আয়াৰলেণ্ডৰ বিৰুদ্ধে একেৰাহে দ্বিতীয়টো জয়। ভাৰতৰ হাতলৈ টী-২০ ছিৰিজ। এখন মেচ বাকী থকা অৱস্থাত বুমৰাহৰ দলটোৱে ২-০ ব্যৱধানত অগ্ৰগতি লাভ কৰি ছিৰিজ জয় নিশ্চিত কৰে। দেওবাৰে ডাবলিনত টীম ইণ্ডিয়াই ৩৩ ৰানত জয়লাভ কৰে। প্ৰথমে বেটিং কৰি ভাৰতে নিৰ্ধাৰিত অভাৰত ৫টা উইকেট দখল হেৰুৱাই ১৮৫ ৰান সংগ্ৰহ কৰে। ইয়াৰ প্ৰত্যুত্তৰত ২০ অভাৰৰ শেষত ৮টা উইকেট হেৰুৱাই ১৫২ ৰানত সমাপ্ত হৈ যায় আইৰিছ ইনিংছ।
আয়াৰলেণ্ডৰ বিৰুদ্ধে ভাৰতৰ এশ শতাংশ জয়ৰ অভিলেখ এতিয়াও অব্যাহত আছে। দেওবাৰে শৃংখলা জয় কৰাৰ বাবে মেচত মজবুত বেটিং আছিল মূল লক্ষ্য। সেই ক্ষেত্ৰত ভাৰত সফল হৈছে। ৰান পালে ঋতুৰাজ গাইকোৱাড, সঞ্জু চেমচন, ৰিংকু সিং-য়ে। এছিয়া কাপৰ দল নিৰ্বাচনৰ পূৰ্বে নিজকে প্ৰমাণ কৰাৰ লক্ষ্যৰে নামিছিল তিলক বাৰ্মা, সঞ্জু চেমচন। প্ৰথমজন বিফল হ’ল। মাত্ৰ ১ ৰানতে উভতি আহিল। সঞ্জুৱে অৱশ্যে ৰান পায়।
আয়াৰলেণ্ডে টছত জয়লাভ কৰি ভাৰতক বেটিং কৰিবলৈ ফিল্ডলৈ প্ৰেৰণ কৰে। এইটোৱে টীম ইণ্ডিয়াৰ বাবে সুবিধা কৰি দিলে। ভাৰতীয় দলৰ টীম মেনেজমেণ্টে যি বিচাৰিছিল, সেই বেটিং অনুশীলনৰ সুযোগ পালে। অৱশ্যে যশস্বীয়ে ৰান নাপালে। ১৮ ৰাণত আউট হয়। ব্যৰ্থ তিলক বাৰ্মাও। দ্বিতীয়টো বলতে পেভলিয়ন লৈ উভতিল।
৩৪ ৰানত ২ উইকেট হেৰুৱায় ভাৰতে। তাৰ পিছত ঋতুৰাজ আৰু সঞ্জুৱে দলটোক আগবঢ়ায় নিয়ে। ভাৰতৰ অ’পেনাৰগৰাকীয়ে ১টা ছয় আৰু ৬ টা চাৰিৰ সহায়ত ৪৩টা বলত ৫৮ ৰান সংগ্ৰহ কৰে। ভাল বেটিং কৰাৰ পিছতো সঞ্জুৱে নিজৰ অৰ্ধশতক সম্পূৰ্ণ কৰিব নোৱাৰিলে। ২৬টা বলত ৪০ ৰান সংগ্ৰহ কৰি আউট হয় চেমচন।
পাঁচ নম্বৰত বেটিং কৰিবল নামি উজলিল ৰিংকু সিং। বৰষুণৰ বাবে তেওঁ অভিষেক মেচত বেটিং কৰাৰ সুযোগ নাপালে। কিন্তু দেওবাৰৰ দিনটোত আৰম্ভণিৰে পৰাই আছিল আক্ৰমণাত্মক। ২১টা বলত ৩৮ ৰান সংগ্ৰহ কৰি উভতি আহে ৰিংকু। ইনিংছটোত আছিল ৩টা ছয় আৰু ২টা চাৰি। তেওঁৰ ষ্ট্ৰাইক ৰেটও সৰ্বাধিক। শেষত শিৱম ডুবে দুটা ছয়ৰ সহায়ত গুৰুত্বপূৰ্ণ ২২ ৰান সংযোজন কৰে। ৫টা উইকেট হেৰুৱাই ১৮৫ ৰাণেৰে ইনিংছ শেষ কৰে ভাৰতে।
আইৰিছ দলটোৱে ৰান অনুসৰণ কৰাৰ আৰম্ভণিতে বেটিং দুৰ্যোগৰ সন্মুখীন হ’বলগীয়া হয়। কেৱল এণ্ডি বালবিৰ্ণীয়েহে ভাৰতীয় বলাৰক প্ৰহাৰ কৰে। মেচখনত হাৰিলেও এণ্ডিৰ ইনিংছটোৱে সকলোৰে দৃষ্টি কাঢ়ে। আয়াৰলেণ্ডৰ অ’পেনাৰজনে ৫১টা বলত ৭২ ৰান সংগ্ৰহ কৰে। তেওঁৰ ইনিংছত আছিল ৪টা ছয় আৰু ৫টা চাৰি।
বাকী বেটাৰবোৰ বিফল হয়। শেষত মাৰ্ক আডায়াৰে ১৫টা বলত ২৩ ৰান সংগ্ৰহ কৰে। নিৰ্ধাৰিত অভাৰত ৮টা উইকেট হেৰুৱাই ১৫২ ৰাণত ইনিংছ সমাপ্ত হয় আয়াৰলেণ্ডৰ। প্ৰত্যাৱৰ্তনৰ দিনটোত বুমৰাহে দুটা উইকেট দখল কৰিছিল। দেওবাৰেও সফল ভাৰতৰ অধিনায়ক।পালে ২ টা উইকেট। সেইদৰে, প্ৰসিদ্ধ কৃষ্ণ, ৰবি বিষ্ণোইও দুটাকৈ উইকেট দখল কৰে। বুধবাৰে আয়াৰলেণ্ডৰ বিৰুদ্ধে ছিৰিজৰ তৃতীয় আৰু অন্তিম টী-২০। যদিও সেইখন মাত্ৰ নিয়মৰক্ষাৰ মেচহে।
