বৃহস্পতিবাৰে নতুন দিল্লীত ত্ৰিপুৰাৰ মুখ্য মন্ত্ৰী বিপ্লব কুমাৰ দেবে কেন্দ্ৰীয় বিত্ত মন্ত্ৰী অৰুণ জেটলীৰ লগত এখন গুৰুত্বপূৰ্ণ বৈঠকত মিলিত হয়। ত্ৰিপুৰাৰ বিভিন্ন বিত্তীয় সমস্যাৱলীৰ লগতে ৰাজ্যখনত সপ্তম দৰমহা আয়োগ কাৰ্যকৰী কৰা আদি বিষয় সম্পৰ্কে বৈঠকত বিতংভাৱে আলোচনা কৰা হয় বুলি এক সূত্ৰৰ পৰা জানিব পৰা যায়।
বৈঠকত মুখ্য মন্ত্ৰী দেবে ৰাজ্যখনৰ দুই লাখ চৰকাৰী কৰ্মচাৰী আৰু পেঞ্চনাৰক সপ্তম দৰমহা আয়োগৰ মতে দৰমহা দিবলৈ হ“লে অতিৰিক্ত ১১০০ কোটি টকাৰ প্ৰয়োজন বুলি বিত্ত মন্ত্ৰীগৰাকীৰ আগত সদৰী কৰে।
ত্ৰিপুৰাৰ মুখ্য মন্ত্ৰী বিপ্লব কুমাৰ দেবৰ সকলো অভাৱ অভিযোগ শুণাৰ পাছত কেন্দ্ৰীয় চৰকাৰখনে ৰাজ্যখনৰ বিধানসভা নিৰ্বাচনৰ পূৰ্বে ৰাজ্যিক কৰ্মচাৰীসকলক সপ্তম দৰমহা আয়োগৰ ভিত্তিত দৰমহা প্ৰদান কৰাৰ যি প্ৰতিশ্ৰুতি প্ৰদান কৰিছিল সেয়া অতি শীঘ্ৰে কাৰ্যকৰী কৰা হ’ব বুলি অৰুণ জেটলীয়ে আস্বাস প্ৰদান কৰে।
বিত্ত মন্ত্ৰী অৰুণ জেটলীক লগ কৰাৰ পূৰ্বে গৃহ মন্ত্ৰী ৰাজনাথ সিঙৰ ৰাজধানীস্থিত চৰকাৰী বাসভৱনত বিপ্লব কুমাৰ দেবৰ সৈতে কেন্দ্ৰীয় মন্ত্ৰীগৰাকীয়ে ৰাজ্যখনৰ সাম্প্ৰতিক পৰিস্থিতি তথা সীমান্ত অঞ্চলৰ নিৰাপত্তা সম্পৰ্কত আলোচনা কৰিবলৈ এখন গুৰুত্বপূৰ্ণ বৈঠক অনুষ্ঠিত হোৱা দেখা যায়।
এই বৈঠকৰ উপৰি ত্ৰিপুৰাৰ মুখ্য মন্ত্ৰীগৰাকীয়ে নেশ্যনেল বিল্ডিংছ কন্সট্ৰাকশ্যন কৰ্প’ৰেশ্যন লিমিটেডৰ অধ্যক্ষ তথা কাৰ্যবাহী সঞ্চালক অনুপ কুমাৰ মিট্টাল, তেল আৰু প্ৰাকৃতিক গেছ কমিশ্যনৰ মুখ্য কাৰ্যবাহী সঞ্চালক শশী শংকৰ আৰু চফ্টৱেৰ টেকন’লজী পাৰ্কৰ ড০ ওমপ্ৰকাশ ৰায়কো সাক্ষাত কৰে।
