দেশৰ বিভিন্ন প্ৰান্তৰ মহাবিদ্যালয় আৰু বিশ্ববিদ্যালয়সমূহত চলি থকা ছাত্ৰ সংসদ নিৰ্বাচনৰ বতাহে ৰাজনৈতিক মহল গৰম কৰি তুলিছে। উত্তৰৰ পৰা দক্ষিণে দেশৰ অগ্ৰণী শিক্ষানুষ্ঠানসমূহ দখল কৰিবলৈ বাওঁপন্থী ছাত্ৰ সংগঠন, কংগ্ৰেছৰ ছাত্ৰ শাখা এনএছইউআই আৰু বিজেপি সমর্থিত এবিভিপিৰ মাজত তীব্ৰ প্ৰতিযোগিতা চলিছে। ৰাষ্ট্ৰীয় স্তৰৰ এই নিৰ্বাচনত দিল্লী বিশ্ববিদ্যালয়ৰ দৰে ঠাইত গেৰুৱা শিবিৰে আধিপত্য বিস্তাৰ কৰিবলৈ সক্ষম হ’লেও, দক্ষিণৰ কেম্পাছসমূহত ডাঙৰ বিজয় সাব্যস্ত কৰিছে এছএফআইয়ে।
হায়দৰাবাদ কেন্দ্ৰীয় বিশ্ববিদ্যালয়ৰ সফলতাৰ পাছতে এইবাৰ পণ্ডিচেৰী বিশ্ববিদ্যালয়ৰ ছাত্ৰ সংসদ নিৰ্বাচনতো একক সংখ্যাগৰিষ্ঠতাৰে জয়লাভ কৰিছে এছএফআইয়ে। খবৰ অনুসৰি, এইবাৰৰ নিৰ্বাচনত অকলে প্ৰতিদ্বন্দিতা কৰি বাওঁ ছাত্ৰ সংগঠনটোৱে চমক সৃষ্টি কৰিছে। পণ্ডিচেৰী বিশ্ববিদ্যালয়ত এছএফআইৰ প্ৰাৰ্থীসকলে অকলশৰেই ৭০ খন আসন লাভ কৰে। আনহাতে, তেওঁলোকৰ মূল প্ৰতিদ্বন্দ্বী আৰএছএছ সমর্থিত এবিভিপি মাত্ৰ ২০ খন আসনতে সীমাবদ্ধ থাকে। বাকী আসনসমূহ অন্যান্য প্ৰাৰ্থীৰ দখললৈ যায়।
কিছুদিন পূৰ্বে হায়দৰাবাদ কেন্দ্ৰীয় বিশ্ববিদ্যালয়ৰ ছাত্ৰ সংসদ নিৰ্বাচনতো ডাঙৰ বিজয় লাভ কৰিছিল বাওঁপন্থীয়ে। সদ্য সমাপ্ত নিৰ্বাচনত এছএফআই, আইছা আদি বিভিন্ন বাওঁ আৰু সমমনোভাৱাপন্ন সংগঠনৰ যুটীয়া মিত্ৰজোটৰ প্ৰাৰ্থী দিলশাদা ৰাইহানে সভাপতি পদত বিজয়ী হয়। তেওঁ নিকটতম প্ৰতিদ্বন্দ্বী এবিভিপি সমর্থিত মিত্ৰজোটৰ প্ৰাৰ্থী নৰেশ পদিচেট্টীক পৰাস্ত কৰে। কেৱল সেয়ে নহয়, কেৰালাৰ মহাবিদ্যালয়সমূহত বাওঁ যুৱশক্তিৰ ভেটি যে এতিয়াও কিমান গভীৰ, তাৰ প্ৰমাণ পোৱা গৈছে শেহতীয়া পৰিসংখ্যাত। কেৰালাত শেহতীয়াকৈ সম্পন্ন হোৱা ছাত্ৰ নিৰ্বাচনত ৰাজ্যখনৰ ৬৫০খন মহাবিদ্যালয়ৰ ভিতৰত প্ৰায় ৬০৯ খন মহাবিদ্যালয়তে জয়ী হৈছে এছএফআই। তৰুণ প্ৰজন্মৰ মনত বাওঁ প্ৰভাৱ যে অলপো হ্ৰাস পোৱা নাই, এই জয়ে তাকে স্পষ্ট কৰি তুলিছে।
দক্ষিণত বাওঁপন্থীয়ে একেৰাহে জয়ৰ ধাৰা অব্যাহত ৰখাৰ বিপৰীতে, ইয়াৰ বিপৰীত ছবিখনহে দেখা গৈছে দেশৰ ৰাজধানী দিল্লীত। দিল্লী বিশ্ববিদ্যালয় ছাত্ৰ সংসদ নিৰ্বাচনৰ চাৰিটা প্ৰধান পদৰ তিনিটাতে ডাঙৰ বিজয় সাব্যস্ত কৰিছে এবিভিপিয়ে। সভাপতি, সম্পাদক আৰু যুটীয়া সম্পাদক পদত জয়ী হৈছে গেৰুৱা শিবিৰ। আনহাতে, কংগ্ৰেছৰ ছাত্ৰ সংগঠন এনএছইউআই এই নিৰ্বাচনত শোচনীয়ভাৱে ব্যৰ্থ হয় আৰু কোনো কেন্দ্ৰীয় পদতেই খাতা খুলিব নোৱাৰিলে। অৱশ্যে সহ-সভাপতি পদত জয় লাভ কৰে কংগ্ৰেছৰ টিকট নাপাই বিদ্ৰোহী ৰূপত ওলাই অহা নিৰ্দলীয় প্ৰাৰ্থী দীপাংশু শৌখিনে। বিশেষজ্ঞসকলৰ মতে, প্ৰাৰ্থী নিৰ্বাচনত দলৰ আভ্যন্তৰীণ অসন্তুষ্টি আৰু বাওঁ তথা কংগ্ৰেছৰ পৃথকভাৱে যুঁজ দিয়াৰ কৌশলেই এই পৰাজয়ৰ অন্যতম মূল কাৰণ।
এই সমগ্ৰ প্ৰসংগত এছএফআইৰ সৰ্বভাৰতীয় সাধাৰণ সম্পাদক সৃজন ভট্টাচাৰ্যই কয় যে দেশৰ তৰুণ প্ৰজন্মই বৰ্তমান আৰএছএছ আৰু বিজেপীৰ বিকল্প বিচাৰি ফুৰিছে আৰু য’ত আদৰ্শগত বিকল্প লৈ বাওঁপন্থীসকল উপস্থিত থাকে, তাত ছাত্ৰ-ছাত্ৰীসকলে বাওঁপন্থীসকলকেই প্ৰথম পছন্দ হিচাপে বাচি লয়। তেওঁ লগতে কয় যে কেৱল দক্ষিণ ভাৰততেই নহয়, ৰাজস্থান, উত্তৰাখণ্ড আৰু অসমৰো একাংশ মহাবিদ্যালয়ত শেহতীয়াকৈ বাওঁ সংগঠনে জয়লাভ কৰিছে, যিবোৰ ৰাজ্য বিজেপি শাসিত। তেওঁৰ মতে, দেশজুৰি এছএফআইৰ এই বিজয়সমূহে প্ৰমাণ কৰে যে সাধাৰণ ছাত্ৰ সমাজৰ মাজত বিজেপি আৰু আৰএছএছৰ বিৰুদ্ধে এক প্ৰতিষ্ঠান বিৰোধী হাওৱা বঢ়িছে আৰু বিকল্প হিচাপে বাওঁপন্থীসকলক ছাত্ৰ-ছাত্ৰীয়ে আঁকোৱালি লৈছে।
