তুলুঙা আৰু পাতলীয়া বক্তব্য আৰু মন্তব্যৰে প্ৰায়ে সংবাদ মাধ্যমৰ চৰ্চাত থাকে অসমৰ মুখ্যমন্ত্ৰী হিমন্ত বিশ্ব শৰ্মা। এই মজ্জাগত স্বভাৱক ত্যাগ কৰিব নোৱাৰি শনিবাৰেও আন এক তুলুঙা মন্তব্য কৰা দেখা গ’ল মুখ্যমন্ত্ৰী ডঃ হিমন্ত বিশ্ব শর্মাক।
শনিবাৰে মুখ্যমন্ত্রী ডঃ শৰ্মাই এক চৰকাৰী কার্যসূচীত কন্যা সন্তানে কিমান বছৰত সন্তান জন্ম দিব লাগে সেই বিষয়ে পৰামৰ্শ আগবঢ়ায়। মুখ্যমন্ত্ৰীয়ে কয় যে ছোৱালীবোৰে সঠিক বয়সত মাতৃ হ’ব লাগে। মুখ্যমন্ত্ৰীৰ মতে যুৱতীৰ মাতৃত্ব হোৱাৰ উপযুক্ত বয়স হৈছে ২২ বছৰৰ পৰা ৩০ বছৰ।
“ছোৱালীয়ে মাতৃ হ’বলৈ বেছি সময় অপেক্ষা কৰিব নালাগে, কিয়নো পাছলৈ জটিলতাৰ সৃষ্টি হয়। মাতৃত্বৰ বাবে উপযুক্ত বয়স ২২ৰ পৰা ৩০ বছৰ। যিসকল ছোৱালী এতিয়াও বিয়া হোৱা নাই, তেওঁলোকে সোনকালে বিয়া কৰাব লাগে।” মুখ্যমন্ত্ৰী শর্মাই কয়।
ভাষণ প্ৰসংগত মুখ্যমন্ত্ৰী শৰ্মাই লগতে কয় যে বাল্য বিবাহ আৰু আগতীয়া অৰ্থাৎ নাবালিকা মাতৃত্ব ৰোধ কৰাৰ বাবে তেওঁৰ চৰকাৰৰ প্ৰতিশ্ৰুতিৱদ্ধ। বাল্য বিবাহ আৰু নাবালিকা মাতৃত্ব নিৰীক্ষণ আৰু যৌন অপৰাধৰ পৰা শিশু সুৰক্ষা (POCSO) আইন বলবৎ কৰাৰ বাবে ৰাজ্য চৰকাৰে কঠোৰ আইন প্ৰণয়ন কৰাৰ পিছতে মুখ্যমন্ত্ৰী হিমন্ত বিশ্ব শৰ্মাই এই মন্তব্য কৰিছে।
মুখ্যমন্ত্ৰী শৰ্মাই কয় যে অহা পাঁচ-ছয় মাহত হাজাৰ হাজাৰ লোকক গ্ৰেপ্তাৰ কৰা হ’ব, কিয়নো ১৪ বছৰৰ তলৰ ছোৱালী এজনীৰ আইনগতভাৱে বিবাহিত স্বামী হ’লেও যৌন সম্পৰ্ক স্থাপন কৰাটো অপৰাধ। তেওঁ কয় যে ছোৱালীৰ বিবাহৰ আইনী বয়স ১৮ বছৰ আৰু নাবালিকা কন্যাক বিয়া কৰোৱাসকলৰ বিৰুদ্ধে আইনী ব্যৱস্থা গ্ৰহণ কৰা হ’ব। মুখ্যমন্ত্ৰীৰ মতে নাবালিকাক বিয়া কৰোৱা বহু পুৰুষে যাৱজ্জীৱন কাৰাদণ্ডৰ শাস্তিও ভোগ কৰিবলগীয়া হ’ব পাৰে।
ইফালে ১৪ৰ পৰা ১৮ বছৰ বয়সৰ ছোৱালীক বিয়া কৰাই দিয়াসকলৰ বিৰুদ্ধেও গোচৰ তৰা হ’ব বুলিও উল্লেখ কৰে মুখ্যমন্ত্ৰী শৰ্মাই।
উল্লেখ্য, যোৱা সোমবাৰে অসম কেবিনেটে POCSO আইনৰ অধীনত ১৪ বছৰৰ তলৰ ছোৱালীক বিয়া কৰোৱা পুৰুষক বিৰুদ্ধে গোচৰ ৰুজু কৰাৰ সিদ্ধান্ত গ্ৰহণ কৰিছিল। ১৪ৰ পৰা ১৮ বছৰ বয়সৰ ছোৱালীক বিয়া কৰোৱা আৰু বিয়া দিয়াসকলৰ বিৰুদ্ধে শিশু বিবাহ নিষেধাজ্ঞা আইন ২০০৬ৰ অধীনত গোচৰ চলোৱা হ’ব।
