অহা সোমবাৰে লোকসভাত মহুৱা মৈত্ৰৰ বিৰুদ্ধে প্ৰতিবেদন দাখিল কৰিবলৈ ওলাইছে এথিক্স কমিটিয়ে। ইতিমধ্যে লোকসভাৰ এথিক্স কমিটিয়ে ‘হিৰানন্দানী গ্ৰুপৰ পৰা ধন লৈ আদানী গ্ৰুপৰ বিৰুদ্ধে প্ৰশ্ন’ৰ গোচৰত মহুৱাক সাংসদ হিচাপে অযোগ্য ঘোষণা কৰাৰ পৰামৰ্শ আগবঢ়াইছে। এই প্ৰতিবেদন এইবাৰ সংসদৰ নিম্ন সদনত দাখিল কৰিবলৈ গৈ আছে। কিন্তু সেই প্রতিবেদন দাখিল কৰাৰ পিছতে মহুৱাৰ সংসদ পদ খাৰিজ হৈ নাযায়৷
সংসদৰ নিম্ন সদনে লোকসভাত এথিক্স কমিটিৰ পৰামৰ্শৰ সপক্ষে ভোটদান কৰিলেহে মাহুৱাৰ সাংসদ পদ খাৰিজ হ’ব। মহুৱাই ২০১৯ চনৰ লোকসভা নিৰ্বাচনত পশ্চিমবংগৰ কৃষ্ণনগৰ সমষ্টিৰ পৰা তৃণমূল কংগ্ৰেছৰ টিকটত জয়লাভ কৰিছিল। যদি লোকসভাই এই পৰামৰ্শৰ সপক্ষে ভোট দিয়ে তেন্তে পাঁচ বছৰীয়া কাৰ্যকাল সম্পূৰ্ণ হোৱাৰ পূৰ্বেই সাংসদ পদ হেৰুৱাব মহুৱাই।
লগতে পঢ়কঃ মূৰ দোৱালে বিশ্বজয়ী অষ্ট্ৰেলিয়াই! বেটে-বলে অলৰাউণ্ড প্ৰদৰ্শনেৰে টী-২০ শৃংখলা জয় ভাৰতৰ
মহুৱাৰ বিৰুদ্ধে প্ৰতিবেদন দাখিল হোৱাৰ দিনৰে পৰা আৰম্ভ হ’ব সংসদৰ শীতকালীন অধিৱেশন। এই অধিৱেশন ২২ ডিচেম্বৰলৈকে চলিব। লোকসভা সচিবালয়ৰ তথ্য অনুসৰি শীতকালীন অধিৱেশনৰ প্ৰথম দিনাই এথিক্স কমিটিৰ অধ্যক্ষ বিনোদ কুমাৰ সোনকাৰে প্ৰতিবেদন দাখিল কৰিব।
‘টকা লৈ প্ৰশ্ন’ গোচৰত মহুৱাৰ সাংসদ পদ নাকচ কৰাৰ সপক্ষে এথিক্স কমিটিৰ ৬ জন সদস্যই ভোটদান কৰে। প্ৰনীত কৌৰো এই তালিকাত আছে। ইতিমধ্যে কংগ্ৰেছে প্ৰনীতক দলৰ পৰা মুক্ত কৰি দিছে। বাকী চাৰিজন বিৰোধী সাংসদে ভোট দিয়ে মহুৱাৰ পক্ষত। তেওঁলোকে মহুৱাৰ সাংসদ পদ খাৰিজ কৰাৰ বিৰুদ্ধে ভোটদান কৰে। অৰ্থাৎ মহুৱাৰ সাংসদ পদ খাৰিজৰ পৰামৰ্শ ৬-৪ ব্যৱধানত গ্ৰহণ কৰা হয়।
