ৰাইজৰ মাজলৈ আহি আছে জয়ন্ত নাথৰ পৰিচালনাত নিৰ্মিত ছবি ‘ওৱাইড এংগল’। ছবিখনৰ কাহিনী ড° নগেন শইকীয়াৰ এটি বহুচৰ্চিত গল্পৰ আধাৰত ৰচনা কৰা হৈছে ৷
অসমৰ অস্তিত্ব ৰক্ষা আন্দোলনৰ সময়ৰ এজন সৎ নিষ্ঠাবান ফটো সাংবাদিকৰ জীৱন সংগ্ৰামৰ কাহিনীক মূল বিষয়বস্তু হিচাপে লৈ গল্পটো ৰচনা কৰা হৈছিল৷
বিশিষ্ট নাট্যকাৰ পংকজজ্যোতি ভূঞাই উক্ত গল্পটোৰ আধাৰত চিত্ৰনাট্য ৰচনা কৰিছে৷ পৰিচালকে জানিবলৈ দিয়া মতে, গল্পটোৰ লগত কিছু চৰিত্ৰ তথা উপকাহিনী সংযোগ ঘটোৱা হৈছে৷
ছবিখনৰ প্ৰযোজনাৰ দায়িত্বত আছে যুৱ প্ৰযোজক দেৱজ্যোতি বৰা ৷ ইতিমধ্যেই ছবিখনৰ শ্বুটিং সমাপ্ত হৈছে।
পৰিচালক জয়ন্ত নাথে ছবিখন নিৰ্মাণ কৰাৰ সম্পৰ্কে কয়, “১৯৮৩ চনৰ কাহিনী চিত্ৰৰূপ দিওতে কিছু কষ্ট হল ৷ সেই সময়ৰ সাজসজ্জা , বেশভূষাকে ধৰি সকলো দিশ চাবলগা হৈছে ৷ অসম আন্দোলনৰ বিভিন্ন কাৰ্যসূচী চিত্ৰায়ন কৰিবলৈ চেষ্টা কৰা হৈছে ৷ এই সমুহ নিখুঁতকৈ দেখুৱাবলৈ সকলোৱে বহু কষ্ট কৰাবলগীয়া হৈছে ৷ এজন সৎ সাংবাদিকৰ সহজ সৰল সংঘাতেৰে ভৰা জীৱন লগতে অসমৰ সমসাময়িক ঘটনা সমুহ ডাঙি ধৰাই ছবিখন নিৰ্মানৰ মুল উদ্দেশ্য ৷”
উল্লেখ্য যে, ছবিখনৰ প্ৰযোজনা দেবজ্যোতি বৰাৰ ৷ সহ প্ৰযোজক অৰিনী গগৈ বৰা। কাহিনী ড° নগেন শইকীয়াৰ , চিত্ৰনাট্য পংকজজ্যোতি ভূঞাৰ , পৰিচালনা আৰু সংগীত জয়ন্ত নাথৰ , কেমেৰাত আছে সুমন দুৱৰা ।
ৰূপসজ্জাৰ দায়িত্বত আছে বিশ্ব কলিতা , দৃশ্যসজ্জা বিচিত্ৰ বৰা আৰু মানস বৰঠাকুৰৰ , সাজসজ্জা জুৰিৰানী নাথৰ , সম্পাদনা দেবজিত দত্তৰ। ছবিখনৰ মুখ্য সহকাৰী পৰিচালক দিপক নাথ , সহকাৰী পৰিচালক চিন্ময় দত্ত , দেবব্ৰত শইকীয়া আৰু আকাশজ্যোতি নাথ ৷
সহকাৰী কেমেৰামেন অতুল স্বৰ্গীয়াৰী আৰু মিন্টু বৰ্মন ৷ শব্দগ্ৰহন ৰাজতিলক ডেকাৰ ৷ প্ৰযোজনা নিয়ন্ত্ৰক মিন্টু বৰা আৰু পাৰ্থ বৰঠাকুৰ ৷
জানিব পৰা মতে ছবিখনত অভিনয় কৰিছে তপন দাস , অপৰ্না দত্ত চৌধুৰী , পবিত্ৰ বৰুৱা , জলি লস্কৰ , জুবিন গাৰ্গ , জেতবন বৰুৱা , মুক্তাৰুল হুছেইন , ৰূপকুমাৰ বৰা দীপাংকৰ ৰয় , ধ্যানী মহন , ৰাজীব গোস্বামী , গীতাৱলী ৰাজকুমাৰীকে ধৰি কেইবাজনো ন-পুৰণি অভিনেতা-অভিনেত্ৰীয়ে ৷
