ৰতিবাদত যোৱা ২৩ অক্টোবৰত তিনিখন জিলাত এক ১২ ঘণ্টীয়া বন্ধ পালন কৰা হৈছিল। আদি বাণে কেবাং-ইউনাইটেড, উজনি চিয়াং বহুমুখী নদীবান্ধ প্ৰকল্প ক্ষতিগ্ৰস্ত অঞ্চল যুৱ পৰিষদ আৰু এছ.আই.এফ.এফ. যুৱ শাখাৰ আহ্বানত চিয়াং, উজনি চিয়াং আৰু পূব চিয়াং জিলাত এই প্ৰতিবাদ সাব্যস্ত কৰা হয়। সমিতিয়ে অভিযোগ কৰে যে কেইবা বছৰ ধৰি স্থানীয় ৰাইজৰ ধাৰাবাহিক প্ৰতিৰোধৰ পাছতো প্ৰাক্-সম্ভাৱ্যতা প্ৰতিবেদনৰ বাবে জৰীপ কাৰ্য্য বলপূৰ্বকভাৱে চলাই নিবলৈ চৰকাৰে গ্ৰহণ কৰা পদক্ষেপ সম্পূৰ্ণ অগণতান্ত্ৰিক আৰু দমনমূলক।
প্ৰস্তাৱিত ১১,০০০ মেগাৱাট ক্ষমতাসম্পন্ন চিয়াং নদীবান্ধে হাজাৰ হাজাৰ পৰিয়ালক নিজৰ পূৰ্বপুৰুষৰ ভূমিৰ পৰা উচ্ছেদ কৰাৰ লগতে সংবেদনশীল হিমালয়ৰ পৰিৱেশৰ অপূৰণীয় ক্ষতিসাধন কৰিব বুলি সমিতিয়ে উদ্বেগ প্ৰকাশ কৰে। তদুপৰি, এই প্ৰকল্পই নামনি অঞ্চলত বসবাস কৰা থলুৱা সম্প্ৰদায়সমূহৰ নদীভিত্তিক জীৱিকা, সংস্কৃতি আৰু অস্তিত্বৰ প্ৰতি গভীৰ ভাবুকি কঢ়িয়াই আনিছে। চুবুৰীয়া দেশৰ ভূ-ৰাজনৈতিক কাৰ্যকলাপৰ পৰিপ্ৰেক্ষিতত থকা আশংকাৰ অচিলা লৈ ভাৰতৰ নাগৰিকৰ জীৱন, ভূমি আৰু এক সংবেদনশীল পৰিৱেশক এনেদৰে সংকটৰ মুখলৈ ঠেলি দিয়াটো কেতিয়াও ন্যায়সংগত হ’ব নোৱাৰে বুলিও বিবৃতিটোত উল্লেখ কৰা হয়।
বৰ্তমানৰ এই পৰিস্থিতিত ভূমি অধিকাৰ যৌথ সংগ্ৰাম সমিতিয়ে গ্ৰেপ্তাৰ কৰা চাৰিগৰাকী স্থানীয় আদি নেতাক তৎকালীনভাৱে মুকলি কৰি দিয়াৰ লগতে তেওঁলোকৰ বিৰুদ্ধে ৰুজু কৰা সকলো গোচৰ প্ৰত্যাহাৰ কৰিবলৈ চৰকাৰক দাবী জনাইছে। লগতে উজনি চিয়াং বহুমুখী নদীবান্ধ প্ৰকল্প আৰু ইয়াৰ প্ৰাক্-সম্ভাৱ্যতা জৰীপ সম্পূৰ্ণৰূপে বাতিল কৰিবলৈ আৰু প্ৰতিবাদকাৰীৰ ওপৰত কন্দুৱা গেছ নিক্ষেপ কৰা দায়ী বিষয়াসকলৰ বিৰুদ্ধে ব্যৱস্থা গ্ৰহণ কৰিবলৈ সংগঠনটোৱে আহ্বান জনায়। স্থানীয় থলুৱা জনসাধাৰণৰ পূৰ্ণ সন্মতি অবিহনে অঞ্চলটোত কোনো ধৰণৰ প্ৰকল্প বা জৰীপ বলপূৰ্বকভাৱে জাপি নিদিয়াতো নিশ্চিত কৰিবলৈ সমিতিয়ে চৰকাৰক সকীয়াই দিছে।
