দিল্লীৰ সুৰা কেলেংকাৰীৰ গোচৰত কেন্দ্ৰীয় তদন্ত সংস্থা এনফৰ্চমেণ্ট ডাইৰেক্টৰেটৰ চমন লাভ কৰিছে দিল্লীৰ মুখ্যমন্ত্ৰী তথা আম আদমি পাৰ্টিৰ মুৰব্বী অৰবিন্দ কেজৰিৱালে। ২ নৱেম্বৰত কেজৰিৱালক তদন্ত সংস্থাটোৰ দিল্লী কাৰ্যালয়ত উপস্থিত হ’বলৈ নিৰ্দেশ দিয়া হৈছে।
কেজৰিৱাললৈ ইডিৰ এই চমনৰ পিছতে ব্যাপক প্ৰতিক্ৰিয়াৰ সৃষ্টি হৈছে। শাসকীয় বিজেপি চৰকাৰৰ বিৰুদ্ধে সৰৱ হৈ পৰিছে আম আদমি পাৰ্টি। জেৰাৰ বাবে ইডিৰ কাৰ্যালয়ত উপস্থিত হোৱাৰ পিছতে কেজৰিৱালক গ্ৰেপ্তাৰৰ পৰিকল্পনা কৰা হৈছে বুলিও দাবী কৰিছে আপে।
আপ নেত্ৰী আতিশীয়ে কেজৰিৱালৰ সম্ভাৱ্য গ্ৰেপ্তাৰৰ আশংকা প্ৰকাশ কৰি কেৱল মাত্ৰ প্ৰধানমন্ত্ৰী মোদীয়ে কেজৰিৱাললৈ ভয় কৰাৰ বাবেই এই ষড়যন্ত্ৰ কৰা বুলি দাবী কৰিছে। আতিশীৰ মতে, আপক নিৰ্বাচনত পৰাস্ত কৰিব নোৱাৰে বুলি জানিয়েই দলটোক শেষ কৰিবলৈ চক্ৰান্ত কৰিছে।
এই চক্ৰান্ত অনুসৰিয়েই আম আদমী পাৰ্টিৰ আগশাৰীৰ নেতাসকলক গ্ৰেপ্তাৰ কৰি কাৰাৰুদ্ধ কৰাৰ চেষ্টা কৰা হৈছে বুলি দাবী কৰে আতিশীয়ে। ইফালে আপৰ আন এগৰাকী নেতা সৌৰভ ভৰদ্বাজেও কেজৰিৱাললৈ চমন জাৰি কেৱল আপক ৰাজনৈতিক শাস্তি দিয়াৰ কৌশল আখ্যা দিয়ে।
যদি কেজৰিৱালক গ্ৰেপ্তাৰ কৰা হয়, ইয়াৰ পিছত আপৰ ‘প্লেন বি’ কি হ’ব বুলি সাংবাদিকে কৰা এক প্ৰশ্নৰ উত্তৰত ভৰদ্বাজে এই বিষয়ে তেওঁ অজ্ঞ নহয় বুলি মন্তব্য কৰে আৰু আৰু এই বিষয়ে যে কোনো আলোচনা হৈছে, সেয়া নাভাবে বুলি উল্লেখ কৰে।
সৌৰভ ভৰদ্বাজে লগতে কেজৰিৱালকে আম আদমী পাৰ্টিৰ নেতা বুলি অভিহিত কৰে আৰু দলে তেওঁৰ অধীনতে কাম কৰিব বুলি স্পষ্ট কৰি দিয়ে। দলটোৰ কোনো নেতা বা কৰ্মী কাৰাগাৰলৈ যাবলৈ ভয় নকৰে বুলিও মন্তব্য কৰে ভৰদ্বাজে।
উল্লেখ্য যে, সুৰা কেলেংকাৰীৰ গোচৰত দীৰ্ঘদিনে কাৰাৰুদ্ধ হৈ আছে আপৰ নেতা মনীষ চিছ’দিয়া। সোমবাৰে উচ্চতম ন্যায়ালয়ে এই গোচৰত চিছ’দিয়াৰ জামিন আবেদন নাকচ কৰিছিল।
পূৰ্বৰ শুনানিৰ সময়ত শীৰ্ষ আদালতে চিছ’দিয়াৰ বিপক্ষে ধন লাভৰ কোনো স্পষ্ট প্ৰমাণ নাই বুলি তদন্তকাৰী সংস্থা চিবিআই আৰু এনফৰ্চমেণ্ট ডাইৰেক্টৰেটক ভৰ্ৎসনা কৰিছিল যদিও সোমবাৰে এই গোচৰত ৩৩৮ কোটি টকাৰ ধনৰ লেনদেন আংশিকভাৱে স্থাপন কৰা হৈছে বুলি উল্লেখ কৰিছিল।
