হিতাধিকাৰী আঁচনিৰে হিতাধিকাৰক তিতাধিকাৰলৈ পৰিণত কৰিছে ৰাজ্য চৰকাৰে। এফালে হিতাধিকাৰ আঁচনিৰ জৰিয়তে ৰাইজৰ মন ভোলাই আনহাতে কেকোঁৰা চেপা দিছ টকা উলিয়াই নিছে ৰাজ্য চৰকাৰে। এইবাৰ পুনৰ চৰকাৰে মধ্যবিত্তৰ মূৰত মাৰিছে কৰৰ প্ৰচণ্ড কোব।
এতিয়াৰে পৰা অসম আৰ্হিৰ ঘৰ সাজোতে হাজাৰ হাজাৰ টকা কৰ ভৰিব লাগিব ৰাইজে। এইবছৰৰ আৰম্ভণীৰ পৰাই আৰম্ভ হৈছে অনলাইন ঘৰ সজাৰ বাবে অনলাইন অনুমতি ব্যৱস্থা। এতিয়াৰে অসম আৰ্হিৰ ঘৰ সাজিবলৈ অনলাইন অনুমতিৰ বাবে চৰকাৰক দিব লাগিব নুন্যতম ৩০ হাজাৰ টকা।
পূৰ্বতে অসম আৰ্হিৰ ঘৰ সাজিবলৈ আবেদন কৰোঁতে কৰ দিব লাগিছিল প্ৰতি বৰ্গমিটাৰত ৫ টকাকৈ। কিন্তু এতিয়াৰে পৰা অসম আৰ্হিৰ ঘৰ সাজিবৰ বাবে আবেদন জনালে প্ৰতি বৰ্গমিটাৰত ১৫৮৬৭.৩৫ টকাকৈ দিব লাগিব চৰকাৰক। ইয়াৰ উপৰিও উন্নয়ন প্ৰাধিকাৰ বা পৌৰ সভাক দিব লাগিব ৩ শতাংশ কৰ। তদুপৰি পৌৰসভাৰ পৰা বা উন্নয়ন প্ৰাধিকাৰৰ পৰা অনুমতি ল’বলৈও বেলেগে দিব লাগিব কৰ।
কৰৰ বোজাত এতিয়া ৰাইজৰ কঁকাল বেঁকা। কৰ দিওতে দিওতে দুবেলা দুমুঠি খাবলৈ চিন্তা কৰিবলগীয়া হৈছে মধ্যবিত্তীয় ৰাইজে। এতিয়া মাথোঁ জীয়াই থাকিবলৈ লোৱা উশাহটোৰ কৰ ল’বলৈ বাকী ৰাখিছে চৰকাৰে।
