উত্তৰ প্ৰদেশৰ লখিমপুৰ জিলাৰ খেৰীত সংঘটিত হোৱা কৃষক হত্যাকাণ্ডই জোকাৰি গৈছিল সমগ্ৰ দেশ। কেন্দ্ৰীয় মন্ত্ৰী অজয় মিশ্ৰৰ পুত্ৰ আশীষ মিশ্ৰই বাহনেৰে মহতিয়াই চাৰিগৰাকীকৈ কৃষকক হত্যা কৰাৰ অভিযোগ উত্থাপন হৈছিল। এইবাৰ এনে ঘটনাৰ পুনৰাবৃত্তি ঘটিছে যোগী ৰাজ্যৰে কাণপুৰত।
উত্তৰ প্ৰদেশৰে কাণপুৰত পি ডব্লিউ ডি বিভাগৰ এখন বাহনে তিনিগৰাকী কৃষকক মহতিয়াই হত্যা কৰাৰ অভিযোগ উত্থাপন হৈছে। প্ৰাথমিক তদন্ত অনুসৰি সেই সময়ত গাড়ীখনত আছিল এগৰাকী কনিষ্ঠ অভিযন্তা। অৱশ্যে গাড়ীখন চলাইছিল তেওঁৰ গাড়ী চালক অজিতকুমাৰ পাণ্ডেই।
গাড়ীখন চলোৱাৰ সময়ত চালক পাণ্ডেই মদ্যপান কৰা বুলি জানিব পৰা গৈছে। প্ৰকাশিত খবৰ অনুসৰি, কাণপুৰৰ চিকন্দৰাত অভিযন্তাৰ পৰিয়ালক নমাই অযোধ্যা অভিমুখে গৈ আছিল গাড়ীখন। সেই সময়ত পথাৰৰ কাষত ৰাস্তাত থিয় হৈ আছিল তিনিগৰাকী বৰ্ষীয়ান খেতিয়ক।
তেনে মুহূৰ্ততে গাড়ীখনে খেতিয়ক তিনিগৰাকীক মহতিয়াই নিয়ে। ইয়াৰ পৰিণতিত থিতাতে নিহত হয় সুৰেন্দ্ৰ সিং, অহিব্ৰন সিং আৰু ঘাসী যাদৱ নামৰ তিনিওগৰাকী কৃষকৰ। ইফালে ঘটনাৰ পাছতে বাহনখন ঘটনাস্থলীতে থৈ পলায়ন কৰে চালকগৰাকীয়ে। পিছত অৱশ্যে চালকগৰাকীক গ্ৰেপ্তাৰ কৰে আৰক্ষীয়ে।
আৰক্ষীৰ সূত্ৰ অনুসৰি ইতিমধ্যে ঘটনা সন্দৰ্ভত এফআইআৰ দাখিল কৰি গোচৰ ৰুজু কৰা হৈছে। আৰক্ষীয়ে ঘটনাৰ সময়ত চালক পাণ্ডেই মদ্যপান কৰি আছিল বুলি সন্দেহ প্ৰকাশ কৰিছে।
