চিজেপি নেতা সৌৰভ দাসৰ হোৱাটছএপ একাউণ্ট নিষিদ্ধ; মেটাৰ বিৰুদ্ধে সৰৱ হ’ব নেকি ককৰোচ?

পুনৰ বিপদত পৰিছে ককৰোচ জনতা পাৰ্টিৰ নেতা সৌৰভ দাস। এইবাৰ ককৰোচৰ নেতাগৰাকীয়ে তেওঁৰ হোৱাটছএপ একাউণ্টত নিয়ন্ত্ৰণ বা ব্লক কৰা বুলি অভিযোগ উত্থাপন কৰিছে। আনকি চিজেপি নেতা অভিজিৎ দীপকে সৰৱ হৈছে।

খবৰ অনুসৰি সৌৰভে হোৱাটছএপত কোনো ধৰণৰ মেছেজ প্ৰেৰণ কৰিবলৈ সক্ষম হোৱা নাই। আনকি যোৱা এসপ্তাহৰ ভিতৰত এয়া দ্বিতীয়টো কাণ্ড, য’ত তেওঁৰ হোৱাটছএপ একাউণ্ট ব্লক কৰাৰ দাবী উত্থাপন হৈছে।

নিজৰ এক্স হেণ্ডেলত ক্ষোভ প্ৰকাশ কৰি সৌৰভ দাসে লিখিছে যে তেওঁৰ হোৱাটছএপ একাউণ্টত বাধা আৰোপ কৰা হৈছে আৰু তেওঁ কোনো নতুন মেছেজ পঠিয়াব পৰা নাই। আনকি সৌৰভ আৰু অভিজিতে পোনপটীয়াকৈ হোৱাটছএপক টেগ কৰি প্ৰশ্ন উত্থাপন কৰে “হোৱাটছএপ- আচলতে কি হৈছে?”

উল্লেখ্য যে ইয়াৰ পূৰ্বে ২২ অক্টোবৰত তেওঁৰ হোৱাটছএপ একাউণ্ট ব্লক হোৱাৰ খবৰ পোহৰলৈ আহিছিল। তেওঁ মেছেজিং প্লেটফৰ্ম মেটাৰ বিৰুদ্ধেও ক্ষোভ প্ৰকাশ কৰি জানিব বিচাৰিছিল যে কাৰ নিৰ্দেশত এই ব্যৱস্থা গ্ৰহণ কৰা হৈছে, আৰু তেওঁৰ একাউণ্ট কিয় ব্লক কৰা হৈছে?

ইয়াৰ সমান্তৰালকৈ চিজেপিৰ অফিচিয়েল এক্স হেণ্ডেলত ককৰোচ জনতা পাৰ্টিৰ তৰফৰ পৰাও একেটা প্ৰশ্ন উত্থাপন কৰি ৰাজনৈতিক উদ্দেশ্যত তেওঁলোকৰ একাউণ্ট নিষিদ্ধ কৰা হৈছে নেকি বুলি প্ৰশ্ন কৰে।

কিন্তু ৰাজনৈতিক বিশেষজ্ঞৰ মতে এই ঘটনাৰ আঁৰত এটা ৰাজনৈতিক চক্ৰ আছে। ভোটাৰ তালিকাৰ এছ আই আৰ বা বিশেষ নিবিড় পুনৰীক্ষণ প্ৰক্ৰিয়াৰ সময়ত ভোটাৰৰ নাম বাদ পৰাৰ অভিযোগ উত্থাপন কৰি মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত চিজেপিয়ে আন্দোলন অব্যাহত ৰাখিছে। আৰু সেই আন্দোলনত আগভাগ লৈছে সৌৰভ দাস আৰু আশুতোষ ৰাংকাৰ দল।

ইফালে ১৩ অক্টোবৰত দিল্লীৰ যন্তৰ মন্তৰ অঞ্চলত বলপূৰ্বকভাৱে প্ৰৱেশ কৰাৰ অভিযোগত আৰক্ষীয়ে তেওঁলোকক গ্ৰেপ্তাৰ কৰে। আনকি তেওঁলোকক ৭ দিনৰ ন্যায়িক জিম্মালৈ প্ৰেৰণ কৰা হয়।

My WhatsApp account has been restricted and I’m unable to send any new messages.

@WhatsApp what’s happening?

— Saurav Das (@SauravDassss) October 25, 2026

অৱশ্যে কাৰাগাৰৰ পৰা মুক্তি পোৱাৰ পিছত ইটোৰ পিছত সিটো বিপৰ্যয়ৰ সন্মুখীন হৈছে এইগৰাকী চিজেপি নেতা। ইয়াৰ পূৰ্বে সৌৰভৰ ঘৰৰ নথি-পত্ৰ সন্দৰ্ভত প্ৰমাণ বিচৰা হৈছিল।