কাইলৈ অনুষ্ঠিত হ’ব চলিত এছিয়া কাপ টুৰ্ণামেণ্টৰ ফাইনেল। এছিয়াৰ শ্ৰেষ্ঠত্ব অৰ্জনৰ লক্ষ্যৰে কাইলৈ ফাইনেলত মুখামুখি হ’ব ভাৰত আৰু শ্ৰীলংকা। এছিয়া কাপৰ ইতিহাসৰ এই দুই সফল দলে কাইলৈ কলম্বোত প্ৰতিদ্বন্দিতা আগবঢ়াব।
পিছে ভাৰতৰ বিৰুদ্ধে ফাইনেলৰ প্ৰাকক্ষণত এক বৃহৎ আঘাতৰ সন্মুখীন হৈছে ঘৰুৱা দল শ্ৰীলংকা। তাৰকা স্পিনাৰ মহীশ থিকছানা হেমষ্ট্ৰিঙৰ আঘাতৰ বাবে বাহিৰ হৈছে দলৰ পৰা। এনে পৰিস্থিতিত চিন্তিত হৈ পৰিছে লংকান শিবিৰ।
বৃহস্পতিবাৰে পাকিস্তানৰ বিপক্ষে শ্ৰীলংকাৰ গুৰুত্বপূৰ্ণ মেচৰ সময়ত ফিল্ডিং কৰি থকা অৱস্থাত সোঁফালৰ হেমষ্ট্ৰিঙৰ সমস্যাত ভুগিছিল থিকছানাই। এই আঘাত গুৰুতৰ হোৱাৰ বাবে থিকছানা ফাইনেলৰ বাবে উপলব্ধ নহ’ব।
এই মেচখনত শ্ৰীলংকাই বলিং কৰি থকাৰ সময়তে একাধিকবাৰ খেলপথাৰৰ পৰা ওলাই আহিছিল থিকছানাই। তেতিয়াই অনিশ্চিত হৈ পৰিছিল ফাইনেলৰ বাবে ঘৰুৱা দলটোৰ মূল একাদশত থিকছানাৰ স্থান।
থিকছানাৰ এই আঘাতে শ্ৰীলংকান শিবিৰত অথন্তৰৰ সৃষ্টি কৰিছে। ইতিপূৰ্বেই টুৰ্ণামেণ্টখনত দলটো অৱতীৰ্ণ হৈছিল দলটোৰ মূল কেইগৰাকীমান তাৰকা ৱানিন্দু হাছাৰংগা, দুষমন্ত চমীৰা, লাহিৰু মদুশংকা আৰু লাহীৰু কুমাৰাৰ দৰে খেলুৱৈৰ অবিহনে।
অৱশ্যে এছিয়া কাপৰ ফাইনেলত উপলব্ধ নহ’ব যদিও থিকছানা আগন্তুক ক্ৰিকেট বিশ্বকাপৰ বাবে দললৈ ঘূৰি আহিব বুলি আশা কৰা হৈছে। ভাৰতত অনুষ্ঠিত হ’বলগীয়া বিশ্বকাপত স্পীন সহায়ক পিটছত থিকছানা শ্ৰীলংকাৰ এক গুৰুত্বপূৰ্ণ অস্ত্ৰ হোৱাৰ সম্ভাৱনা আছে।
উল্লেখ্য যে, চলিত বৰ্ষত এদিনীয়া ফৰ্মেটত শ্ৰীলংকাৰ হৈ এইপৰ্যন্ত সৰ্বাধিক উইকেট দখল কৰিছে থিকছানাই। ১৫খন মেচত ১৭.৪৫ গড়ে ৩১টা উইকেট দখল কৰিছে তাৰকা স্পিনাৰগৰাকীয়ে।
