ৰাজস্থান উচ্চ ন্যায়ালয়ৰ জ্যেষ্ঠ ন্যায়াধীশ সন্দীপ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়া হৈছে। ন্যায়াধীশ সন্দীপ মেহতাই বিদায়ী মুখ্য ন্যায়াধীশ আৰ এম ছায়াৰ স্থানত মুখ্য ন্যায়াধীশৰ পদত অধিষ্ঠিত হ’ব।
উচ্চতম ন্যায়ালয়ৰ কলেজিয়ামৰ পৰামৰ্শৰ ভিত্তিত ন্যায়াধীশ সন্দীপ মেহতাক উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়া হৈছে। ২০২৫ চনৰ ১০ জানুৱাৰীত অৱসৰ ল’ব ন্যায়াধীশ মেহতাই।
উচ্চ ন্যায়ালয়ৰ মুখ্য ন্যায়াধীশ হিচাপে ন্যায়াধীশ মেহতাক নিযুক্তি দিয়াৰ বাবে ৮ ফেব্ৰুৱাৰীত উচ্চতম ন্যায়ালয়ৰ কলেজিয়ামে পৰামৰ্শ দিছিল। এই সন্দৰ্ভত কেন্দ্ৰীয় আইন আৰু ন্যায় মন্ত্ৰালয়ৰ ৱেবছাইটত এক জাননী প্ৰকাশ কৰা হৈছিল।
অধিসূচনাত কোৱা হৈছে, “ভাৰতীয় সংবিধানৰ ২১৭ নং অনুচ্ছেদৰ দফা (১)ৰ দ্বাৰা প্ৰদান কৰা ক্ষমতা প্ৰয়োগ কৰি ৰাষ্ট্ৰপতিয়ে ৰাজস্থান উচ্চ ন্যায়ালয়ৰ ন্যায়াধীশ সন্দীপ মেহতাক চনৰ গৌহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দি আনন্দিত হৈছে।”
অৱশ্যে পূৰ্বে কলেজিয়ামে ন্যায়াধীশ কে বিনোদ চন্দ্ৰনক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ সিদ্ধান্ত লৈছিল। কিন্তু সুকীয়া প্ৰস্তাৱৰ জৰিয়তে বিষয়টো পুনৰ আহ্বান কৰা হয় আৰু ন্যায়াধীশ চন্দ্ৰনক পাটনা উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তিৰ বাবে পৰামৰ্শ দিয়া হয়।
ন্যায়াধীশ মেহতাই ১৯৮৬ চনৰ ৮ আগষ্টত অধিবক্তা হিচাপে যোগদান কৰিছিল। ২০০৪ চনৰ পৰা ২০০৫ চনলৈ ৰাজস্থানৰ বাৰ কাউন্সিলৰ উপাধ্যক্ষ আৰু ২০১০ চনত অধ্যক্ষ হিচাপে কাৰ্যনিৰ্বাহ কৰিছিল ন্যায়াধীশ মেহতাই।
