দেশৰ বিৰোধী দল কংগ্ৰেছৰ চলিত ‘ভাৰত জোড়ো যাত্ৰা’ৰ সময়ত যাত্ৰাৰ নেতৃত্ব বহন কৰা ৰাহুল গান্ধীৰ নিৰাপত্তা সন্দৰ্ভত সৃষ্টি হোৱা বিতৰ্কৰ মাজতে এইবাৰ এক বিশেষ মন্তব্য কৰিছে ৰাহুল গান্ধীয়ে।
ৰাহুল গান্ধীৰ নিৰাপত্তাত অসতৰ্ক হোৱা বুলি কংগ্ৰেছে দিল্লী আৰক্ষীক দোষাৰোপ কৰাৰ পিছতে কেন্দ্ৰীয় সংৰক্ষিত আৰক্ষী বাহিনীয়ে গান্ধীয়ে নিজেই প্ৰট’কল ভংগ কৰা বুলি দাবী কৰিছিল। এই দাবীৰ প্ৰত্যুত্তৰ দি গান্ধীয়ে ভাৰত জোড়ো যাত্ৰা বুলেট প্ৰুফ গাড়ী এখনত সম্ভৱ নহয় বুলি মন্তব্য কৰিছে।
“চৰকাৰে বিচাৰে মই ভাৰত জোড়ো যাত্ৰা বুলেট প্ৰুফ গাড়ীত কৰিম। সেয়া মই কেনেকৈ কৰিম? এয়া এক পদযাত্ৰাহে।”- কেন্দ্ৰীয় সংৰক্ষিত আৰক্ষী বাহিনীৰ দাবীৰ প্ৰতি সঁহাৰি দি ৰাহুল গান্ধীয়ে এইদৰে কয়।
শাসকীয় বিজেপি চৰকাৰৰ নেতাসকলে নীতি-নিয়ম উলংঘা কৰা বুলি অভিযোগ কৰি কংগ্ৰেছ সাংসদগৰাকীয়ে লগতে দল অনুসৰি বিভিন্ন প্ৰট’কল আছে বুলিও কেন্দ্ৰ সমালোচনা কৰে।
“যেতিয়া তেওঁলোকৰ নেতাসকলে মুকলি জীপত উঠি প্ৰট’কলৰ বিৰুদ্ধে গৈ ৰোডশ্ব’ কৰে, তেতিয়া কোনো চিঠি পঠোৱা নহয়। তেওঁলোকে ৰাহুল গান্ধীয়ে নিজৰ নিৰাপত্তা কভাৰ উলংঘা কৰা বুলি দাবী কৰি গোচৰ গঢ়ি তুলিবলৈ চেষ্টা কৰিছে।”- গান্ধীয়ে কয়।
কোনো ধৰণৰ প্ৰচাৰ আৰু টকাৰে সত্যক ঢাকি ৰাখিব নোৱাৰি বুলি মন্তব্য কৰে ৰাহুল গান্ধীয়ে। তেওঁ লগতে এই ভাৰত জোড়ো পদযাত্ৰাই ভাৰতৰ আৱেগক প্ৰতিনিধিত্ব কৰে আৰু যাত্ৰাই তেওঁক বহু কথা শিকাইছে বুলিও নিজ ভাষ্যত উল্লেখ কৰে।
“যেতিয়া মই এই পদযাত্ৰা আৰম্ভ কৰিছিলো তেতিয়া মোৰ কোনো পূৰ্বধাৰণা নাছিল। মই মাত্ৰ যাত্ৰাৰ অভিজ্ঞতা ল’বলৈ গৈছিলো। দিন পাৰ হৈ যোৱাৰ লগে লগে মই উপলব্ধি কৰিছিলো যে ই কেৱল এক পদযাত্ৰাতকৈও অধিক। ই ভাৰতৰ অনুভৱক প্ৰতিনিধিত্ব কৰে।এই যাত্ৰাই মোক কল্পনা কৰাতকৈ বহু বেছি শিকাইছে।”— এইদৰে কয় কংগ্ৰেছ সাংসদগৰাকীয়ে।
ইফালে আগন্তুক ২০২৪ চনৰ লোকসভা নিৰ্বাচনত বিৰোধী ঐক্যৰ প্ৰাসঙ্গিকতা দোহাৰে গান্ধীয়ে। তেওঁ কয় যে যদি বিৰোধীয়ে ঐক্যবদ্ধভাৱে থিয় দিয়ে তেন্তে বিজেপিৰ বাবে নিৰ্বাচনত জয়ী হোৱা কঠিন হৈ পৰিব। বিৰোধীয়ে বিকল্প দৃষ্টিভংগীৰে ৰাইজৰ ওচৰলৈ যাব লাগিব বুলিও তেওঁ পৰামৰ্শ দিয়ে।
