উৰন্ত বিমানত এইবাৰ সংঘটিত হৈছি যৌন অপৰাধৰ ঘটনা। বিমানৰ বিতৰত এগৰাকী যাত্ৰীৰ বিৰুদ্ধে উত্থাপন হৈছে এই অভিযোগ। গোপনে এগৰাকী মহিলা কৰ্মচাৰী আৰু এগৰাকী মহিলা যাত্ৰীৰ ফটো তোলাৰ অভিযোগ উত্থাপন হৈছে যাত্ৰীগৰাকীৰ বিৰুদ্ধে।
সামাজিক মাধ্যমত এই ভিডিঅ’টো ভাইৰেল হৈ পৰাৰ পিছতে দিল্লী মহিলা আয়োগে যৌন নিৰ্যাতনৰ অভিযোগেৰে জাননী জাৰি কৰিছে। আয়োগৰ মুৰব্বী স্বাতী মালিৱালে এক টুইট যোগে এই বিষয়ে সদৰী কৰিছে।
শ্বাতী মালিৱালে টুইটটোত উল্লেখ কৰা মতে, দিল্লী আৰক্ষী আৰু অসামৰিক বিমান পৰিবহণ সঞ্চালকালয়লৈ এই জাননী জাৰি কৰা হৈছে। যোৱা বুধবাৰে দিল্লীৰ পৰা মুম্বাই অভিমুখী স্পাইচজেটৰ এখন বিমানত এই কাণ্ড সংঘটিত হৈছিল।
আয়োগে জাননীখনৰ জৰিয়তে দিল্লী আৰক্ষীৰ পৰা এই বিষয়ত পঞ্জীয়ন হোৱা এফআইআৰৰ প্ৰতিলিপি, ধৃত অভিযুক্তৰ সবিশেষ পৰিচয় আৰু তেওঁৰ বিৰুদ্ধে ব্যৱস্থা গ্ৰহণ সন্দৰ্ভত বিস্তৃত প্ৰতিবেদন বিচাৰিছে।
লগতে যদি অভিযুক্তক গ্ৰেপ্তাৰ কৰা হোৱা নাই, তেতিয়াহ’লে কি কাৰণত দিল্লী আৰক্ষীয়ে তেনে পদক্ষেপ গ্ৰহণ কৰা নাই তাৰ কাৰণ দাঙি ধৰিবলৈও নিৰ্দেশনা দিছে দিল্লী মহিলা আয়োগে।
আনহাতে অসামৰিক বিমান পৰিবহণ সঞ্চালকালয়কো দিল্লী মহিলা আয়োগে জাননীখনৰ জৰিয়তে অভিযুক্ত যাত্ৰীগৰাকীৰ বিৰুদ্ধে গ্ৰহণ কৰা ব্যৱস্থাৰ সবিশেষ তথ্য প্ৰদান কৰিবলৈ নিৰ্দেশ দিছে।
তদুপৰি কৰ্মক্ষেত্ৰত যৌন নিৰ্যাতন আইনৰ অধীনত আভ্যন্তৰীণ অভিযোগ সমিতিৰ ওচৰত বা আন কোনো কমিটীৰ ওচৰত এই ঘটনা অৱগত কৰা হৈছে নে তাৰ তথ্য বিচাৰিছে আয়োগে।
যদি তেনে কোনো ব্যৱস্থা গ্ৰহণ কৰা হোৱা নাই, তাৰ এই কাৰণ উল্লেখ কৰিবলৈও আয়োগে অসামৰিক বিমান পৰিবহণ সঞ্চালকালয়ক নিৰ্দেশ দিছে। আৰক্ষী আৰু বিমান নিয়ন্ত্ৰক সংস্থাটোক অহা ২৩ আগষ্টৰ ভিতৰত জাননীৰ উত্তৰ দিবলৈ কোৱা হৈছে।
