মালয়েছিয়াৰ পশ্চিম উপকূলীয় প্ৰদেশ চেলানগৰৰ এলমিনা চহৰত এখন সৰু যাত্ৰীবাহী বিমান দুৰ্ঘটনাগ্ৰস্ত হোৱাৰ ফলত কমেও ১০ জন লোকৰ মৃত্যু হয়। বৃহস্পতিবাৰে দুপৰীয়া প্ৰায় ২:৪০ বজাত সংঘটিত হয় এই দুৰ্ঘটনা। চেলানগৰ আৰক্ষী অধীক্ষক ডাটুক হোছেইন ওমৰ খানে এই কথা সদৰী কৰে।
মালয়েছিয়াৰ সংবাদ মাধ্যম দ্য ষ্টাৰে জনোৱা মতে, এলমিনা চহৰৰ এটা পথত বিমানখন দুৰ্ঘটনাগ্ৰস্ত হয়। তাত এখন গাড়ী আৰু এখন মটৰ চাইকেল বিমানখনৰ চেপাত বিধ্বস্ত হৈ পৰে।
চেলানগৰ আৰক্ষী অধীক্ষক ডাটুক হোছেইন ওমৰ খানে কয় যে, ‘আমি বিমানখনৰ ভিতৰত উদ্ধাৰ অভিযান চলাই থকাৰ সময়তে কমেও দুজন ক্ৰু মেম্বাৰ আৰু ছয়জন যাত্ৰী পাইছো, সেই সকলোৰে থিতাতে মৃত্যু ঘটিছে।
লগতে পঢ়ক: সম্পদ ‘হৰলুকী’ৰ অভিযোগত কৰ্মচাৰীক বৰ্খাস্ত কৰিলে ব্ৰিটিছ মিউজিয়ামে
তেওঁ কয় যে বিমানখনৰ ধ্বংসাৱশেষৰ খুন্দাত পথত এজন গাড়ী চালক আৰু এজন মটৰ চাইকেল আৰোহীৰো মৃত্যু হয়। কিন্তু গাড়ীৰ ভিতৰত আৰু মানুহ আছিল নেকি আমি এতিয়াও নিশ্চিত নহয়। নিহতসকলৰ মৰণোত্তৰ পৰীক্ষাৰ বাবে ক্লাঙৰ টেংকু আম্পুয়ান ৰহিমা চিকিৎসালয়লৈ প্ৰেৰণ কৰা হৈছে।
দেশখনৰ পৰিবহণ সংস্থা জেটভ্যালেট এছডিএন বিএইচডিৰ দ্বাৰা পৰিচালিত বিমানখনে দুপৰীয়া ২বাজি ৮ মিনিটত লংকাউই আন্তঃৰাষ্ট্ৰীয় বিমানবন্দৰৰ পৰা উৰা মাৰিছিল। সৰু বিমানখন চুবাঙৰ চুলতান আব্দুল আজিজ শ্বাহ বিমানবন্দৰত অৱতৰণ কৰাৰ কথা আছিল।
সংস্থাটোৱে জনোৱা মতে, বিমানখনে চুবাঙৰ চুলতান আব্দুল আজিজ শ্বাহ বিমানবন্দৰৰ এয়াৰ ট্ৰেফিক কন্ট্ৰোল টাৱাৰৰ সৈতে প্ৰথম যোগাযোগ কৰে দুপৰীয়া ২.৪৭ বজাত। আৰু বিমানখন ২:৪৮ বজাত অৱতৰণ কৰিবলৈ ক্লিয়াৰেন্স পায়। চুলতান আব্দুল আজিজ শ্বাহ বিমানবন্দৰত অৱতৰণৰ নিৰ্ধাৰিত সময় আছিল ২:৫১ বজাত।
লগতে পঢ়ক:স্বাস্থ্যৰ বাবে সাংঘাতিক উপকাৰী ভাতকেৰেলা; দুটা জটিল ৰোগকে ধৰি বহু ৰোগ প্ৰতিৰোধী পাচলি
দেশৰ অসামৰিক বিমান পৰিবহণ কৰ্তৃপক্ষৰ মুখ্য কাৰ্যবাহী বিষয়াগৰাকীয়ে জনোৱা মতে, দুপৰীয়া ২:৫১ বজাত নিয়ন্ত্ৰণ টাৱাৰৰ বিষয়াসকলে দুৰ্ঘটনাস্থলীৰ পৰা ধোঁৱা ওলোৱা দেখা পায়। বিমানখন দুৰ্ঘটনাগ্ৰস্ত হোৱাৰ সময়ত পাইলটে কোনো জৰুৰীকালীন ফোন কৰা নাছিল।
