প্ৰথম দুখন টী-২০ মেচত পৰাস্ত হোৱাৰ পিছত ভাৰতে দুৰ্দান্ত প্ৰত্যাৱৰ্তন ঘটাইছে। ৱেষ্ট ইণ্ডিজৰ বিৰুদ্ধে চতুৰ্থখন মেচত জয়লাভ কৰি হাৰ্দিক পাণ্ডিয়া বাহিনীয়ে ২-২ ব্যৱধানত শৃংখলাত সমতা স্থাপন কৰে। ০-২ ব্যৱধানত পিছ পৰি থকাৰ পাছত টীম ইণ্ডিয়াই পৰৱৰ্তী দুখন মেচত একেৰাহে জয়লাভ কৰে।
টী-২০ অভিষেক মেচত ব্যৰ্থ হৈছিল যদিও শনিবাৰে যশস্বী জয়ছৱালে দলক জয়ী কৰাইহে খেলপথাৰ এৰে। বাওঁহতীয়া অ’পেনাৰগৰাকীয়ে ৫১টা বলত ৮৪ ৰান সংগ্ৰহ কৰে। মেচখনৰ ১৮টা বল বাকী থকা অৱস্থাত টীম ইণ্ডিয়াই ৯ উইকেটত জয়লাভ কৰে।
প্ৰথমে বেটিং কৰি ৱেষ্ট ইণ্ডিজে নিৰ্ধাৰিত অভাৰত ৮টা উইকেট হেৰুৱাই ১৭৮ ৰান সংগ্ৰহ কৰে। ইয়াৰ প্ৰত্যুত্তৰত ভাৰতে ১৭ অভাৰতে বিজয়ত উপনীত হয়।
যশস্বী জয়ছোৱাল আৰু শুভমন গিলে প্ৰথম উইকেটত ১৬৫ ৰান সংযোজন কৰে। কেৰিবিয়ানৰ বলাৰসকলক নিৰ্দয়ভাৱে প্ৰহাৰ কৰে যুৱ অ’পেনাৰ দুগৰাকীয়ে।
গিলে ৫টা ছয় আৰু ৩টা চাৰিৰ সহায়ত ৪৭টা বলত ৭৭ ৰান সংগ্ৰহ কৰে। ৫১টা বলত অপৰাজিত ৮৪ ৰান সংগ্ৰহ কৰি মেন অফ দ্য মেচ দখল কৰে যশস্বীয়ে। তেওঁ ইনিংছটোত ৩টা ছয় আৰু ১১টা চাৰি কোবায়।
টছত জয়লাভ কৰি বেটিং কৰে ৱেষ্ট ইণ্ডিজে। চাই হোপ (৪৫) আৰু শ্বিমৰন হেটমায়াৰ (৬১)ৰ বাহিৰে বাকী কোনেও ৰান নাপালে। বেছিভাগ বেটছমেনে আনকি দুটা সংখ্যাৰ ৰানো সংগ্ৰহ কৰিব নোৱাৰিলে। খেলখনত নিয়মিতভাৱে উইকেট হেৰুৱায় ৱেষ্ট ইণ্ডিজে।
হোপে ২৯টা বলত ২টা ছয় আৰু ৩টা চাৰিৰ সহায়ত ৪৫ ৰান সংগ্ৰহ কৰে। শেষত হেটমায়াৰে বিস্ফোৰক হৈ পৰে। তেওঁ ৩৯টা বলত ৬১ ৰান সংগ্ৰহ কৰে। তেওঁৰ ইনিংছত আছিল ৪টা ছয়, ৩টা চাৰি। তেওঁৰ বেটৰ ওপৰত নিৰ্ভৰ কৰিয়েই ৱেষ্ট ইণ্ডিজে যুঁজ দিয়াৰ শক্তি পাইছিল যদিও শেষ ৰক্ষা নহ’ল।
ভাৰতৰ হৈ অৰ্শদীপে ৩টা উইকেট দখল কৰে। যশস্বী-শুভমনৰ দমনীয় ইনিংছেৰে ভাৰতে ২-২ ব্যৱধানত শৃংখলাত সমতা আনে। আন্তঃৰাষ্ট্ৰীয় টী-২০ত যশস্বীয়ে তেওঁৰ প্ৰথম অৰ্ধশতৰাণ কৰে।
