এখন ৰাজনৈতিক সভা চলি আছিল। মঞ্চত স্থানীয় এজন নেতাই ভাষণ দি আছিল। হঠাৎ প্ৰচণ্ড বিস্ফোৰণেৰে সমগ্ৰ অঞ্চলটো কঁপি উঠে। এই ঘটনাত ৪০ জন লোকৰ মৃত্যু হয়। শ শ লোক গুৰুতৰভাৱে আহত হয়। দেওবাৰে বিয়লি পাকিস্তানৰ খাইবাৰ পখতুনখোৱা প্ৰদেশত সংঘটিত হয় এই ঘটনা। এই বিস্ফোৰণৰ আঁৰত উগ্ৰপন্থী জড়িত বুলি অভিযোগ উত্থাপন হৈছে। বৈদেশিক মন্ত্ৰী বিলোৱাল ভুট্টো জৰ্দাৰীয়ে এই ঘটনাক গৰিহণা দিছে।
ৰাজনৈতিক সভাত বিস্ফোৰণৰ ঘটনা সন্দৰ্ভত খাইবাৰ পখতুনখোৱাৰ আই জি আখতাৰ হায়াত গণ্ডাপুৰে কয় যে ‘’এজন জ্যেষ্ঠ নেতাই ভাষণ দিয়াৰ কথা আছিল। কিন্তু, তেওঁ গৈ পোৱাৰ আগতেই বিস্ফোৰণটো ঘটিছিল।”
বিস্ফোৰণত মৃত্যু হোৱা লোকৰ সংখ্যা নিশ্চিত কৰি প্ৰাদেশিক স্বাস্থ্য মন্ত্ৰী ৰিয়াজ আনোৱাৰে কয় যে, চিকিৎসালয়খনত ৪০টা মৃতদেহ আছে। ইয়াৰ উপৰিও ১৫০ জন লোক আহত হয়। ইয়াৰে ১৭ জনৰ অৱস্থা সংকটজনক।”
স্থানীয় সূত্ৰ অনুসৰি, চলিত বছৰতে নিৰ্বাচন আছে। সেই নির্বাচনৰ প্রচাৰৰ উদ্দেশ্যে দেওবাৰে আফগানিস্তান সীমান্তৰ সমীপৰ খাইবাৰ পাখতুনখোৱা প্রদেশৰ খাৰ চহৰত জমিয়ত উলেমা ইছলাম-ফজলৰ এখন বৈঠক অনুষ্ঠিত হয়৷ সেই সভা উপলক্ষে তাত বহু লোক সমবেত হৈছিল। হঠাৎ সভা চলি থকাৰ সময়তে এক ভয়ংকৰ বিস্ফোৰণ ঘটে। আত্মঘাতী বোমাৰুৱে এই বিস্ফোৰণ ঘটোৱাৰ সন্দেহ কৰা হৈছে।
বিস্ফোৰণৰ ফলত থিতাতে বহুকেইজন লোকৰ মৃত্যু হয়। শ শ লোক গুৰুতৰভাৱে আহত হয়। অৱশ্যে এই বিস্ফোৰণ কেনেকৈ সংঘটিত হয়, ইয়াৰ আঁৰত কোন আছে সেয়া এতিয়াও স্পষ্ট কৰা নাই। অৱশ্যে জমিয়ত উলেমা ইছলাম-ফজল (JUI-F)ৰ বৈঠকৰ আয়োজকক লক্ষ্য কৰি এই বিস্ফোৰণৰ অভিযোগ উত্থাপন হৈছে। JUI-F ৰ মুৰব্বী মৌলানা ফজলুৰ ৰেহমানে বিস্ফোৰণৰ আঁৰত উগ্ৰপন্থীৰ হাত আছে বুলি মন্তব্য কৰি তদন্তৰ দাবী জনায়।
