দেশৰ ৰাজনীতিত পাপ্পু নামেৰে চৰ্চিত কংগ্ৰেছ নেতা ৰাহুল গান্ধী। শাসকীয় বিজেপি দল আৰু একাংশ সংবাদ মাধ্যমে ৰাহুল গান্ধীক পাপ্পু নামেৰে দেশবাসীৰ সন্মুখত চিনাকি কৰাই দিছে। পিছে ৰাহুল গান্ধীৰ পাপ্পু নামাকৰণত সন্মত নহয় ৰিজাৰ্ভ বেংকৰ প্ৰাক্তন গৱৰ্ণৰ তথা অৰ্থনীতিবিদ ৰঘূৰাম ৰাজন।
ৰাহুল গান্ধীক ‘পাপ্পু’ নামেৰে নিন্দা কৰা কাৰ্যক বিৰোধ কৰি ৰঘূৰাম ৰাজনে কংগ্ৰেছ সাংসদ গৰাকীক বুদ্ধিমান আৰু দূৰদৰ্শী ব্যক্তি আখ্যা দিয়ে আৰু তেনে এগৰাকী ব্যক্তিক ‘পাপ্পু’ বুলি অভিহিত কৰাটো দুৰ্ভাগ্যজনক বুলি মন্তব্য কৰে।
ৰঘূৰাম ৰাজনৰ মতে, ৰাহুল গান্ধীয়ে ৰাজনীতিত প্ৰৱেশ কৰাৰ পৰাই তেওঁৰ নামত চতুৰতাৰে ‘পাপ্পু’ টেগ সংযোজন কৰা হৈছে। বিজেপিৰ ‘ট্ৰল আৰ্মী’ আৰু আই টি চেলে ৰাহুল গান্ধীক মূৰ্খ হিচাপে প্ৰতিষ্ঠা কৰিবলৈ দিনে নিশাই কাম কৰি আহিছে বুলি অভিযোগ কৰে ৰাজনে।
বিশিষ্ট অৰ্থনীতিবিদ গৰাকীয়ে কয় যে, বিজেপিৰ সাধাৰণ কৰ্মচাৰীৰ লগতে আনকি বিজেপিৰ শীৰ্ষ নেতাসকলেও কংগ্ৰেছ নেতাগৰাকীক পোনপটীয়াকৈ পাপ্পু বুলি সম্বোধন কৰিছিল। কংগ্ৰেছৰ প্ৰাক্তন সভাপতিগৰাকীৰ ভাবমূৰ্তি এনেদৰে ম্লান কৰাৰ প্ৰয়াস কৰা হৈছে যে ৰাজনৈতিকভাৱে তেওঁ এতিয়াও বেকফুটত আছে।
ৰঘূৰাম ৰাজনে কয়, “ৰাহুল গান্ধী কোনো কাৰণতে পাপ্পু বা মূৰ্খ নহয়। তেওঁ যথেষ্ট বুদ্ধিমান। তেওঁক পাপ্পু বুলি প্ৰচাৰ কৰাটো অতি দুৰ্ভাগ্যজনক। প্ৰায় এটা দশক ধৰি মই তেওঁৰ লগত আছিলো। বহু দিশত কথা-বাৰ্তা হৈছো। কোনো কাৰণতে ৰাহুল পাপ্পু নহয়। তেওঁ এজন স্মাৰ্ট, যৌৱন, বুদ্ধিমান মানুহ।”
ৰাহুল গান্ধীৰ সমৰ্থনত ৰাজনে লগতে কয়, “কেনে ধৰণৰ কথাক অধিক গুৰুত্ব দিয়া উচিত, সেয়া বুজি পোৱাটো অত্যন্ত প্ৰয়োজনীয় বুলি মই ভাবো। কি কামৰ বাবে কাৰ যোগ্যতা বেছি, ক’ত ৰিস্ক বেছি, সেয়া বুজিব লাগিব। মই ভাবো ৰাহুলে সেয়া বহুত ভালকৈ কৰিব পাৰে।”
পিছে ৰাজনে ৰাহুল গান্ধীৰ প্ৰশংসা কৰিলেও এই প্ৰশংসা মানি ল’ব পৰা নাই বিজেপিয়ে। বিজেপিৰ মতে ৰঘূৰাম ৰাজন কংগ্ৰেছৰ সমৰ্থক আৰু সেয়া পৃথকে কোৱাৰ প্ৰয়োজন নাই। যোৱা ১৪ ডিচেম্বৰত ৰাজনে ৰাহুল গান্ধীক সংগ দি ‘ভাৰত জোড়ো যাত্ৰা’ত অংশগ্ৰহণ কৰিছিল।
ইয়াৰ পিছতে বিজেপিৰ নেতা-কৰ্মীসকলে ৰঘূৰাম ৰাজনে এতিয়া কংগ্ৰেছত পোনপটীয়াকৈ যোগদান কৰাটোৱেই সম্ভৱ বুলি কটুক্তি কৰিছিল। কিন্তু এই কটুক্তিৰ উত্তৰত ৰাজনে কোনো ৰাজনৈতিক দলত যোগদান নকৰে বুলি স্পষ্ট কৰি দিছিল।
উল্লেখ্য যে ভাৰতীয় ৰিজাৰ্ভ বেংকৰ গৱৰ্ণৰ পদৰ কাৰ্যকাল সমাপ্তিৰ পাছত দায়িত্বৰ পৰা অব্যাহতি লোৱাৰ পিছৰ পৰাই কেন্দ্ৰীয় চৰকাৰৰ ভুল নীতিৰ বিৰুদ্ধে মাত আহিছে ৰাজনে। বিশিষ্ট অৰ্থনীতিবিদ গৰাকীয়ে বিশেষকৈ বিজেপি চৰকাৰৰ অৰ্থনৈতিক নীতিৰ বিষয়ত যথেষ্ট সৰৱ হৈ আহিছে।
