গুৱাহাটী উচ্চ ন্যায়ালয়ে ইয়াৰ অধীনস্থ আদালতৰ এগৰাকী মহিলা ন্যায়াধীশৰ অলংকাৰ সন্দৰ্ভত কৰা অৱমাননাসূচক মন্তব্য আৰু তেওঁক “পৌৰাণিক চৰিত্ৰ”ৰ এক অসুৰৰ সৈতে তুলনা কৰি অৱমাননা কৰাৰ বাবে এগৰাকী অধিবক্তাক দোষী সাব্যস্ত কৰিছে।
ছ্যু ম’টো গোচৰৰ শুনানি গ্ৰহণ কৰি ন্যায়াধীশ কল্যাণ ৰাই সুৰানা আৰু ন্যায়াধীশ দেৱাশীষ বৰুৱাৰ এখন খণ্ড বিচাৰপীঠে অধিবক্তা উৎপল গোস্বামীক ১০,০০০ টকাৰ ব্যক্তিগত বণ্ডত জামিন প্ৰদান কৰে।
উচ্চ ন্যায়ালয়ে ২০ মাৰ্চত পুনৰ বিষয়টোৰ শুনানি ল’ব আৰু যোৰহাটৰ দোষী সাব্যস্ত অধিবক্তাগৰাকীৰ বিৰুদ্ধে নিৰ্দিষ্ট শাস্তি নিৰ্দ্ধাৰণ কৰিব।
উচ্চ ন্যায়ালয়ে ইয়াৰ নিৰ্দেশত জনায় যে অধিবক্তা উৎপল গোস্বামীৰ বিৰুদ্ধে আদালত অৱমাননা আইন, ১৯৭১ৰ ধাৰা ১৪-ৰ অধীনত অপৰাধমূলক অৱমাননাৰ অভিযোগ উত্থাপন কৰা হৈছে।
ন্যায়ালয়ে মন্তব্য কৰে, “সংশ্লিষ্ট ন্যায়িক বিষয়াজনক অৱমাননামূলকভাৱে তুলি ধৰাৰ বাবে আন কেইবাটাও অভিযোগ উত্থাপন কৰা হৈছে আৰু (তেওঁ) আইনৰ বিষয়ে জানিও তেওঁক আক্ৰমণ কৰাৰ লগতে তেওঁক ভস্মাসুৰ হিচাপে জনাজাত পুৰাণ/মহাভাৰতৰ এক পৌৰাণিক চৰিত্ৰ সৈতে তুলনা কৰি বিভিন্ন ধৰণে তেওঁৰ ব্যক্তিত্বক অৱনমিত কৰিছে।”
নিৰ্দেশটোত লগতে কোৱা হৈছে যে অধিবক্তাজনে ১৭ জানুৱাৰীত দাখিল কৰা তেওঁৰ আত্মপক্ষ সমৰ্থনৰ শপতনামাত, “অভিযোগটোৰ বাবে দোষ স্বীকাৰ কৰিছে। তেওঁ বিশেষভাৱে স্বীকাৰ কৰিছে যে তেওঁ উপলব্ধি কৰিছে মানৱ সমাজত শান্তি, শৃংখলা, সম্প্ৰীতি আৰু সদ্ভাৱনা স্থাপনৰ দ্বাৰা যিকোনো আদালতৰ ন্যায়াধীশ আৰু দণ্ডাধীশৰ সন্মান সংৰক্ষণ আৰু সুৰক্ষিত কৰা উচিত।”
বিচাৰপীঠে ইয়াৰ নিৰ্দেশত উল্লেখ কৰিছে, “লগতে, তেওঁ স্বীকাৰ কৰিছে যে আইন আৰু ইয়াৰ অনুশীলনৰ পৰ্যাপ্ত জ্ঞানৰ অভাৱৰ বাবে তেওঁ অপৰাধটো কৰিছে আৰু সেয়েহে তেওঁ তেওঁৰ চৰ্তহীন ক্ষমা বিচাৰিছে কিয়নো এইটো তেওঁৰ প্ৰথম অপৰাধ আৰু তেওঁ আদালতক আশ্বাস দিছে যে তেওঁ ভৱিষ্যতে কেতিয়াও এনে ধৰণৰ আচৰণৰ পুনৰাবৃত্তি নকৰে।”
উচ্চ ন্যায়ালয়ৰ নিৰ্দেশটোত কোৱা হৈছে যে “আবেদনকাৰীয়ে এটা তীব্ৰ মন্তব্য কৰিছে যে প্ৰিজাইডিং বিষয়াই ৰেম্পত মডেলৰ দৰে অলংকাৰ পিন্ধি আদালতৰ সভাপতিত্ব কৰি আহিছে আৰু প্ৰতিটো অনুষ্ঠানতে তেওঁ অধিবক্তাসকলৰ কথা নুশুনাকৈ অপ্ৰয়োজনীয় গোচৰ, আইন আৰু আইনৰ ধাৰাৰ উদ্ধৃতি দি অধিবক্তাসকলক অতিক্ৰম/দমন কৰিবলৈ চেষ্টা কৰে আৰু আদালত কক্ষটো দমনমূলক আচৰণ কৰি নিয়ন্ত্ৰণ কৰিবলৈ চেষ্টা কৰে”।
