আমেৰিকাৰ ৰাষ্ট্ৰপতি জো বাইডেনে তিনিখন দেশৰ ভ্ৰমণৰ আৰম্ভণি কৰি দেওবাৰে সন্ধিয়া লণ্ডনত উপস্থিত হয়। তেওঁ সোমবাৰে ব্ৰিটেইনৰ প্ৰধানমন্ত্ৰী ঋষি সুনকৰ সৈতে বৈঠকত বহাৰ লগতে উইণ্ডচৰ কেছলত ৰজা চাৰ্লছৰ সৈতে জলবায়ু পৰিৱৰ্তনৰ বিষয়ত আলোচনা কৰিব।
হোৱাইট হাউছে জনাইছে যে এই ভ্ৰমণ “আমাৰ ৰাষ্ট্ৰসমূহৰ মাজত ঘনিষ্ঠ সম্পৰ্ক আৰু অধিক শক্তিশালী কৰাৰ বাবে” কৰা হৈছে।
দেওবাৰে সন্ধিয়া লণ্ডনৰ উত্তৰ-পূব ষ্টেনষ্টেড বিমানবন্দৰলৈ উৰা মাৰি অহা ৰাষ্ট্ৰপতিগৰাকীয়ে সোমবাৰে ডাউনিং ষ্ট্ৰীটলৈ গৈ সুনাকৰ সৈতে অনুষ্টুপীয়া বৈঠকত বহিব। কেইমাহ মানৰ ভিতৰত এইখন হ’ব তেওঁলোকৰ পঞ্চমখন বৈঠক। সুনাকৰ মুখপাত্ৰই কয় যে আলোচনাত আগন্তুক নাটো শীৰ্ষ সন্মিলন আৰু ইউক্ৰেইন বিষয় ঠাই পোৱাৰ সম্ভাৱনা আছে।
নিজৰ কাৰ্যালয়ৰ পৰা প্ৰকাশ কৰা এক বিবৃতিত সুনাকে কয় যে আমি আমাৰ অৱস্থান আৰু অৰ্থনৈতিক সুৰক্ষাৰ প্ৰতি নতুন আৰু অভূতপূৰ্ব প্ৰত্যাহ্বানৰ সন্মুখীন হোৱাৰ লগে লগে আমাৰ মিত্ৰতাসমূহ পূৰ্বতকৈ অধিক গুৰুত্বপূৰ্ণ হৈ পৰিছে।
সুনাকে কয় যে ব্ৰিটেইন ইউৰোপৰ নাটোৰ আগশাৰীৰ মিত্ৰ, আমি আমেৰিকাৰ আটাইতকৈ গুৰুত্বপূৰ্ণ বাণিজ্য, প্ৰতিৰক্ষা আৰু কূটনৈতিক অংশীদাৰ, আৰু আমি ইউক্ৰেইনক যুদ্ধক্ষেত্ৰত সফল হ’বলৈ প্ৰয়োজনীয় সহায় আগবঢ়োৱাৰ ক্ষেত্ৰত আগৰণুৱা।
ইউৰোপীয় সংঘৰ সৈতে ব্রেক্সিটৰ পিছৰ চুক্তি আৰু ৰিপাব্লিকান দলৰ প্রাক্তন ৰাষ্ট্ৰপতি ড’নাল্ড ট্ৰাম্পৰ সৈতে জনছনৰ ঘনিষ্ঠ সম্পৰ্কক লৈ তেওঁৰ পূৰ্বসূৰী বৰিছ জনছন আৰু লিজ ট্ৰাছৰ অধীনত সম্পৰ্ক শিথিল হোৱাৰ পিছত সুনাকে বাইডেনৰ সৈতে সম্পৰ্ক মেৰামতিৰ ক্ষেত্ৰত কিছু আগবাঢ়িছে।
বাইডেনৰ বাবে এই ভ্ৰমণৰ অধিক গুৰুত্বপূৰ্ণ অংশ হ’ব লণ্ডনৰ পশ্চিমে অৱস্থিত উইণ্ডচৰ কেছলত ৰজা চাৰ্লছৰ সৈতে তেওঁৰ সাক্ষাৎ, য’ত ২০১৬ চনত ৰজাৰ প্ৰয়াত মাতৃ ৰাণী এলিজাবেথে ডেম’ক্ৰেটিক দলৰ ৰাষ্ট্ৰপতি বাৰাক ওবামা আৰু ২০১৮ চনত ট্ৰাম্পে আতিথ্য প্ৰদান কৰিছিল। ২০২১ চনত বাইডেনেও উইণ্ডচৰত ৰাণী এলিজাবেথক চাহ মেলত লগ পাইছিল।
বাতৰি অনুসৰি, ৰাষ্ট্ৰপতি বাইডেন আৰু ৰজা চাৰ্লছে জলবায়ুৰ বিষয়ত আলোচনা কৰিব। উল্লেখ্য এই বিষয়ৰ ওপৰত ৭৪ বছৰীয়া চাৰ্লছে পাঁচ দশকৰো অধিক সময় ধৰি প্ৰচাৰ চলাই আহিছে আৰু মাত মাতি আহিছে।
যোৱা বছৰ ৰাণী এলিজাবেথৰ অন্ত্যেষ্টিক্ৰিয়াৰ বাবে ভ্ৰমণৰ সময়ত বাইডেনে চাৰ্লছক লগ পাইছিল যদিও আমেৰিকাৰ ৰাষ্ট্ৰপতিসকলৰ দীৰ্ঘদিনীয়া প্ৰথা অনুসৰি মে’ মাহত ৰজাৰ ৰাজ অভিষেকত অংশগ্ৰহণ কৰা নাছিল।
আমেৰিকাৰ বিশেষ জলবায়ু বিষয়ক দূত জন কেৰীয়ে বিবিচিক জনোৱা মতে, সোমবাৰে ব্ৰিটিছ শক্তি মন্ত্ৰী গ্ৰাণ্ট শ্বেপছৰ সৈতে আয়োজন কৰিবলগীয়া জলবায়ু বিত্ত সন্মিলনৰ বিষয়ে ৰজা চাৰ্লছ আৰু বাইডেনক অৱগত কৰিবলৈ তেওঁক আমন্ত্ৰণ জনোৱা হৈছে।
এই বৈঠকৰ পিছত বাইডেন আৰু সুনাকে ব্ৰিটেইন এৰি লিথুৱেনিয়ালৈ ৰাওনা হ’ব য’ত নাটোৰ নেতাসকলে এক গুৰুত্বপূৰ্ণ শীৰ্ষ সন্মিলনৰ বাবে একত্ৰিত হ’ব। ইয়াৰ পিছত বাইডেনে নৰ্ডিক নেতাসকলৰ সৈতে বৈঠকৰ বাবে হেলচিংকিলৈ যাত্ৰা কৰাৰ সম্ভাৱনা আছে।
