অসম চৰকাৰৰ জ্যেষ্ঠ মন্ত্ৰী চন্দ্ৰমোহন পাটোৱাৰীয়ে শুকুৰবাৰে দিছপুৰত অনুষ্ঠিত এক সংবাদমেলত তদানীন্তন কংগ্ৰেছ চৰকাৰে গ্ৰহণ কৰা ধৰ্মীয় বৈষম্যৰ বলি হৈ বাংলাদেশৰ পৰা পলায়ন কৰা লোকসকলক অসমত আশ্ৰয় দানৰ বাবে গগৈ কেবিনেটে গ্ৰহণ কৰা সিদ্ধান্তৰ প্ৰতিলিপি ৰাজহুৱা কৰে। তেওঁ লগতে সেই কংগ্ৰেছেই এতিয়া নাগৰিকত্ব সংশোধনী বিধেয়কৰ বিৰোধিতা কৰাত আশ্চৰ্য প্ৰকাশ কৰে।
মন্ত্ৰী পাটোৱাৰীয়ে কংগ্ৰেছক সমালোচনা কৰি কয় যে হিন্দু বাংলাদেশীক নাগৰিকত্ব প্ৰদানক লৈ কংগ্ৰেছৰ স্থিতি দুমুখীয়া নহয়, তিনিমুখীয়া হৈ পৰিছে। বৰাক উপত্যকাত সুকীয়া, ব্ৰহ্মপুত্ৰ উপত্যকাত সুকীয়া আৰু চৰকাৰ হিচাপে সুকীয়া স্থিতি লোৱা তিনিমুখীয়া কংগ্ৰেছক সমালোচনা কৰি মন্ত্ৰী পাটোৱাৰীয়ে কয় যে তৰুণ গগৈৰ শাসনকালত ৰাজ্য চৰকাৰে গ্ৰহণ কৰা কেবিনেট সিদ্ধান্তৰ কাৰ্য বিৱৰণীত স্পষ্টভাৱে উল্লেখ আছে যে তেতিয়াৰ মুখ্যমন্ত্ৰী তৰুণ গগৈয়ে তদানীত্বন প্ৰধানমন্ত্ৰী মনমোহন সিঙক ২০১২ চনৰ ২০ এপ্ৰিলত এখন স্মাৰকপত্ৰ প্ৰদান কৰিছিল।
উক্ত স্মাৰকপত্ৰত গগৈ চৰকাৰে উল্লেখ কৰিছিল যে ভাৰত বিভাজনৰ সময়ত থাকি যোৱা যিসকল লোকে ধৰ্মীয় উৎপীড়ন, আতিশয্য আৰু বৈষম্যৰ বলি হৈ সেই দেশখন এৰিব বিচাৰিছে তেনে লোকসকলক মানৱীয়তাৰ দৃষ্টিভংগীৰে চাব লাগে। বৰ্তমানৰ আইন ব্যৱস্থাৰ অধীনত তেনে ব্যক্তি এগৰাকী বিচাৰ প্ৰক্ৰিয়াৰ সন্মুখীন হোৱাৰ উপৰি বহিষ্কাৰ আৰু দেশাস্তৰিত হোৱাৰ নিয়ম আছে।
কেবিনেটৰ কাৰ্যবিৱৰণীত এই বুলিও উল্লেখ কৰা হৈছে যে মুখ্যমন্ত্ৰীৰ নিৰ্দেশৰ পাছতে কেন্দ্ৰীয় গৃহ মন্ত্ৰ্যালয়লৈ ২০১৪ চনৰ ১২ মে’ত এখন পত্ৰ প্ৰেৰণ কৰি দেশ বিভাজনৰ সময়ত বহিঃৰাষ্ট্ৰত ৰৈ যোৱা যিসকল লোকে ধৰ্মীয় কাৰণত বৈষম্যৰ বলি হৈ ভাৰতত আশ্ৰয় ল’ব বিচাৰিছে, তেনে লোকসকলক আশ্ৰয় দানৰ বাবে এক নীতি যুগুত কৰিব লাগে।
তদানীন্তন গগৈ চৰকাৰৰ কাৰ্যকালত এনেদৰে হিন্দু বাংলাদেশীক ৰাজনৈতিক আশ্ৰয় অথবা নাগৰিকত্ব প্ৰদানৰ বাবে কংগ্ৰেছ চৰকাৰে গ্ৰহণ কৰা কেবিনেট সিদ্ধান্তৰ প্ৰসংগত কংগ্ৰেছ দলক তীব্ৰ ককৰ্থনা কৰি জ্যেষ্ঠ মন্ত্ৰী চন্দ্ৰমোহন পাটোৱাৰীয়ে কয় যে কংগ্ৰেছৰ তিনিমুখীয়া নীতি এই কেবিনেট নথিখনেই স্পষ্ট কৰি তুলিছে। নাগৰিকত্ব সংশোধনী বিধেয়কখনক লৈ কংগ্ৰেছে ৰাজনীতি কৰিছে বুলি মন্তব্য কৰে মন্ত্ৰী চন্দ্ৰমোহন পাটোৱাৰীয়ে।
বৰ্তমান বিজেপি চৰকাৰখনে অন্ততঃ কংগ্ৰেছৰ দৰে কেবিনেট সিদ্ধান্ত লোৱা নাই বুলি মন্তব্য কৰি পাটোৱাৰীয়ে কয় যে কংগ্ৰেছে এতিয়া বিধেয়কখনক লৈ এনে এটা পৰিৱেশ গঢ়ি তুলিছে যেন দলটোৱে বিধেয়কখনৰ তীব্ৰ বিৰোধিতা কৰে।
নাগৰিকত্ব সংশোধনী বিধেয়কৰ বিৰুদ্ধে আন্দোলনৰ কাৰ্যসূচীও কংগ্ৰেছে লোৱা বুলিও পৰোক্ষভাৱে আঙুলিয়াই পাটোৱাৰীয়ে অভিযোগ তোলে যে নাগৰিকত্ব সংশোধনী বিধেয়কৰ বিৰোধিতা কৰা কংগ্ৰেছই আই এম ডি টি আইন প্ৰৱৰ্তন কৰি পৰোক্ষভাৱে অসমলৈ বাংলাদেশী নাগৰিকত্ব অহাৰ বাবে প্ৰৰোচিত কৰিছিল। আই এম ডি টি আইন প্ৰৱৰ্তনৰ সময়ত তেতিয়াৰ কংগ্ৰেছ চৰকাৰে কিয় অসমলৈ আহি অসমবাসীৰ শুনানি নল’লে বুলিও মন্ত্ৰী পাটোৱাৰীয়ে কংগ্ৰেছক উভতি ধৰে।
ইফালে, নাগৰিকত্ব সংশোধনী বিধেয়কৰ বিৰুদ্ধে আন্দোলন কৰি উত্তেজনাৰ সৃষ্টি কৰিব বিচৰা পক্ষসমূহে পুনৰ এন আৰ চিৰ কাম-কাজতো বাধা আৰোপ কৰিবলৈ ষড়যন্ত্ৰ ৰচা বুলি ৰাজ্যৰ সংসদীয় পৰিক্ৰমা মন্ত্ৰীগৰাকীয়ে অভিযোগ তোলে।
