দেশত এতিয়া দিপাৱলীৰ আনন্দোল্লাস। এই আনন্দতে হাত উজান দি ছবিগৃহত ভুমুকি মাৰিছে টাইগাৰ ৩- য়ে। বলীউডৰ ভাইজান খ্যাত ছলমান খানৰ এই ছবিখনে লাভ কৰিছে অনুৰাগীৰ আশাব্যঞ্জক সঁহাৰি।
ছলমান খান বুলিলেই অনুৰাগীৰ মাজত আছে বিশেষ জনপ্ৰিয়তা। তাতে এতিয়া দেৱালীৰ আনন্দ। পিছে ভাইজান প্ৰেম আৰু দেৱালীৰ আনন্দ প্ৰকাশ কৰিবলৈ মহাৰাষ্ট্ৰৰ একাংশ অনুৰাগীয়ে কৰিলে এক বিপজ্জনক কাণ্ড।
যোৱা নিশা মহাৰাষ্ট্ৰৰ নাচিক জিলাৰ মোহন চিনেমা হলৰ ভিতৰত একাংশ অনুৰাগীয়ে ছবিখন প্ৰদৰ্শনৰ সময়তে আতচবাজীৰ বিস্ফোৰন ঘটাই আনন্দ প্ৰকাশ কৰে। লগে লগে হলৰ ভিতৰচৰাত এক আতংকময় পৰিস্থিতিৰ সৃষ্টি হয়।
এই সমগ্ৰ দৃশ্য মুহূৰ্ততে ভাইৰেল হৈ পৰে সামাজিক মাধ্যমত। ভিডিঅ’টো ব্যাপক ৰূপত ভাইৰেল হোৱাৰ পিছত এই সন্দৰ্ভত প্ৰতিক্ৰিয়া প্ৰকাশ কৰিছে ছবিখনৰ মূল নায়ক তথা প্ৰযোজক ছলমান খানে।
এক টুইট যোগে খানে এই কাৰ্যক বিপদজনক আখ্যা দিয়ে। লগতে নিজক তথা আনকো বিপদত নেপেলোৱাকৈ ছবিখন উপভোগ কৰিবলৈও আহ্বান জনায় ভাইজান ছলমান খানে।
ইফালে এই ঘটনা সন্দৰ্ভত ইতিমধ্যে চিনেমাগৃহটোৰ মালিকে এজাহাৰ দাখিল কৰিছে। ঘটনা সন্দৰ্ভত তদন্ত অব্যাহত আছে বুলি সদৰী কৰিছে স্থানীয় আৰক্ষীৰ এগৰাকী শীৰ্ষ বিষয়াই।
