বিজেপিৰ কৃষাণ মৰ্চাৰ নেত্ৰী ইন্দ্রাণী তহবিলদাৰৰ আত্মহত্যাৰ পাছতেই সমগ্ৰ ৰাজ্যৰ লগতে ভাৰতীয় জনতা পাৰ্টিৰ ভিতৰ চ’ৰাতো সৃষ্টি হৈছে তীব্ৰ চাঞ্চল্যৰ। এই ঘটনাক লৈ এক প্ৰকাৰৰ বিবুদ্ধি আৰু অস্বত্বিত ভুগিছে ৰাজ্যিক বিজেপিৰ বিষয়ববীয়াসকল।
ইন্দ্ৰাণী তহবিলদাৰৰ আত্মহত্যাৰ পাছতেই এটা এটাকৈ পোহৰলৈ আহিছে একাংশ বিজেপি নেতাৰ কু-কৰ্ম। এইবাৰ এই সন্দৰ্ভত মুখ খুলিছে স্বয়ং বিজেপিৰ বিধায়ক তথা দলটোৰ পুৰণি নেতা সিদ্ধাৰ্থ ভট্টাচাৰ্যই।
উল্লেখ্য যে ইন্দ্ৰাণী তহবিলদাৰৰ মৃত্যুৰ পিছত ভাইৰেল হৈ পৰিছিল এটা অডিঅ ক্লিপ । যত দুগৰাকী বিজেপি কৰ্মীয়ে সিদ্ধাৰ্থ ভট্টাচাৰ্যৰ নাম লৈছিল। এই সন্দৰ্ভত সিদ্ধাৰ্থ ভট্টাচাৰ্যই কয় যে, অডিঅ’ ক্লীপটো মোৰ মূৰত কঠাল ভাঙিবৰ বাবে পৰিকল্পিতভাবে ৰেকৰ্ডিং কৰা হৈছে।
এই অডিঅ’ ক্লিপটো পাবতগজা ন বিজেপি নেতাই কৰিছে বুলি উল্লেখ কৰি ভট্টাচাৰ্যই কয় যে, যিগৰাকী মহিলাই কথাবোৰ কৈছে, তেওঁক ধৰি আনি ব্যৱস্থা লওক। মই এই সন্দৰ্ভত অভিযোগ দিছো। সেই মহিলাগৰাকীয়ে এসময়ত বিজেপি চৰকাৰৰ বিৰুদ্ধে মুণ্ডন কৰিছিল।
ইয়াৰ লগতে সিদ্ধাৰ্থ ভট্টাচাৰ্যই কয় যে বেজিপিলৈ নতুনকৈ এনে কিছুমান মানুহ আহিছে, যি সকলে দলটোৰ মান-ইজ্জত শেষ কৰিছে।
ন বিজেপি সকলৰ প্ৰতি আক্ষেপ প্ৰকাশ কৰি সিদ্ধাৰ্থ ভট্টাচাৰ্যই কয়, “মই সভাপতি হৈ থকা কালত ভৱেশ কলিতাক ময়েই দললৈ আনিছিলো। লগতে দ্বীপলু ৰঞ্জন, পুলক গোহাঁই ইত্যাদিকো দললৈ আনিছিলো। এতিয়া তেওঁলোকে নিজৰ লবী বনাই আছে।”
“মই দলৰ অনুশাসন ভংগ কৰিব নোৱাৰো। সেয়ে দলৰ মজিয়ালৈ বিষয়টো দিছো। চৰকাৰ অহাৰ পাছত দললৈ এনে একাংশ মানুহ আহিল, যিসকলক কেৱল সুবিধা লাগে। বাজপেয়ী ফটো গছকা মানুহো এতিয়া দলৰ ডাঙৰ পদবীত।” – লগতে ভট্টাচাৰ্যই কয়।
শেষত অতি আক্ষেপেৰে সিদ্ধাৰ্থ ভট্টাচাৰ্যই কয় যে কংগ্রেছত যোগদান কৰা হ’লে দুবাৰ কেবিনেট মন্ত্রী হ’ব পাৰিলোহেঁতেন ।
