কাষ চাপিছে ক্ৰিকেট বিশ্বকাপ। ঘৰৰ মাটিতে অনুষ্ঠিত হ’বলগীয়া প্ৰতিযোগিতাখনত স্বাভাৱিকতেই এইবাৰ হট ফেভাৰিট ভাৰত, সকলোৰে আশা পুনৰাবৃত্তি হওক ২০১১ ৰ। ইতিমধ্যে সদ্যসমাপ্ত এছিয়া কাপৰ খিতাপ দখলেৰে ক্ৰিকেট অনুৰাগীক কিঞ্চিত আশা দিছেই ভাৰতীয় দলে।
এই প্ৰতিযোগিতাত ভাৰতৰ প্ৰদৰ্শন আছিল প্ৰায় আশাব্যঞ্জক। বাংলাদেশৰ বিৰুদ্ধে এখন মেচত পৰাজয়ৰ বাহিৰে প্ৰতিখন মেচতে ভাৰতে আগবঢ়াই সুন্দৰ প্ৰদৰ্শন। চূড়ান্ত মেচখনত পেচাৰ মহম্মদ চিৰাজৰ দুৰ্দান্ত বলিং আৰু সমগ্ৰ প্ৰতিযোগিতাত কুলদীপ যাদৱৰ বলিং ভাৰতৰ বাবে আছিল আশাৰ বতৰা।
দৰ্শনীয় প্ৰদৰ্শনৰ বাবে কুলদীপ যাদৱ প্ৰতিযোগিতাৰ শ্ৰেষ্ঠ খেলুৱৈও বিবেচিত হৈছিল। কেৱল এই দুই তাৰকাৰ নহয়, দলৰ প্ৰায় প্ৰতিগৰাকী ক্ৰিকেটাৰেই এছিয়া কাপত স্বাভাৱিক প্ৰদৰ্শন দাঙি ধৰিছিল। লক্ষণীয়ভাৱে দুই-এগৰাকী খেলুৱৈৰ বাদে ভাৰতৰ এই দলটোৱেই ভাগ ল’ব আগন্তুক বিশ্বকাপত।
বিশ্বকাপৰ প্ৰাকক্ষণত ভাৰতীয় দলটোৰ মুখ্য নিৰ্বাচক অজিত আগাৰকাৰে এগৰাকী খেলুৱৈক বিশ্বকাপ অভিযানৰ বাবে দলৰ ট্ৰাম্প কাৰ্ড বুলি অভিহিত কৰিছে। অৱশ্যে আগাৰকাৰে ট্ৰাম্প কাৰ্ড আখ্যা দিয়া খেলুৱৈগৰাকী ৰোহিত-কোহলী অথবা বুমৰাহ-চিৰাজ নহয়।
মুখ্য নিৰ্বাচক আগাৰকাৰৰ মতে, কুলদীপ যাদৱ হ’ব ভাৰতীয় দলৰ ট্ৰাম্প কাৰ্ড। এই প্ৰসঙ্গত আগাৰকাৰে কুলদীপ যাদৱৰ সৈতে আই পি এল ফ্ৰেন্সাইজি দিল্লী কেপিটেলত কটোৱা সময়ৰো উদ্ধৃতি দিয়ে আৰু কুলদীপক বিশেষ দক্ষতা থকা খেলুৱৈ আখ্যা দিয়ে।
উল্লেখ্য যে, ভাৰতৰ আন এগৰাকী স্পিনাৰ যুজবেন্দ্ৰ চাহালৰ সৈতে কুলদীপৰ ‘কুলচা’ যুটী বহু সময় ধৰি আছিল ২২ গজৰ যুঁজত অদম্য। কিন্তু ফৰ্মহীনতাৰ বাবে পিছত বহু সময় ধৰি দলৰ বাহিৰত থাকিবলগীয়া হৈছিল কুলদীপ।
অৱশ্যে দললৈ প্ৰত্যাৱৰ্তনৰ পিছতে কুলদীপ থমকিব লগীয়া হোৱা নাই। ধাৰাবাহিকতা অক্ষুন্ন ৰাখি তাৰকা স্পিনাৰগৰাকীয়ে আগবঢ়াইছে অনবদ্য প্ৰদৰ্শন। শেহতীয়া এছিয়া কাপতো ৯ টাকৈ উইকেট দখলেৰে কুলদীপে প্ৰমাণ কৰিছে নিজৰ যোগ্যতা। প্ৰদৰ্শনৰ দ্বাৰাই যেন ঘোষণা কৰিছে ‘সাজু বিশ্বকাপলৈ’!
উল্লেখ্য যে, অষ্ট্ৰেলিয়াৰ বিৰুদ্ধে মেচেৰে ভাৰতে আৰম্ভ কৰিব বিশ্বকাপ অভিযান। স্পীন সহায়ক ভাৰতীয় পিটছত কুলদীপৰ প্ৰদৰ্শন স্বাভাৱিকতেই ভাৰতীয় দলৰ এক প্ৰধান শক্তি হ’ব।
