পুনৰ চৰ্চালৈ আহিছে বন্দে ভাৰত এক্সপ্ৰেছ। দেশীয় নিৰ্মিত অভিলাসী ৰে’লখন কাৰ্যক্ষম হোৱাৰ পিছৰে পৰা সংবাদ শিৰোনামত থকাটো কোনো নতুন কথা কথা নহয়। প্ৰায়ে যাত্ৰাপথত গৰু-ম’হ মহতিওৱাৰ ফলত ক্ষতিগ্ৰস্ত হোৱাৰ বাবেই বিশেষকৈ চৰ্চালৈ আহে বন্দ ভাৰত।
এইবাৰ অৱশ্যে আন এক কাৰণতহে বাতৰিৰ শিৰোনাম দখল কৰিছে বন্দে ভাৰতে। ৰে’লখনত যাত্ৰা কৰা এগৰাকী যাত্ৰীৰ অনাহক হাবিয়াস পূৰণৰ চেষ্টাৰ বাবেহে বন্দে ভাৰত এক্সপ্ৰেছ পুনৰ চৰ্চালৈ আহিছে। এই ঘটনা ঘটিছে অন্ধ্ৰ প্ৰদেশত।
অন্ধ্ৰ প্ৰদেশৰ তিৰুপতিৰ পৰা ছিকন্দৰাবাদলৈ যাত্ৰা কৰা ৰে’লখন গন্তব্যস্থানত উপস্থিত হোৱাৰ আঠঘণ্টা থাকোঁতেই হঠাতে বাজি উঠে জৰুৰীকালীন এলাৰ্ম। চলন্ত ৰে’লখনত লগে লগে সৃষ্টি হয় এক আতংকময় পৰিৱেশৰ। সম্ভাৱ্য বিপদৰ সম্ভেদ বিচাৰি অনুসন্ধান আৰম্ভ হয়।
অনুসন্ধানৰ সময়তে পোহৰলৈ আহে সমগ্ৰ ঘটনা। ৰে’লৱে আৰক্ষীয়ে অগ্নিনিৰ্বাপক যন্ত্ৰৰে ৰে’লৰ শৌচাগাৰৰ খিৰিকীৰ কাঁচ ভাঙি পেলায় আৰু ভিতৰত উদ্ধাৰ কৰে এগৰাকী যাত্ৰীক। এই যাত্ৰীগৰাকীৰ কৃতকৰ্মৰ বাবেই বন্দে ভাৰতত মুহূৰ্ততে সৃষ্টি হৈছিল আতংকৰ।
প্ৰকাশিত খবৰ অনুসৰি, বৈধ টিকট নোহোৱাকৈয়ে ৰে’লখনত উঠিছিল যাত্ৰীগৰাকী। ৰে’লত উঠাৰ পাছতে তেওঁৰ চিগাৰেট খোৱাৰ ইচ্ছা হ’ল আৰু শৌচাগাৰৰ ভিতৰত সোমাই তেওঁ হাবিয়াস পূৰণৰ বাবে চিগাৰেটত টান দিলে।
পিছে দুৰ্কপাল! যাত্ৰীগৰাকী জ্ঞাত নাছিল ৰে’লখনত থকা স্বয়ংক্ৰিয় জৰুৰীকালীন চেঞ্চৰ তথা এলাৰ্মৰ বিষয়ে। চিগাৰেটত টান দিয়াৰ লগে লগে এই এলাৰ্ম বাজি উঠে আৰু স্বয়ংক্ৰিয়ভাৱে অগ্নিনিৰ্বাপক যন্ত্ৰৰ পৰা কম্পাৰ্টমেণ্টটোৰ মাজেৰে এৰ’ছল স্প্ৰে’ হয়।
ইফালে জৰুৰীকালীন এলাৰ্মত ভীতিগ্ৰস্ত যাত্ৰীসকলে ডবাটোত থকা জৰুৰীকালীন ফোন ব্যৱহাৰ কৰি ৰে’লৱে আৰক্ষীকো সতৰ্ক কৰি দিয়ে। এনে আতংকময় পৰিস্থিতিৰ বাবে মানুবুলু ষ্টেচনৰ ওচৰতে ৰে’লখন ৰখাই দিয়া হয়।
ৰে’লৱে আৰক্ষীৰ তৎকালীন অভিযানত ধৰা পৰে যাত্ৰীগৰাকী। ধূমপায়ী যাত্ৰীগৰাকীক লগে লগে ৰে’লৱে আৰক্ষীয়ে আটক কৰে আৰু তাৰ পিছতে ৰে’লখনে পুনৰ যাত্ৰা আৰম্ভ কৰে। মূৰকত অনাহক হাবিয়াস পূৰণ কৰিবলৈ গৈ বিপদত পৰে টিকটবিহীন যাত্ৰীগৰাকী।
