প্ৰেয়সী বা পত্নীৰ সৈতে অন্তৰংগ মুহূৰ্তত চুম্বন কৰোঁতে সাৱধান! অকল্পনীয় ক্ষতিৰ সন্মূখীন হ’ব পাৰে আপুনি! হেৰুৱাব পাৰে আপোনাৰ শ্ৰৱণ শক্তি! কিয়নো চীনৰ এগৰাকী যুৱক এনে এক ক্ষতিৰে সন্মুখীন হ’বলগীয়া হৈছে।
প্ৰেয়সীক ১০ মিনিট চুম্বন কৰি চীনৰ যুৱকগৰাকীয়ে হেৰুৱাইছে নিজৰ শ্ৰৱণ শক্তি। চীনৰ স্থানীয় এক সংবাদ প্ৰতিষ্ঠানত প্ৰকাশিত খবৰ অনুসৰি, যোৱা ২২ আগষ্টত চীনৰ পূব ঝেজিয়াং প্ৰদেশৰ পশ্চিম হ্ৰদত ডেটিঙত আছিল এই দম্পতীহাল।
প্ৰেমৰ বহি:প্ৰকাশ স্বৰূপে এক অন্তৰংগ মুহূৰ্তত দম্পতীহাল চুম্বনত মগ্ন হয়। কিন্তু চুম্বনৰত অৱস্থাতে হঠাতে যুৱকজনে কাণত তীব্ৰ বিষ অনুভৱ কৰে। এনে আকস্মিক অসুস্থতাৰ বাবে যুৱকগৰাকীক লগে লগে চিকিৎসালয়লৈ লৈ যোৱা হয়।
চিকিৎসালয়ত প্ৰাথমিক পৰীক্ষণৰ পিছতে চিকিৎসকে আৱিষ্কাৰ কৰে যে যুৱকজনৰ কাণৰ পৰ্দাত ফুটা হৈছে। তেওঁক সম্পূৰ্ণ সুস্থ হ’বলৈ দুমাহ সময় লাগিব বুলি উল্লেখ কৰি চিকিৎসকে নিৰ্দিষ্ট পৰিমানৰ ঔষধ সেৱন কৰাৰ পৰামৰ্শ দিয়ে।
চিকিৎসকে উল্লেখ কৰা মতে, আবেগিকতাত ডুব গৈ এনে উত্তেজনাময় চুমা খালে কাণৰ ভিতৰৰ বায়ুৰ চাপৰ দ্ৰুত পৰিৱৰ্তন হ’ব পাৰে। ইয়াৰ লগতে সংগীৰ গধুৰ উশাহ-নিশাহৰ ফলত ভাৰসাম্যহীনতাৰ সৃষ্টি হয়।
এনে কাৰণৱশত: কাণৰ পৰ্দাত ফাঁট মেলিব পাৰে বুলি চিকিৎসকে উল্লেখ কৰে। চীনৰ এই যুৱকগৰাকীৰ ক্ষেত্ৰতো এনে পৰিস্থিতিৰে উদ্ভৱ হয় বুলি চিকিৎসকে জানিবলৈ দিয়ে।
লক্ষণীয়ভাৱে কিন্তু এনে ঘটনা এয়াই প্ৰথম নহয়। ২০০৮ চনত দক্ষিণ চীনৰ এগৰাকী যুৱতীয়ে অত্যধিক আবেগিক চুমা খোৱাৰ সময়ত প্ৰেমিকৰ কাণৰ পৰ্দা ফাটি যোৱাৰ ফলত শ্ৰৱণ ক্ষমতা আংশিকভাৱে হেৰুৱাইছিল।
