এগৰাকী বা দুগৰাকী নহয়, ৪০ গৰাকীকৈ পত্নীৰ গৰাকীৰ এজন ৰহস্যময় স্বামী তথ্য পোহৰলৈ আহিছে। এই তথ্য পোহৰলৈ অহাৰ লগে লগে সমগ্ৰ ৰাজ্যতে চাঞ্চল্যৰ সৃষ্টি হোৱাৰ লগতে চৰকাৰী বিষয়াসকল হতবাক হৈ পৰিছে।
সংবাদ মাধ্যমত প্ৰকাশিত বাতৰিৰ মতে ৪০ গৰাকী পত্নী থকা এই ৰহস্যময় স্বামীগৰাকী হৈছে বিহাৰৰ। ৪০ পত্নীৰ ৰহস্যময় স্বামী গৰাকীৰ নাম হৈছে ৰাপচান্দ। ৰহস্যময় স্বামীগৰাকী বিহাৰৰ আৰৱাল জিলাৰ এক যৌনপল্লীৰ।
চৰকাৰী বিষয়াসকলে প্ৰকাশ কৰা মতে বিহাৰৰ জাতিভিত্তিক লোকপিয়লৰ সময়ত এই ৰহস্যময় স্বামাগৰাকীৰ ৪০ গৰাকী পত্নী থকাৰ তথ্য পোহৰলৈ আহিছে। চৰকাৰী বিষয়াসকলৰ মতে ৪০ গৰাকী মহিলাই তেওঁলোকৰ স্বামী ৰূপচান্দৰ নাম নথিভুক্ত কৰোৱাইছে আৰু এই ৰূপচান্দ হৈছে এজন ৰহস্যময় ব্যক্তি।
মহিলাসকলৰ এই দাবীত আশ্বস্ত হ’ব নোৱাৰি চৰকাৰী বিষয়াসকলে তেওঁলোকৰ সন্তানসকলক পিতৃৰ নাম সোধে আৰু সন্তানসকলেও পিতৃৰ নাম ৰূপচান্দ বুলিয়েই প্ৰকাশ কৰে।
ইয়াৰ পাছতো চৰকাৰী বিষয়াসকলৰ বিশ্বাস নোহোৱাত মহিলাকেইগৰাকীৰ আধাৰ আৰু পান কাৰ্ড পৰীক্ষা কৰে আৰু তাতো তেওঁলোকৰ স্বামীৰ নাম ৰূপচান্দ বুলিয়েই লিপিৱদ্ধ আছে।
এতিয়া প্ৰশ্ন হৈছে কোন এই ৰহস্যময় স্বামী ৰূপচান্দ? ৪০ গৰাকীৰ স্বামী হোৱা এই ভাগ্যৱান ৰূপচান্দ আচলতে কোন আৰু ক’ত থাকে?
এই প্ৰশ্নৰ উত্তৰ বিচাৰি বিষয়াসকলে এক অভিযান চলায়। এই অভিযানত পোহৰলৈ আহে যে এই ৪০ গৰাকী মহিলাই যৌনপল্লীৰ ৭ নং ৱাৰ্ডত বসবাস কৰে আৰু তেওঁলোকৰ কোনো স্থায়ী কৰ্মস্থলী নাই, যৌন কৰ্মত লিপ্ত হৈয়ে জীৱন যাপন কৰি আহিছে।
বিষয়াসকলে প্ৰকাশ কৰা মতে যৌন কৰ্মীৰূপে কৰ্মৰত এই মহিলাসকলে আধাৰ আৰু পান কাৰ্ড বনোৱাৰ সময়ত তেওঁলোকে নিজেই স্বানীৰ নাম ৰূপচান্দ লিখাৰ সিদ্ধান্ত লয়।
৪০ গৰাকী মহিলাই স্বামীৰ নাম কিয় ৰূপচান্দ বুলি লিপিৱদ্ধ কৰোৱায়? এই ৰহস্যৰ সন্ধান কৰোতে বিষয়াসকলে অন্য এক ৰহস্যভেদ কৰে। মহিলাসকলে যৌনপল্লীটোত পইচা অৰ্থাৎ টকাক ‘ৰূপচান্দ’ বুলি কয়! টকা তেওঁলোকৰ বাবে আটাইতকৈ মূল্যৱান বস্তু, সেয়ে ৪০ গৰাকী মহিলাই আধাৰ আৰু পান কাৰ্ড উলিওৱাৰ সময়ত নিজৰ স্বামীৰ নাম টকাৰ নামেৰে ‘ৰূপচান্দ’ক ব্যৱহাৰ কৰিছিল।
