অৱশেষত কংগ্ৰেছ আৰু আম আদমি পাৰ্টিৰ মাজৰ নিমিলা ৰাজনৈতিক অংকৰ সমাধান হৈছে। দুয়ো দলৰ মাজত চলি থকা মতানৈক্যৰ ওৰ পৰিছে। দেশৰ সৰ্ববৃহৎ বিৰোধী দলটোৱে কেন্দ্ৰীয় চৰকাৰে দিল্লী প্ৰশাসনীয় ক্ষমতা হস্তগত কৰাৰ অৰ্থে গৃহীত কৰিব খোজা অধ্যাদেশখন সংসদত বিৰোধিতা কৰিবলৈ সন্মত হোৱাৰ পাছতে অৰবিন্দ কেজৰিৱালৰ বৰফ গলিবলৈ ধৰিছে।
বিৰোধী ঐক্যৰ বাংগালুৰুত অনুষ্ঠিত হ’বলগীয়া দ্বিতীয়খন বৈঠকৰ পূৰ্বে দুই বিৰোধী দলৰ বৰফ গলিবলৈ ধৰাৰ লগে লগে বিৰোধী শিবিৰ উৎফুল্লিত হৈ পৰা দেখা গৈছে। ইফালে কংগ্ৰেছ-আপৰ সমীকৰণ সঠিক পথত গতি কৰাটো শাসকীয় বিজেপিৰ বাবে শংকাৰ কাৰণ হৈ পৰাৰ সম্ভাৱনা আছে।
সোমবাৰৰ দ্বিতীয়খন বৈঠকৰ পূৰ্বে কংগ্ৰেছ-আপৰ মাজত মতানৈক্য দূৰ হোৱাৰ পাছতে বিৰোধী মিত্ৰজোঁটে ২০২৪ চনৰ সাধাৰণ নিৰ্বাচনৰ বাবে এক উমৈহতীয়া ন্যূনতম কাৰ্যসূচী আৰু যোগাযোগ খচৰা প্ৰস্তুতৰ বাবে এখন উপসমিতি গঠনৰ প্ৰস্তাৱ দিয়া হৈছে বুলি এক সূত্ৰই প্ৰকাশ কৰিছে। সোমবাৰৰ বৈঠকত বিৰোধী দলৰ নেতাসকলে মিত্ৰজোঁটৰ এটা নাম দিয়াৰো পৰিকল্পনাও কৰিছে।
কেইবাদিনো আলোচনাৰ অন্তত কালি আম আদমী পাৰ্টিয়ে ঘোষণা কৰে যে তেওঁলোকেও এই বৈঠকত অংশগ্ৰহণ কৰিব।
দিল্লীৰ আমোলাতন্ত্ৰৰ ওপৰত নিয়ন্ত্ৰণ ঘূৰাই অনা বিতৰ্কিত কেন্দ্ৰীয় অধ্যাদেশৰ বিৰুদ্ধে দলটোক কংগ্ৰেছে সমৰ্থন দিব বুলি কোৱাৰ মাত্ৰ কেইঘণ্টামানৰ পিছতে আপে এই ঘোষণা কৰে।
“কংগ্ৰেছ দলে দিল্লী অধ্যাদেশৰ বিৰুদ্ধে নিজৰ স্থিতি ব্যক্ত কৰিলে। আমি এই ঘোষণাক আদৰণি জনাইছো। ইয়াৰ সমান্তৰালভাৱে বাংগালুৰুত অনুষ্ঠিত হ’বলগীয়া বিৰোধী বৈঠকত আপে অংশগ্ৰহণ কৰিব।”
উল্লেখ্য যে ১৫ টা বিৰোধী দলৰ শীৰ্ষ নেতাসকলে বিহাৰৰ মুখ্যমন্ত্ৰী নীতিশ কুমাৰে ২৩ জুনত পাটনাত আয়োজন কৰা বিৰোধী ঐক্যৰ বৈঠকত অংশগ্ৰহণ কৰিছিল।
প্ৰথমখন আনুষ্ঠানিক বৈঠকৰ পাছতে আজি দ্বিতীয়খন বৈঠকত অংশগ্ৰহণ কৰিব বিৰোধী দলবোৰে। বিৰোধী শিবিৰে ২০ জুলাইৰ পৰা সংসদৰ বৰ্ষাকালীন অধিৱেশন আৰম্ভ হোৱাৰ পূৰ্বে প্ৰায় ৩০টা বিৰোধী দলে মিত্ৰজোঁটৰ প্ৰতি সমৰ্থন প্ৰকাশ কৰিব বুলি আশা কৰিছে।
