এক চাঞ্চল্যকৰ কাণ্ডৰ বাবে সংবাদ শিৰোনাম হৈ পৰিছে এখন বিয়া। বিবাহথলীতে নিজৰ মাতৃ, ভগ্নী আৰু হ’বলগীয়া পত্নীক গুলীয়াই হত্যা কৰি তাৰ পিছতে নিজেও আত্মহত্যা কৰিছে দৰাই। এই চাঞ্চল্যকৰ ঘটনা সংঘটিত হৈছে থাইলেণ্ডত।
উত্তৰ-পূব থাইলেণ্ডত অনুষ্ঠিত হৈছিল এই বিবাহ অনুষ্ঠান। চাতুৰং চুকছুক (২৯) নামৰ যুৱকজনৰ সৈতে বিয়াৰ বাবে সাজু হৈছিল কাঞ্চনা পাচুনথুৱেক (৪৪) নামৰ যুৱতীগৰাকী। কিন্তু হঠাতে দুয়োৰে মাজত কাজিয়াৰ সূত্ৰপাত হয় আৰু সেই স্থান এৰি গুচি যায় দৰা চাতুৰং।
কিন্তু কিছু সময় পিছতে হাতত এটা বন্দুক লৈ উভতি আহে যুৱকজন।তাৰ পিছতে প্ৰথমে ৬২ বছৰীয়া মাতৃ আৰু নিজৰ জ্যেষ্ঠ ভগ্নীক গুলীয়াই হত্যা কৰাৰ পিছত হ’বলগীয়া পত্নীক গুলীয়াই হত্যা কৰে।
তিনিওকে হত্যাৰ পিছত নিৰ্বিচাৰকৈ আন দুটা গুলীও এৰে চাতুৰঙে। এই গুলীচালনাত বিবাহলৈ অহা দুগৰাকী অতিথিক আহত হয়। ইয়াৰে এজনৰ চিকিৎসালয়লৈ লৈ যোৱাৰ পথতে মৃত্যু হয়। এনে চৰম কাণ্ড সংঘটিত কৰাৰ পিছত গুলীয়াই আত্মহত্যা কৰে চাতুৰঙে।
ঘটনা সন্দৰ্ভত আৰক্ষীয়ে সদৰী কৰা মতে, সেই সময়ত যথেষ্ট মদ্যপান কৰি আছিল চাতুৰঙে। কি কি কাৰণত তেওঁ এনে চৰম পন্থা ল’লে, সেয়া এতিয়াও স্পষ্ট নহয় বুলি উল্লেখ কৰে আৰক্ষীয়ে। বিগত বৰ্ষত তেওঁ বৈধভাৱে বন্দুক ক্ৰয় কৰিছিল বুলি আৰক্ষীয়ে লগতে প্ৰকাশ কৰে।
ইফালে ঘটনাস্থলীত থকা অতিথিসকলে স্থানীয় সংবাদ মাধ্যমক অৱগত কৰা মতে, বিবাহ অনুষ্ঠানৰ পাৰ্টিৰ সময়ত চাতুৰং চুকছুকে তেওঁ আৰু কাঞ্চনা পচুনথুৱেকৰ বয়সৰ ব্যৱধানক লৈ নিৰাপত্তাহীনতা অনুভৱ কৰিছিল বাবে দুয়োৰে মাজত কাজিয়াৰ সৃষ্টি হৈছিল।
স্থানীয় সংবাদ মাধ্যমত প্ৰকাশিত বাতৰি অনুসৰি, বিগত তিনি বছৰ ধৰি দম্পতীহাল লিভ ইনত আছিল। লক্ষনীয়ভাৱে, চাতুৰঙে যোৱা বছৰ ইণ্ডোনেছিয়াত অনুষ্ঠিত হোৱা এছিয়ান পেৰা গেমছত সাঁতোৰত ৰূপৰ পদক লাভ কৰিছিল।
অহা ডিচেম্বৰ মাহত থাইলেণ্ডত অনুষ্ঠিত হ’বলগীয়া ৱৰ্ল্ড এবিলিটি স্প’ৰ্ট গেমছত অংশগ্ৰহণ কৰিবলগা খেলুৱৈৰ তালিকাতো চাতুৰং চুকছুকে স্থান লাভ কৰিব বুলি ধাৰণা কৰা হৈছিল। অৰ্ধসামৰিক বাহিনীত কৰ্তব্যৰত অৱস্থাত তেওঁ সোঁ ভৰিখন হেৰুৱাইছিল।
