দেওবাৰে দোভাগ নিশা ত্ৰিপুৰাত এজন বিএছএফ জোৱানে নিজৰ ছাৰ্ভিছ মাৰাণাস্ত্ৰৰে তেওঁৰ তিনিগৰাকী সতীৰ্থক গুলীয়াই হত্যা কৰাৰ পাছত নিজেও আত্মহত্যা কৰাক লৈ সৃষ্টি হৈছে তীব্ৰ প্ৰতিক্ৰিয়াৰ।ঘটনাটো সংঘটিত হৈছে ত্ৰিপুৰাৰ উনাকোটি জিলাৰ মাগুৰুলিত থকা সীমান্ত আৰক্ষী চকীত।
দেওবাৰে নিশা প্ৰায় ১২.৩০বজাত সংঘটিত ঘটনাটোক লৈ ইতিমধ্যে সৃষ্টি হৈছে ব্যাপক চাঞ্চল্যৰ।
ঘটনাৰ বিৱৰণী মতে ২৮ বছৰীয়া শিশু পাল নামৰ জোৱানজনে আৰক্ষী চকীত প্ৰথমতে ৪৫ বছৰীয়া হেড কনিষ্টবল বিজয় কুমাৰক মূৰত গুলীয়াই হত্যা কৰে। তাৰ পাছতে তেওঁ প্ৰৱেশদ্বাৰত কৰ্তব্যৰত এগৰাকী কনিষ্টবলক লক্ষ্য কৰি গুলীচালনা কৰে।
ইয়াৰ পাছত শিশু পালে কৰ্তব্যত থকা ৰিংকু কুমাৰৰ মটৰ চাইকেল লৈ কেম্পৰ পৰা ৪০০ মিটাৰ নিলগত থকা সীমান্তলৈ ধাৱমান হয়।তাত তেওঁ ৰাকেশ কুমাৰ যাদৱ আৰু ৰিংকু যাদৱক গুলীয়াই হত্যা কৰিছে। পাছতে শিশু পালে একেই মাৰাণাস্ত্ৰৰে আত্মহত্যা কৰে।
ইতিমধ্যে আহত এজন জোৱানক উনাকোটি জিলা চিকিৎসালয়ত ভৰ্তি কৰা হৈছে বুলি প্ৰকাশ কৰিছে আৰক্ষীৰ এগৰাকী শীৰ্ষ বিষয়াই।
ইতিমধ্যে উনাকোটিৰ আৰক্ষী অধীক্ষক বিপ্লৱ কুমাৰ দেৱে ঘটনাস্থলীত উপস্থিত হৈ ঘটনাৰ বুজ লোৱাৰ লগতে এক তদন্তৰ নিৰ্দেশ দিছে।
