Meghalaya denies permission for PM rally প্ৰধানমন্ত্ৰী নৰেন্দ্ৰ মোদীৰ মেঘালয় ভ্ৰমণৰ পূৰ্বে সৃষ্টি হৈছে এক বিতৰ্কৰ। প্ৰধানমন্ত্ৰী মোডীক ৰাজ্য চৰকাৰে পি এ চাংমা ষ্টেডিয়ামত এখন ৰাজহুৱা সভা অনুষ্ঠিত কৰাৰ অনুমতি দিয়া নাই। ক্ৰীড়া বিভাগে বিজেপিক জনাইছে যে ষ্টেডিয়ামৰ নিৰ্মাণ এতিয়াও চলি আছে। সেইকাৰণে তাত প্ৰধানমন্ত্ৰীৰ ৰাজহুৱা সভা আয়োজন কৰিব পৰা নাযাব। দক্ষিণ তুৰা বিধানসভা সমষ্টিত পিএ চাংমা ষ্টেডিয়ামত অৱস্থিত। সমষ্টিটো মুখ্যমন্ত্ৰী কনৰাড কে চাংমাৰ সমষ্টিৰ অন্তৰ্গত।
মেঘালয় চৰকাৰে অনুমতি নিদিয়াৰ পিছত নিৰ্বাচনমুখী ৰাজ্যখনত বিতৰ্কৰ সৃষ্টি হৈছে। ৰাজ্যিক বিজেপিয়ে অসন্তুষ্টি প্ৰকাশ কৰিছে। তেওঁলোকে কৈছে যে শাসনাধীষ্ঠ নেচনেল পিপলছ পাৰ্টি, তৃণমূল কংগ্ৰেছ আৰু অন্যান্য বিৰোধী ৰাজনৈতিক দলসমূহে ৰাজ্যখনত বিজেপিৰ উত্থান ৰুদ্ধ কৰিবলৈ চেষ্টা কৰি আছে। সেইকাৰণে তেওঁলোকে মোডীৰ ৰাজহুৱা সভাৰ অনুমতি দিব নিবিচাৰে।
উল্লেখ্য যে প্ৰধানমন্ত্ৰীয়ে অহা ২৪ ফেব্ৰুৱাৰীত মেঘালয় ভ্ৰমণ কৰাৰ কথা আছে। তেওঁ শ্বিলং আৰু তুৰা সমষ্টিত নিৰ্বাচনী প্ৰচাৰ চলোৱাৰ বাবে স্থান নিৰ্ধাৰণ কৰা হৈছিল।
জিলা নিৰ্বাচন আয়ুক্ত স্বপ্নিল টেম্বে জনায়, “ক্ৰীড়া বিভাগে কৈছে যে ষ্টেডিয়ামত ইমান ডাঙৰ সমাৱেশ আয়োজন কৰিব নোৱাৰি। কাৰণ নিৰ্মাণ এতিয়াও সম্পূৰ্ণ হোৱা নাই। ছাইটটোত বহুতো সামগ্ৰী ৰখা আছে। ৰাজহুৱা সভা হ’লে সেইবোৰ সুৰক্ষিত নহ’বও পাৰে। অৱশ্যে, আলোটগ্ৰে ক্ৰিকেট ষ্টেডিয়ামক এক বিকল্প স্থান হিচাপে বিবেচনা কৰা হৈছে।‘’
মেঘালয়ত ১২৭ কোটি টকা ব্যয়েৰে পি এ চাংমা ষ্টেডিয়াম নিৰ্মাণ কৰা হৈছে। ইয়াৰ ভিতৰত ৯০ শতাংশ ধন কেন্দ্ৰীয় চৰকাৰে প্ৰদান কৰিছে। যোৱা বছৰ ১৬ ডিচেম্বৰত প্ৰধানমন্ত্ৰী নৰেন্দ্ৰ মোদীয়ে ষ্টেডিয়ামখন উদ্বোধন কৰিছিল।
বিজেপিৰ ৰাষ্ট্ৰীয় মুখপাত্ৰ ৰিতুজা সিনহাই এই সন্দৰ্ভত প্ৰতিক্ৰিয়া ব্যক্ত কৰিছে। তেওঁ কয় যে উদ্বোধনৰ দুমাহ পিছত প্ৰধানমন্ত্ৰীৰ সমাৱেশৰ বাবে ষ্টেডিয়ামখন দিয়া হোৱা নাই। কোৱা হৈছে নিৰ্মাণ চলি আছে। কিন্তু এইটো কেনেকৈ সম্ভৱ? বিজেপি নেত্ৰীগৰাকীয়ে আশ্চৰ্য প্ৰকাশ কৰি কয় যে উদ্বোধনৰ পিছতো ষ্টেডিয়ামখন কেনেকৈ অসম্পূৰ্ণ আৰু উপলব্ধ নহয়।
তেওঁ প্ৰশ্ন কৰে যে ৰাজ্যখনৰ মুখ্যমন্ত্ৰী কানৰাড চাংমা আৰু তৃণমূল নেতা মুকুল চাংমাই বিজেপিক ভয় কৰিছে নেকি? তেওঁ লগতে কয় যে ৰাজ্য চৰকাৰে প্ৰধানমন্ত্ৰীৰ সমাৱেশ বন্ধ কৰিব পাৰে, কিন্তু ৰাজ্যখনৰ জনসাধাৰণে বিজেপিক ভোট দিবলৈ মন স্থিৰ কৰিছে।
ৰাজ্যিক বিজেপিৰ ফালৰ পৰা জানিবলৈ দিয়া হৈছে যে প্ৰধানমন্ত্ৰী মোডীয়ে ২৪ ফেব্ৰুৱাৰীত শ্বিলঙৰ পিন্থোৰুমখৰা সমষ্টিত এটা ৰোড শ্ব’ অনুষ্ঠিত কৰিব। কিন্তু তুৰাৰ সমাৱেশৰ কি হ’ব সেয়া বিজেপিৰ ৰাজ্যিক নেতৃত্বই এতিয়াও স্পষ্ট কৰিব পৰা নাই।
