প্ৰধানমন্ত্ৰী নৰেন্দ্ৰ মোদীৰ নেতৃত্বত এতিয়া ভাৰতে “বিশ্বগুৰু” ৰূপত আত্মপ্ৰকাশ কৰিছে! সমগ্ৰ দেশবাসীৰ সন্মুখত প্ৰতিষ্ঠা কৰা হৈছে এই চমৎকাৰী ধাৰণা। বিশ্বগুৰু ৰূপে ভাৰতক থিয় কৰোৱাৰ বাবে বিজেপি চৰকাৰে ‘বিকাশ’ নীতিৰ শ্ল’গান ২০১৪ চনৰ পৰাই আওৰাই আহিছে।
প্ৰথম অৱস্থাত ২০২২ চনৰ ভিতৰতে ভাৰতক বিশ্বগুৰু ৰূপে গঢ়ি তোলাৰ প্ৰতিশ্ৰুতি দিয়া প্ৰধানমন্ত্ৰী মোদীয়ে অৱশ্যে বিগত স্বাধীনতা দিবসত এই বিশ্বগুৰুৰ সপোন ২০৪৭ চনলৈ পিছুৱাই দিয়ে।
পিছে কাৰ্যক্ষেত্ৰত এইয়া হৈ পৰিছে ফুটুকাৰ ফেন। বিকাশ, বিশ্বগুৰু এই সকলো শ্ল’গানৰ অভিনৱ বিজ্ঞাপনৰ বাদে বিজেপি চৰকাৰৰ কাৰ্যকালত সমুখলৈ আহিছে সম্পূৰ্ণ এক ওলোটা ছবিহে।
মূল্যবৃদ্ধিৰ পৰা আৰম্ভ কৰি দাৰিদ্ৰতা, বৰ্দ্ধিত নিবনুৱা সমস্যাৰ পৰা ক্ৰমবৰ্ধমান ভোকাতুৰৰ সংখ্যালৈ- এই সকলো তথ্যই ‘বিশ্বগুৰু ভাৰত’ৰ বিজ্ঞাপনৰ আঁৰত থকা প্ৰকৃত ভাৰতৰ ছবিখন স্পষ্টকৈ তুলি ধৰিছে।
দেশত ক্ৰমবৰ্ধমান দৰিদ্ৰতাৰ এই ভয়াৱহ ছবিখন উদঙাই দিছে মধ্যপ্ৰদেশত শেহতীয়াকৈ সংঘটিত হোৱা এক শোকাৱহ ঘটনাই। দৰিদ্ৰতাৰ কৰাল গ্ৰাসে কোঙা কৰা ভূপালৰ এটা পৰিয়ালে উপায়ন্তৰ হৈ বিহ সেৱন কৰি আত্মহত্যাৰ চেষ্টা চলোৱাৰ খবৰ পোহৰলৈ আহিছে।
এই শোকাৱহ পৰিস্থিতিৰ ফলত প্ৰাণ হেৰুৱাইছে পৰিয়ালটোৰ এগৰাকী আঠ বছৰীয়া শিশুৱে। প্ৰকাশিত খবৰ অনুসৰি খজুৰি অঞ্চলত পৰিয়ালৰ সৈতে বাস কৰা ৪০ বৰ্ষীয় কিশোৰ জাটাভ নামৰ ব্যক্তিগৰাকীয়ে আৰ্থিক সমস্যাত জৰ্জৰিত হৈ এই চৰম পথ বাচি লয়।
দৈনন্দিন প্ৰয়োজনীয়তাসমূহ পূৰণ কৰিব নোৱাৰাৰ বাবে ব্যক্তিগৰাকীয়ে দীৰ্ঘদিন ধৰি মানসিক চাপত ভুগিছিল বুলি জানিব পৰা গৈছে। অৱশেষত বুধবাৰে জাটাভ আৰু তেওঁৰ ৩৫ বৰ্ষীয় পত্নী সীতাই চৰম সিদ্ধান্ত গ্ৰহণ কৰি তেওঁলোকৰ চাৰি সন্তানক গাখীৰত বিহ মিহলাই খুৱাই দিয়ে আৰু নিজেও বিহ পান কৰে।
অৱশ্যে তেওঁলোকক উদ্ধাৰ কৰি স্থানীয় লোকে সংকটজনক অৱস্থাত চিকিৎসালয়ত ভৰ্তি কৰে। চিকিৎসাধীন অৱস্থাত আজি পুৱা পৰিয়ালটোৰ কনিষ্ঠ সন্তান আঠ বছৰীয়া শিশুটিৰ মৃত্যু হয়। আনহাতে পৰিয়ালৰ আন তিনি শিশুৰ স্বাস্থ্যৰ অৱস্থাও বৰ্তমান সংকটজনক বুলি জানিব পৰা গৈছে।
অৱশ্যে সন্তানকেইটিৰ স্বাস্থ্য সংকটাপন্ন হ’লেও তেওঁলোকৰ পিতৃ-মাতৃ বিপদমুক্ত বুলি জানিব পৰা গৈছে। ইফালে ঘটনাৰ বিষয়ে প্ৰকাশ পোৱাৰ পিছতে মধ্যপ্ৰদেশৰ গৃহমন্ত্ৰী ড০ নৰোত্তম মিশ্ৰই এই সন্দৰ্ভত আৰক্ষীয়ে তদন্ত অব্যাহত ৰাখিছে আৰু গোচৰ ৰুজু কৰিছে বুলি জানিবলৈ দিয়ে।
