আপুনি কেতিয়াবা শুনিছেনে যে কাৰোবাৰ জন্ম তাৰিখ ৩০ ফেব্ৰুৱাৰী? অথবা কেলেণ্ডাৰত দেখিছেনে ৩০ ফেব্ৰুৱাৰী তাৰিখটো?
শুনিবলৈ আচহুৱা হ’লেও, কিন্তু বিহাৰৰ এখন চৰকাৰী বিদ্যালয়ে সংঘটিত কৰিছে এনে এক অদ্ভুত ঘটনা। জামুইৰ এখন চৰকাৰী বিদ্যালয়ত সংঘটিত হৈছে এই ঘটনা। ইয়াত এজন ছাত্ৰই বদলিৰ প্ৰমাণ পত্ৰৰ বাবে বিদ্যালয় কৰ্তৃপক্ষৰ ওচৰত আবেদন কৰে।
ছাত্ৰ জনৰ বদলিৰ প্ৰমাণ পত্ৰত ছাত্ৰজনৰ জন্ম তাৰিখটো কৰ্তৃপক্ষই ৩০ ফেব্ৰুৱাৰী ২০০৯ বুলি লিখিছে। বিষয়টো পোহৰলৈ অহাৰ লগে লগে পুনৰ প্ৰশ্নৰ আওতালৈ আহিল শিক্ষা বিভাগ।
কেৱল সেয়াই নহয়, বিদ্যালয় কৰ্তৃপক্ষৰ এই ভুলে সেই ছাত্ৰজনৰ জীৱনত সমস্যাৰ সৃষ্টি কৰিছে। সূত্ৰৰ পৰা জানিব পৰা মতে, বদলিৰ প্ৰমাণ পত্ৰখনত থকা ভুল জন্ম তাৰিখৰ বাবেই ছাত্ৰজনে আন কোনো ঠাইত নামভৰ্তি কৰিব পৰা নাই।
ছাত্ৰজনৰ নাম অমন কুমাৰ। অষ্টম মান পাছ কৰি বিদ্যালয় এৰি যোৱাৰ পৰিকল্পনা কৰিছিল তেওঁ। সেইবাবেই তেওঁ বিদ্যালয়ত বদলিৰ পত্ৰ আবেদন কৰিছিল।
প্ৰমাণ পত্ৰখনত ‘৩০ ফেব্ৰুৱাৰী, ২০০৯’ তাৰিখ দেখি বিচলিত হৈ পৰিছে অমন কুমাৰৰ পৰিয়াল। ছাত্ৰ অমনৰ পিতৃ ৰাজেশ যাদৱে কয় যে নৱম শ্ৰেণীত নামভৰ্তিৰ অন্তিম তাৰিখ আছিল ১৪ জুলাই। শিশুৰ জন্ম তাৰিখৰ অমিলৰ বাবে এইবাৰ নৱম শ্ৰেণীত নামভৰ্তি লাভ কৰিব নোৱাৰিলে অমনে।
এই সন্দৰ্ভত ৰাজেশ যাদৱে লগতে কয় যে মই যেতিয়া মোৰ ল’ৰাক ভৰ্তি কৰিবলৈ স্থানীয় হাইস্কুল এখনত গৈছিলো তেতিয়া প্ৰধান শিক্ষকে তেওঁক ভৰ্তি কৰিবলৈ অস্বীকাৰ কৰিছিল। বদলিৰ প্ৰমাণ পত্ৰত শিশুটিৰ জন্ম তাৰিখ ৩০ ফেব্ৰুৱাৰীৰ উল্লেখ থকা বুলি তেওঁ অস্বীকাৰ কৰে। তেওঁ মোক প্ৰমাণ পত্ৰখন সংশোধন কৰিবলৈ ক’লে। তেতিয়াৰ পৰাই স্কুলখনলৈ গৈছোঁ যদিও কোনো ফল নাপালোঁ।
মন কৰিবলগীয়া যে সমগ্ৰ ঘটনাত ক্ষিপ্ৰ ব্যৱস্থা গ্ৰহণ কৰাৰ আশ্বাস দিছে জিলা শিক্ষা বিষয়া কপিল দেৱ তিৱাৰীয়ে। বিষয়টো বিবেচনা কৰি বিদ্যালয়খনৰ প্ৰধান শিক্ষকৰ পৰা স্পষ্টীকৰণ বিচৰা হৈছে বুলিও তেওঁ কয়।
