নিউয়ৰ্কৰ পৰা দিল্লী অভিমুখী এখন বিমানত এগৰাকী সুৰাপায়ী ব্যক্তিয়ে বৰ্ষীয় মহিলা এগৰাকীৰ দেহত প্ৰস্ৰাৱ কৰাৰ ঘটনাক লৈ চাঞ্চল্য সৃষ্টি হোৱাৰ পিছতে পুনৰ পোহৰলৈ আহিছে আন এক অনুৰূপ কাণ্ড। পুনৰ এগৰাকী সুৰাপায়ী যাত্ৰীয়ে এগৰাকী মহিলা যাত্ৰীৰ কম্বলত প্ৰস্ৰাৱ কৰাৰ খবৰ প্ৰকাশ পাইছে।
এইবাৰ এই ঘটনা সংঘটিত হৈছে পেৰিছৰ পৰা দিল্লী অভিমুখী এখন এয়াৰ ইণ্ডিয়াৰ বিমানত। পিছে অভিযুক্তই মহিলাগৰাকীক লিখিতভাৱে ক্ষমা খোজাৰ বাবে কোনো আইনী বা দণ্ডবিধিৰ ব্যৱস্থা গ্ৰহণ কৰা নহয়।
খবৰ অনুসৰি, শেহতীয়া এই ঘটনাটো সংঘটিত হৈছিল ৬ ডিচেম্বৰত। ঘটনাৰ পিছতে বিমানখনৰ পাইলটে ইন্দিৰা গান্ধী আন্ত:ৰাষ্ট্ৰীয় বিমানবন্দৰত এয়াৰ ট্ৰেফিক কণ্ট্ৰল (ATC)ক এই বিষয়ে অৱগত কৰে।
এই প্ৰতিবেদন এয়াৰ ট্ৰেফিক কণ্ট্ৰল (ATC)লৈ প্ৰেৰণ কৰাৰ পিছত অভিযুক্ত যাত্ৰীগৰাকীক চি আই এছ এফৰ জোৱানে আটক কৰে। ঘটনা অনুসৰি, অভিযুক্ত ব্যক্তিগৰাকীয়ে মদ্যপান কৰি পিছত তেওঁ অনব’ৰ্ডৰ এগৰাকী মহিলা যাত্ৰীৰ কম্বলত প্ৰস্ৰাৱ কৰে।
বিমানখনৰ পৰা নামি অহাৰ পিছত চি আই এছ এফৰ কৰ্মীয়ে তেওঁক গ্ৰেপ্তাৰ কৰাৰ বিপৰীতে অভিযুক্ত আৰু ভুক্তভোগী মহিলাগৰাকীৰ মাজত ইতিমধ্যে আলোচনাৰ মাধ্যমেৰে বিষয়টোৰ বুজা-পৰা হৈ যোৱাৰ বাবে তেওঁলোকক যাবলৈ দিয়া হয়।
অভিযুক্ত ব্যক্তিগৰাকীয়ে মহিলাগৰাকীক লিখিতভাৱে ক্ষমা বিচাৰে বুলি প্ৰকাশ পোৱাৰ লগতে মহিলাগৰাকীয়েও পোনপ্ৰথমে এজাহাৰ লিখে যদিও পিছত আৰক্ষীৰ ওচৰত এজাহাৰ দাখিল কৰিবলৈ অস্বীকাৰ কৰে।
