কংগ্ৰেছ নেতা পৱন খেৰাক গ্ৰেপ্তাৰৰ নিৰ্দেশ দিছিল অসমৰ মুখ্যমন্ত্ৰী হিমন্ত বিশ্ব শৰ্মাই। নিজকে আনুগত্যশীল প্ৰমাণ কৰিবলৈ প্ৰচেষ্টা চলাইছে মুখ্যমন্ত্ৰী হিমন্ত বিশ্ব শৰ্মাই।— দিল্লী বিমানবন্দৰত অসম আৰক্ষীয়ে আজি কংগ্ৰেছ নেতা পৱন খেৰাক গ্ৰেপ্তাৰ কৰাৰ পিছতে হিমন্ত বিশ্ব শৰ্মাক এইদৰে তীব্ৰ সমালোচনা কৰিছে কংগ্ৰেছে।
খেৰাৰ গ্ৰেপ্তাৰৰ পিছতে তীব্ৰ প্ৰতিক্ৰিয়া প্ৰকাশ কৰি কংগ্ৰেছ নেতা ৰনদীপ সিং সুৰ্জেৱালাই মুখ্যমন্ত্ৰী হিমন্ত বিশ্ব শৰ্মাক আক্ৰমণ কৰি কয়, “হিমন্ত বিশ্ব শৰ্মাই নিজকে আনুগত্যশীল বুলি প্ৰমাণ কৰিবলৈ চেষ্টা কৰিছে।”
“পৱন খেৰাৰ বিৰুদ্ধে ভুৱা এফআইআৰ পঞ্জীয়ন কৰা হৈছে। তেওঁ কি অপৰাধ সংঘটিত কৰিলে? আমি সত্যৰ বাবে যুঁজিম। তেওঁলোকে আমাক নীৰৱ কৰিব নোৱাৰে। আমি ইয়াৰ বিৰুদ্ধে আইনগতভাৱে যুঁজ দিম।”- সুৰ্জেৱালাই কয়।
তেওঁ লগতে খাৰেক গ্ৰেপ্তাৰৰ বাবে আৰক্ষীয়ে ৱাৰেণ্ট দাখিল কৰা নাছিল আৰু আৰক্ষীক অসমৰ মুখ্যমন্ত্ৰী হিমন্ত বিশ্ব শৰ্মাই নিৰ্দেশ দিছিল বুলি দাবী কৰে। “হিমন্ত বিশ্ব শৰ্মা ঈশ্বৰ নেকি?” নেকি বুলিও কটাক্ষ কৰে সুৰ্জেৱালাই।
আনহাতে অসম প্ৰদেশ কংগ্ৰেছ কমিটীৰ সভাপতি ভূপেন বৰাই কংগ্ৰেছ নেতা পৱন খেৰাৰ ওপৰত আৰক্ষীৰ কাৰ্যকলাপৰ বাবেই সমগ্ৰ দেশতে অসমৰ সন্মান কমিছে বুলি মন্তব্য কৰিছে।
ইতিপূৰ্বে মুখ্যমন্ত্ৰী হিমন্ত বিশ্ব শৰ্মাই প্ৰধানমন্ত্ৰীৰ নাম আৰু পিতৃৰ নামক উপহাস কৰাৰ অভিযোগত কংগ্ৰেছৰ মুখপাত্ৰ খেৰাক তীব্ৰ সমালোচনা কৰিছিল। কংগ্ৰেছীসকলৰ এই ভয়ংকৰ মন্তব্যক দেশে ক্ষমা নকৰে বুলিও মন্তব্য হিমন্ত বিশ্ব শৰ্মাই।
উল্লেখ্য যে, শুকুৰবাৰৰ পৰা আৰম্ভ হ’বলগীয়া কংগ্ৰেছৰ পূৰ্ণাংগ অধিবেশনত অংশগ্ৰহণৰ বাবে আজি দিল্লী বিমানবন্দৰৰ পৰা বিমান যোগে ৰায়পুৰলৈ যাত্ৰা কৰিবলৈ সাজু হোৱাৰ সময়তে ইণ্ডিগ’ৰ বিমানৰ পৰা নমাই আনি খেৰাক গ্ৰেপ্তাৰ কৰিছিল আৰক্ষীয়ে।
অৱশ্যে গ্ৰেপ্তাৰ হোৱাৰ কেইঘণ্টামান পিছতে উচ্চতম ন্যায়ালয়ে ২৮ ফেব্ৰুৱাৰীলৈকে অন্তৱৰ্তীকালীন জামিন প্ৰদান কৰে কংগ্ৰেছ নেতাগৰাকীক। উচচতম ন্যায়ালয়ে লগতে দিল্লীৰ দ্বাৰকা আদালতে খেৰাক অন্তৱৰ্তীকালীন জামিন প্ৰদান কৰিব বুলি উল্লেখ কৰে।
ইফালে খেৰাৰ বিৰুদ্ধে একাধিক গোচৰ ৰুজু কৰা অসম আৰু উত্তৰ প্ৰদেশ চৰকাৰৰ পৰাও উত্তৰ বিচাৰিছে উচ্চতম ন্যায়ালয়ে। শুনানি গ্ৰহণ কৰি মুখ্য ন্যায়াধীশ চন্দ্ৰচূড়ে আবেদনকাৰী পৱন খেৰাই নি:চৰ্ত ক্ষমা বিচাৰিছে আৰু সেয়ে তেওঁক সুৰক্ষা প্ৰদান কৰা হৈছে বুলি উল্লেখ কৰিছিল।
