অন্তিম পৰ্যায়ত বিশ্বকাপ ব্যৰ্থতাৰ পিছতে ২০২৪ত হ’বলগীয়া টি-২০ বিশ্বকাপৰ বাবে দল গঠনৰ কুচকাৱাজ ইতিমধ্যে আৰম্ভ হৈছে ভাৰতীয় ক্ৰিকেটত। তাৰ মাজতে অধিক চৰ্চা লাভ কৰিছে আন এটি বিষয়ে।
ভাৰতৰ দুই অভিজ্ঞ তাৰকা ৰোহিত শৰ্মা আৰু বিৰাট কোহলীৰ টি-২০ ফৰ্মেটৰ ভৱিষ্যতক লৈ কিছুদিন ধৰি ব্যাপক চৰ্চা চলি আছে। দুই তাৰকাই টি-২০ ফৰ্মেটত পুনৰাই দলক প্ৰতিনিধিত্ব কৰিব নে, সেয়া হৈ পৰিছে আলোচনাৰ বিষয়।
বিগত বৰ্ষত টি-২০ বিশ্বকাপৰ ছেমি ফাইনেলত ইংলেণ্ডৰ বিপক্ষে ১০ উইকেটত পৰাস্ত হোৱাৰ পিছত ভাৰতৰ টি-২০ লাইনআপত পুনৰ দেখা পোৱা নাই ৰোহিত আৰু কোহলীক।
ইয়াৰ পিছতে প্ৰধানকৈ যুৱ প্ৰতিভাৰে গঠিত দলে প্ৰতিনিধিত্ব কৰিছে টি-২০ ফৰ্মেটত। দ্বিপাক্ষিক শৃংখলাসমূহত যুৱ খেলুৱৈসকলক সুযোগ দি আগন্তুক সময়ৰ বাবে পৰীক্ষা-নিৰীক্ষা চলোৱা হৈছে ভাৰতীয় ক্ৰিকেটত।
কিন্তু ৰোহিত-কোহলীৰ অভিজ্ঞতা আৰু ধাৰাবাহিকতাই আগন্তুক টি-২০ বিশ্বকাপত তাৰকা দুৰগৰাকীৰ অন্তৰ্ভুক্তি সন্দৰ্ভত স্বাভাৱিকতেই আলোচনাৰ সূত্ৰপাত কৰিছে। বহুকেইজন প্ৰাক্তন খেলুৱৈ তথা বিশেষজ্ঞই এই সন্দৰ্ভত মত প্ৰকাশ কৰিছে।
পাকিস্তানৰ প্ৰাক্তন তাৰকা তথা কিংবদন্তি পেচাৰ ৱাছিম আক্ৰামে আগবঢ়াইছে মত। আক্ৰামে ৰোহিত-কোহলীক আগন্তুক টি-২০ বিশ্বকাপৰ বাবে দলত অন্তৰ্ভুক্ত কৰাটো ভাৰতৰ বাবে গুৰুত্বপূৰ্ণ বুলি মত পোষণ কৰিছে।
আক্ৰামৰ মতে, ৰোহিত শৰ্মা আৰু বিৰাট কোহলী যে টি-২০ বিশ্বকাপত ভাৰতৰ মূল খেলুৱৈ হ’ব, তাত কোনো সন্দেহ নাই। টি-২০ ক্ৰিকেটত অলপ অভিজ্ঞতাৰ প্ৰয়োজন আৰু কেৱল যুৱ খেলুৱৈৰ ওপৰত নিৰ্ভৰ কৰিব নোৱাৰি বুলি উল্লেখ কৰে আক্ৰামে।
উল্লেখ্য যে, ভাৰতীয় দলৰ নিয়মীয়া অধিনায়ক ৰোহিত শৰ্মাৰ অনুপস্থিতিত বিগত সময়ছোৱাত হাৰ্দিক পাণ্ডিয়াই টি-২০ দলৰ নেতৃত্ব দি আহিছে। এই সময়ছোৱাত বহুকেইজন যুৱ তাৰকাই নিজকে যোগ্য প্ৰমাণিত কৰিছে।
আক্ৰামৰ দৰেই ভাৰতৰ প্ৰাক্তন পেচাৰ তথা বৰ্তমানৰ গুজৰাট টাইটানছৰ মুখ্য প্ৰশিক্ষক আশীষ নেহৰায়ো ৰোহিত আৰু কোহলীৰ দলত থাকিব লাগে বুলি মন্তব্য কৰে। নেহৰাৰ মতে, কেৱল বয়সেই তেওঁলোকৰ টি-২০ ভৱিষ্যত নিৰ্ণয়ৰ একমাত্ৰ মাপকাঠী হ’ব নালাগে।
