দীৰ্ঘদিন ধৰি ভাৰতীয় মল্লযুঁজ ফেডাৰেচনৰ সভাপতি ব্রিজ ভূষণ চৰণ সিঙৰ বিৰুদ্ধে যৌন নিৰ্যাতনৰ অভিযোগ তুলি প্ৰতিবাদ সাব্যস্ত কৰি অহা ভাৰতৰ তাৰকা মল্লযুঁজাৰুসকলৰ সমৰ্থনত আজি গুৱাহাটীৰ দীঘলীপুখুৰীৰ পাৰত এক শান্তিপূৰ্ণ প্ৰতিবাদ সাব্যস্ত কৰে ৰাইজৰ দলে।
দেশৰ ৰাজধানী দিল্লীত অলিম্পিয়ান মল্লযুঁজাৰু সকলে চলাই থকা প্ৰতিবাদ আৰু তেওঁলোকৰ ওপৰত পুলিচী নিৰ্যাতনৰ বিৰোধিতা কৰি ৰাইজৰ দলে এই শান্তিপূৰ্ণ প্ৰতিবাদ সাব্যস্ত কৰে। ৰাইজৰ দলৰ এই শান্তিপূৰ্ণ অনুষ্ঠানত শতাধিক কৰ্মীয়ে ম’মবাতি জ্বলাই মল্লযুঁজাৰুৰ দাবীৰ প্ৰতি পূৰ্ণ সমৰ্থন আগবঢ়ায়।
দলটোৰ এই শান্তিপূৰ্ণ প্ৰতিবাদত উপস্থিত থাকে ৰাইজৰ দলৰ সভাপতি তথা শিৱসাগৰ সমষ্টিৰ বিধায়ক অখিল গগৈ, ৰাইজৰ দলৰ উপদেষ্টা তথা প্ৰাক্তন আৰক্ষী সঞ্চালক প্ৰধান বিশেষ শাখা দিলীপ বৰা, ৰাইজৰ দলৰ উপদেষ্টা তথা বিশিষ্ট নাৰী অধিকাৰ কৰ্মী সুমিত্ৰা হাজৰিকা।
লগতে গুৱাহাটী বিশ্ববিদ্যালয়ৰ প্ৰাক্তন অধ্যাপক দ্বিপেন বেজবৰুৱা, শৰৎ ফুকন, বিশিষ্ট লেখক আৰু অধিবক্তা কিশোৰ কুমাৰ কলিতা আৰু ৰাইজৰ কেন্দ্ৰীয় সমিতিৰ কাৰ্যকৰী সভাপতি ভাস্ক’ ডি শইকীয়া, সাধাৰণ সম্পাদক ৰাছেল হুছেইন আৰু অলক নাথৰ লগতে অন্যান্য নেতা কৰ্মীয়ে এই প্ৰতিবাদত যোগদান কৰে।
এই প্ৰতিবাদী কাৰ্যসূচীৰ লগতে ৰাইজৰ দলে শুকুৰবাৰে সন্ধিয়া উৰিষ্যাৰ বালাচোৰত সংঘটিত হোৱা ৰে’ল দুৰ্ঘটনাত নিহত হোৱা লোকসকলৰ প্ৰতি এক মিনিট মৌনতা অৱলম্বনেৰে শ্ৰদ্ধাঞ্জলি জ্ঞাপন কৰে।
আজি দীঘলীপুখুৰীৰ পাৰত অনুষ্ঠিত হোৱা শান্তিপূৰ্ণ প্ৰতিবাদত নিজৰ মন্তব্য ৰাখি ৰাইজৰ দলৰ সভাপতি অখিল গগৈয়ে কয় যে বিজেপি চৰকাৰে নাৰী নিৰ্যাতনকাৰীক ৰক্ষণাবেক্ষণ দিয়াই নহয় দেশৰ আইন ব্যৱস্থা ভৰিৰে মোহাৰি পেলাইছে।
মল্লযুঁ34জাৰু সকলৰ প্ৰতিবাদ বিজেপিৰ দিনত হোৱা তিনিটা ঐতিহাসিক প্ৰতিবাদৰ এটা বুলি মন্তব্য কৰি অখিল গগৈয়ে কয় যে জনতাৰ ক্ষোভৰ জুইয়ে এদিন বিজেপি চৰকাৰক দহিব।
মল্লযুঁজাৰু সকলৰ প্ৰতিবাদলৈ সমৰ্থন আগবঢ়োৱাৰ উদ্দেশ্যে দিল্লীলৈ ৰাইজৰ দলৰ এটা প্ৰতিনিধি দল প্ৰেৰrrণ কৰিব বুলিও ৰাইজৰ দলৰ সভাপতি গৰাকীয়ে মন্তব্য কৰে।
