বলীউডৰ ছুপাৰহিট চিনেমা ‘পিংক’ৰ কথা মনত আছেনে? যদি কোনো মহিলা ই যৌন সম্পৰ্ক স্থাপনত সন্মতি নিদিয়ে তেন্তে তেওঁৰ সৈতে জোৰকৈ যৌন সম্পৰ্ক স্থাপন কৰিব নোৱাৰি। মহিলাই যৌন সম্পৰ্ক স্থাপনত অনিচ্ছুক মানে অনিচ্ছুকেই, তেনে ক্ষেত্ৰত পুৰুষে কোনো কাৰণতে মাহিলাক জোৰদবৰদস্তি কৰিব নোৱাৰিব। এয়া আইসিদ্ধ কথা। বলিউদৰ ছবিখনে এই বাৰ্তাকে প্ৰেৰণ কৰিছে।
কিন্তু বাস্তৱত নাৰীৰ সেই অনিচ্ছা বা অসন্মতিক পুৰুষে কিমান সন্মান প্ৰদৰ্শন কৰে? এক কথাত অধিকাংশ পুৰুষেই মহিলাৰ অসন্মতিক সন্মান নকৰে।
তেনে এক জঘন্য পুৰুষতান্ত্ৰিক আচৰণৰ বাতৰিয়ে সংবাদ মাধ্যমত স্থান পাইছে। প্ৰকাশিত বাতৰিৰ মতে এগৰাকী যুৱতীয়ে যৌন সম্পৰ্ক স্থাপনত অনিচ্ছুক হোৱাৰ বাবেই প্ৰেমিকে অতি বৰ্বৰতাৰে শাৰীৰিকভাৱে আক্ৰমণ কৰে।
আৰক্ষীয়ে প্ৰকাশ কৰা ঘটনাৰ বিৱৰণীৰ মতে, আকাশ মুখোপাধ্যায় নামৰ এগৰাকী প্ৰেমিকে ৰাজহুৱা স্থানত প্ৰেমিকাক যৌন সম্পৰ্ক স্থাপনৰ প্ৰস্তাৱত দিছিল। কিন্তু প্ৰেমিকৰ সেই অদ্ভুত প্ৰস্তাৱত সন্মত নহ’ল প্ৰেমিকা। প্ৰেমিকাৰ এই অসন্মতিত ক্ৰোধান্বিত হৈ প্ৰেমিক আকাশে এটা শিলত প্ৰেমিকাৰ মূৰত প্ৰচণ্ড জোৰেৰে আঘাত কৰে। ইমানেই নহয় প্ৰেমিকাৰ দীঘল চুলি আজুৰি টানি মূৰটো শিলতে থেকেচা মাৰি দিয়ে। প্ৰেমিকৰ এনে পাশৱিক আক্ৰমণত গুৰুতৰভাৱে আহত হয় প্ৰেমিকাগৰাকী।
জানিব পৰা মতে, ২৮ বছৰীয়া আকাশ আৰু তেওঁৰ প্ৰেমিকা মুম্বাইস্থিত একেটা প্ৰতিষ্ঠানৰে কৰ্মচাৰী। একেটা প্ৰতিষ্ঠানতে একেলগে কাম কৰাৰ সূত্ৰে তেওঁলোকৰ মাজত প্ৰেমৰ সম্পৰ্ক গঢ়ি উঠে আৰু দুয়োৰে মাজৰ সম্পৰ্ক গভীৰ হৈ পৰে।
যোৱা বুধবাৰে মুম্বাইৰ কল্যাণ অঞ্চলৰ বাসিন্দা আকাশে প্ৰেয়সীৰ সৈতে গৈ ছত্ৰপতি শিৱাজী ৰে’ল ষ্টেচনত নামে। ইয়াৰ পিছত তেওঁলোকে ইণ্ডিয়া গেটৱেকে ধৰি বিভিন্ন স্থান পৰিদৰ্শন কৰে।
পিছত সন্ধিয়া তেওঁলোকে মুম্বাইৰ অতি জনপ্ৰিয় অঞ্চল বান্দ্ৰা বেণ্ডষ্টেণ্ডলৈ যায়। আকাশে সেই স্থানতে প্ৰেমিকাক যৌন সম্পৰ্ক স্থাপনৰ প্ৰস্তাৱ দিয়ে। কিন্তু ৰাজহুৱা স্থানত প্ৰেমিকে দিয়া এই প্ৰস্তাৱত সন্মতি নিদিলে প্ৰেমিকাই।
প্ৰেমিকাই অসন্মত হোৱাত ক্ৰোধান্বিত হৈ প্ৰেমিক আকাশে প্ৰথমে প্ৰেমিকাৰ ডিঙিত ধৰি আক্ৰমণ কৰি এটা শিলত প্ৰেমিকাৰ মূৰটোও থেতেলিয়াই দিয়ে। ইমানতে ক্ষান্ত নহৈ আকাশে প্ৰেমিকাৰ মূৰটো নৰ্দমাৰ পানীত ডুবাই হত্যা কৰিবলৈও উদ্যত হয়।
প্ৰেমিকৰ এনে পাশৱিক শাৰীৰিক আক্ৰমণত যুৱতীগৰাকীয়ে চিঞৰ বাখৰ কৰে আৰু যুৱতীগৰাকীৰ আৰ্তনাদ শুনি ওচৰ-চুবুৰীয়া মানুহবোৰ দৌৰি প্ৰেমিকৰ আক্ৰমণৰ পৰা ৰক্ষা কৰে। তেওঁলোকে লগে লগে আৰক্ষীক খবৰ দিয়ে আৰু আৰক্ষীয়ে আহি আহত যুৱতীগৰাকীক উদ্ধাৰ কৰি চিকিৎসালয়লৈ লৈ যায়।
আৰক্ষীয়ে প্ৰেমিক আকাশক গ্ৰেপ্তাৰ কৰিছেয়। তেওঁৰ বিৰুদ্ধে হত্যাৰ চেষ্টাৰ গোচৰ ৰুজু কৰা হৈছে বুলি আৰক্ষীয়ে প্ৰকাশ কৰিছে।
