হাইজেক হৈছে জি-২০! বৈঠকৰ ল’গ’ত পদুম চিহ্ন ব্যৱহাৰ কৰি জি-২০ ক হাইজেক কৰিছে বিজেপিয়ে। এই দাবী কৰিছে জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফতিয়ে। অৱশ্যে তেওঁ লগতে জি-২০ বৈঠকক সমগ্ৰ দেশৰে বাবে এক অনুষ্ঠান বুলিও দোহাৰে।
আজিৰ পৰা জম্মু-কাশ্মীৰত আৰম্ভ হ’বলগীয়া জি-২০ বৈঠকৰ পূৰ্বে বিজেপিক সমালোচনা কৰি এই মন্তব্য কৰিছে প্ৰাক্তন মুখ্যমন্ত্ৰীগৰাকীয়ে। মুফতিয়ে লগতে জি-২০ বৈঠকৰ কোনো বিৰোধিতা কৰা নাই বুলি স্পষ্ট কৰি দিয়ে।
“মই কোনো কথাৰ বিৰোধিতা কৰা নাই। জি-২০ সমগ্ৰ দেশৰ বাবে এক অনুষ্ঠান যদিও বিজেপিয়ে এই অনুষ্ঠান হাইজেক কৰিছে। আনকি ল’গ’ৰ স্থানত পদুম সংলগ্ন কৰিছে। ল’গ’টো কোনো দলৰ সৈতে নহয়, দেশৰ সৈতে জড়িত হ’ব লাগিছিল।”- মুফতিয়ে কয়।
জম্মু-কাশ্মীৰৰ সমস্যাসমূহৰ ওপৰত আলোচনা আৰু সমাধানৰ বাবে ছাৰ্ক (SAARC)ৰ বৈঠক অনুষ্ঠিত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰিতেওঁ লগতে কয়, “মোৰ সমস্যা কাশ্মীৰত অনুষ্ঠিত হোৱা জি-২০ লৈ নহয়। মোৰ কথা হ’ল আমাৰ সমস্যাসমূহ অঞ্চলটোৰ ভিতৰতে আছে।”
নিজ মন্তব্যত মুফতিয়ে দেশৰ প্ৰাক্তন প্ৰধান মন্ত্ৰী অটল বিহাৰী বাজপেয়ীৰ প্ৰসঙ্গও উল্লেখ কৰে। দেশৰ সাৰ্বভৌমত্ব বা জম্মু-কাশ্মীৰৰ অখণ্ডতাৰ লগত আপোচ নকৰাকৈ বাজপেয়ীয়ে কাশ্মীৰ সমস্যা সমাধানৰ চেষ্টা কৰিছিল বুলি মুফতিয়ে মন্তব্য কৰে।
উল্লেখ্য যে, আজিৰ পৰা ২৪ মে’লৈ জম্মু-কাশ্মীৰত অনুষ্ঠিত হ’ব জি-২০ পৰ্যটন কৰ্মগোটৰ বৈঠক। বৈঠকৰ সময়ত সম্ভাৱ্য সন্ত্ৰাসবাদী আক্ৰমণৰ বিষয়ে চোৰাংচোৱা তথ্য লাভ কৰাৰ পিছতে শ্ৰীনগৰত নিৰাপত্তা অধিক শক্তিশালী কৰা হৈছে।
ভাৰতীয় নৌসেনাৰ নেশ্যনেল ছিকিউৰিটি গাৰ্ড (এন এছ জি) আৰু মেৰিন কমাণ্ডো (মাৰ্কোছ)ৰ কেইবাটাও ইউনিটৰ লগতে অন্যান্য অৰ্ধসামৰিক ইউনিট মোতায়েন কৰা হৈছে জম্মু-কাশ্মীৰত।
ইফালে জম্মু-কাশ্মীৰত ৩৭০ অনুচ্ছেদ পুনৰ কাৰ্যকৰী নোহোৱালৈকে তেওঁ কোনো বিধানসভা নিৰ্বাচনত অৱতীৰ্ণ নহয় বুলি মন্তব্য কৰে মুফতিয়ে। পিপলছ ডেম’ক্ৰেটিক পাৰ্টিৰ মুৰব্বী মুফতিৰ এই মন্তব্য স্বাভাৱিকতেই লক্ষণীয় হৈ পৰিছে।
