ভংগ হ’ল পাকিস্তানৰ ৰাষ্ট্ৰীয় সংসদ। বুধবাৰে পাকিস্তানৰ প্ৰধানমন্ত্ৰী শ্বেহবাজ শ্বৰীফৰ পৰামৰ্শ মতে পাকিস্তানৰ ৰাষ্ট্ৰপতি আৰিফ আলভিয়ে সংসদ ভংগ কৰে। যাৰ ফলত চৰকাৰৰ কাৰ্যকাল শেষ হয়।
অহা কেইদিনমানৰ ভিতৰত ঘোষণা কৰা হ’ব পাকিস্তানৰ সাধাৰণ নিৰ্বাচনৰ দিন। ইফালে দেশৰ অস্থিৰ ৰাজনৈতিক পৰিস্থিতিৰ মাজতে জেলত আছে প্ৰাক্তন প্ৰধানমন্ত্ৰী ইমৰাণ খান।
বুধবাৰে পাকিস্তানৰ ৰাষ্ট্ৰপতি আৰিফ আলভিয়ে সংসদ ভংগ কৰাৰ নিৰ্দেশ জাৰি কৰে। সেই নিৰ্দেশনাত সংসদৰ ৫৮ নং অনুচ্ছেদ অনুসৰি সংসদ ভংগ কৰা হৈছে বুলি জনোৱা হয়।
উল্লেখ্য যে, চৰকাৰৰ পাঁচ বছৰীয়া কাৰ্যকাল শেষ হোৱাৰ তিনিদিন পূৰ্বে বুধবাৰে প্ৰধানমন্ত্ৰী শ্বেহবাজ শ্বৰীফে সংসদ ভংগ কৰিবলৈ ৰাষ্ট্ৰপতিলৈ পত্ৰ লিখিছিল।
সংসদ ভংগ হোৱাৰ পিছত সংসদীয় মন্ত্ৰী মুৰ্তাজা জাভেদ আব্বাছিয়ে এক বিবৃতিত কয় যে নিৰ্বাচিত চৰকাৰখনে পাঁচ বছৰীয়া কাৰ্যকাল সম্পূৰ্ণ কৰিছে। সংবিধান মতে ভংগ কৰা হৈছে সংসদ।
আনহাতে, বুধবাৰে ইছলামবাদত শেহবাজ শ্বৰীফে চৰকাৰৰ কাৰ্যকাল সমাপ্ত কৰাৰ পূৰ্বে শেষ বৈঠক অনুষ্ঠিত কৰে। বিদায় ভাষণত তেওঁ কয়, ‘আজি সংসদৰ অনুমতি সাপেক্ষে ৰাষ্ট্ৰপতিলৈ ৰাষ্ট্ৰীয় সংসদ ভংগ কৰাৰ প্ৰস্তাৱ প্ৰেৰণ কৰিম।’
