পুনৰ সাংসদ পদ লাভ কৰিলে ৰাহুল গান্ধীয়ে। শুকুৰবাৰে উচ্চতম ন্যায়ালয়ে তেওঁৰ শাস্তি স্থগিত ৰাখিছিল। ইয়াৰ ৪৮ ঘণ্টাৰ পাছত লোকসভাৰ অধ্যক্ষ ওম বিৰলাই ৰাহুলক পুনৰ সাংসদ পদ ঘুৰাই দিলে। সোমবাৰে পুৱা অধ্যক্ষ সচিবালয়ৰ পৰা এই সন্দৰ্ভত এক নিৰ্দেশ জাৰি কৰা হৈছে।
এতিয়া মঙলবাৰে সংসদত প্ৰধানমন্ত্ৰী নৰেন্দ্ৰ মোদীৰ বিৰুদ্ধে বিৰেধীয়ে অনা অনাস্থা প্ৰস্তাৱৰ কাৰ্যসূচীত যোগদান কৰিবলৈ সক্ষম হ’ব ৰাহুলে। এই সংক্ৰান্তীয় বিতৰ্কত ৰাহুলেও যোগদান কৰিব পাৰিব।
লগতে পঢ়ক: মণিপুৰ সংকট! বীৰেন সিং চৰকাৰৰ পৰা কুকি পিপলছ এলায়েন্সৰ সমৰ্থন প্ৰত্যাহাৰ
চুৰাটৰ এখন আদালতে মোডী উপাধি অৱমাননাৰ মানহানিৰ গোচৰত কেৰালাৰ ৱায়নাৰৰ সাংসদ ৰাহুলক দোষী সাব্যস্ত কৰে। চুৰাট আদালতৰ দণ্ডাধীশে তেওঁক দুবছৰ কাৰাদণ্ডৰ শাস্তি প্ৰদান কৰে। তেওঁ এসময়ত দেশৰ গৃহমন্ত্ৰী অমিত শ্বাহৰ অধিবক্তা আছিল। সেই শাস্তিৰ বাবেই ৰাহুলৰ সাংসদ পদ নাকচ হৈছিল।
আনকি, পৰৱৰ্তী লোকসভা নিৰ্বাচনত ৰাহুলৰ স্থিতি সম্পৰ্কেও অনিশ্চয়তাই দেখা দিছিল। কিন্তু শুকুৰবাৰে চুৰাট আদালতে দিয়া শাস্তি স্থগিত ৰাখিছিল উচ্চতম ন্যায়ালয়ে। উচ্চতম ন্যায়ালয়ৰ এই সিদ্ধান্তৰ পিছতে ৰাহুলে পুনৰ সাংসদ পদ লাভ কৰাৰ পথ মসৃণ হৈ পৰিল।
লগতে পঢ়ক: চলন্ত চিফুং এক্সপ্ৰেছত অসমৰ যুৱতীক দলবদ্ধ ধৰ্ষণৰ অভিযোগ; দুজনক গ্ৰেপ্তাৰ
উল্লেখ্য যে ২০১৯ চনৰ ২৩ মাৰ্চত লোকসভা নিৰ্বাচনৰ বাবে কৰ্ণাটকত প্ৰচাৰ চলোৱাৰ সময়ত মোডীৰ উপাধিৰ ওপৰত মন্তব্য কৰাৰ বাবে ৰাহুল গান্ধীক দুবছৰৰ কাৰাদণ্ডৰ শাস্তি প্ৰদান কৰিছিল চুৰাটৰ দণ্ডাধীশ আদালতে।
তাৰ ওপৰত ভিত্তি কৰি ভাৰতীয় সংবিধানৰ ১০২(১) অনুচ্ছেদ আৰু জনপ্ৰতিনিধিত্ব আইন (১৯৫১)ৰ ৮ নং অনুচ্ছেদ অনুসৰি ২৪ মাৰ্চত লোকসভাৰ অধ্যক্ষ ওম বিৰলাই ৰাহুলৰ সাংসদ পদৰ পৰা বৰ্খাস্ত কৰিছিল। জনপ্ৰতিনিধিত্ব আইনৰ ধাৰা ৮(১) অনুসৰি কোনো অপৰাধত দোষী সাব্যস্ত হৈ দুবছৰ বা তাতকৈ অধিক কাৰাদণ্ডৰ শাস্তি পালে সাংসদ বা বিধায়কে ততাতৈয়াকৈ পদ খালী কৰিব লাগে। সেই কাৰ্যকালৰ বাবে ৰাহুলক শাস্তি দিয়াৰ ফলত কেৱল সাংসদ পদ হেৰুৱাই নহয়, ছবছৰৰ বাবে ৰাহুলৰ নিৰ্বাচনত প্ৰতিদ্বন্দ্বিতা কৰাৰ বাটোৰুদ্ধ হৈ পৰিছিল।
পিছত চুৰাট আদালতৰ ৰায়দান চুৰাট চেচনছ কোৰ্ট আৰু গুজৰাট উচ্চ ন্যায়ালয়েও সমৰ্থন কৰিছিল। কিন্তু শুকুৰবাৰে উচ্চতম ন্যায়ালয়ৰ স্থগিতাদেশে ২০২৪ চনত ৰাহুলে নিৰ্বাচনত প্ৰতিদ্বন্দ্বিতা কৰাৰ পথো মুকলি কৰি দিছে। কাৰণ জনপ্ৰতিনিধিত্ব আইনৰ ধাৰা ৮(৩) অনুসৰি শাস্তিৰ ম্যাদ দুবছৰতকৈ এদিন কম হ’লেও দোষী প্ৰতিনিধিৰ পদ খাৰিজ কৰা নহ’ব।
