ইলোৰা বিজ্ঞান মঞ্চ, দৰং জিলা সমিতিয়ে পণ্ডিত হেমচন্দ্ৰ বৰুৱাৰ জন্মদিন উদযাপন উপলক্ষে “অন্ধবিশ্বাস আৰু কুসংস্কাৰবিৰোধী দিৱস” হিচাপে দুদিনীয়া বিস্তৃত কাৰ্যসূচী গ্ৰহণ কৰে। প্ৰথম দিনৰ কাৰ্যসূচী হিচাপে বৃহস্পতিবাৰে বিজ্ঞান-আৰ্হি প্ৰতিযোগিতা আৰু প্ৰদৰ্শনী অনুষ্ঠিত হয়।
জিলাৰ বহুকেইখন বিদ্যালয়ৰ যোগদানেৰে এই প্ৰতিযোগিতা সঞ্চালনা কৰে বিচাৰকদ্বয় ক্ৰমে মাননীয় বিনয় কুমাৰ শৰ্মা আৰু ৰঞ্জন কুমাৰ শৰ্মাই। উক্ত প্ৰতিযোগিতাত তিনিটা দলক বিজয়ী হিচাপে বাচনি কৰা হয়।
দ্বিতীয় দিনৰ কাৰ্যসূচী হিচাপে শুকুৰবাৰে অনুষ্ঠিত হয় দুখন সভা। মঞ্চৰ দৰং জিলা শাখাৰ সাধাৰণ সভাত ৰাজ্যিক পৰ্যবেক্ষক মনোজ ৰয়ৰ উপস্থিতিত দুবছৰৰ কাৰ্যকালৰ অন্ত পেলাই পুৰণি কমিটিয়ে পদত্যাগ কৰে।
সভাত উপস্থিত ইলোৰা বিজ্ঞান মঞ্চৰ সদস্য সকলে অনিল চন্দ্ৰ শৰ্মা, ৰিণু বৰদলৈ আৰু ৰুমা অধিকাৰীক ক্ৰমে সভাপতি, কাৰ্যকৰী সভানেত্ৰী আৰু সম্পাদক হিচাপে দায়িত্ব অৰ্পণ কৰি নতুন কমিটি গঠন কৰে।
ইফালে মুকলি সভাত সভাপতিত্ব কৰে ড° খলিলুৰ ৰহমানে আৰু সভা উদ্বোধন কৰে ড° কুমুদ চন্দ্ৰ শৰ্মাই। আৰম্ভণি গীতৰ পাছত উদ্দেশ্য ব্যাখ্যা কৰে শাখাৰ সম্পাদক ৰুমা অধিকাৰীয়ে।
মুখ্য অতিথি হিচাবে দৰঙৰ গৌৰৱ ড° পৱন কুমাৰ চহৰীয়াই সময়োপযোগী আৰু বিষয়বস্তুক সামৰি এক সুন্দৰ আৰু শক্তিশালী বক্তব্য আগবঢ়ায়।
মৰণোত্তৰ দেহ দান কৰা ব্যক্তিক ৰাইজৰ সৈতে চিনাকী কৰাই দিয়াৰ লগতে নতুনকৈ সদস্য হিচাপে মঞ্চত অন্তৰ্ভুক্ত হয় কেইবাগৰাকীও। বিজ্ঞান আৰ্হি প্ৰতিযোগিতাৰ বঁটাসমূহ বিতৰণ কৰাৰ লগতে উপস্থিত লোকসকলে মনৰ ভাৱ ব্যক্ত কৰে।
