ৰাষ্ট্ৰীয় শিক্ষা নীতি ২০২০ অনুসৰি গৱেষণা, প্ৰশিক্ষণ, শিক্ষক ,শিক্ষয়িত্ৰী আৰু ছাত্ৰ ছাত্ৰীৰ বাবে সৃষ্টিমূলক, সৃজনীমূলক, উদ্যমিতা,বৌদ্ধিক তথা ব্যৱহাৰিক বিষয় উত্তৰণৰ বিভিন্ন দিশৰ ক্ষেত্ৰত আগবঢ়াৰ উদ্দেশ্যে শুকুৰবাৰে এক বুজাবুজিৰ চুক্তি স্বাক্ষৰিত হয় দিছপুৰ মহাবিদ্যালয আৰু গিৰিজানন্দ চৌধুৰী বিশ্ববিদ্যালয়ৰ মাজত।
গিৰিজানন্দ চৌধুৰী বিশ্ববিদ্যালয়ৰ উপাচাৰ্য কক্ষত এই বুজাবুজিৰ চুক্তি স্বাক্ষৰিত হোৱা সময়ত বিশ্ববিদ্যালয়খনৰ উপাচাৰ্য অধ্যাপক কন্দৰ্প দাস, বিশ্ববিদ্যালয়ৰ পঞ্জীয়ক ড: দীপাঙ্কৰ সাহা, দিছপুৰ মহাবিদ্যালয়ৰ বাণিজ্য বিভাগৰ জেষ্ঠ অধ্যাপক ড: জ্যোতিষ গোস্বামী, দিছপুৰ মহাবিদ্যালয়ৰ আভ্যন্তৰীণ মান নিৰ্ণায়ক কোষৰ সম্বনয়ক ড: অজয় মিত্ৰ, বিত্ত বিভাগৰ মুৰব্বী অধ্যাপক ড: মাথুৰ বৰ্মন উপস্থিত থাকে।
দিছপুৰ মহাবিদ্যালয়ৰ অধ্যক্ষ ডঃ নৱজ্যোতি বৰাই এক প্ৰেছ বাৰ্তা যোগে উচ্চ শিক্ষা উন্নয়ন খণ্ডত এই বুজাবুজিৰ চুক্তি স্বাক্ষৰৰ দ্বাৰা মহাবিদ্যালয় আৰু বিশ্ববিদ্যালয়ৰ মাজত সু- সমন্বয় ৰক্ষাৰ লগতে শৈক্ষিক, বৌদ্ধিক, সাংস্কৃতিক,উদ্যমিতা বিকাশ ,ব্যৱহাৰিক বিষয় শিক্ষা গ্ৰহণত এক যোগাত্মক উত্তৰণ হ’বলৈ সক্ষম হ’ব বুলি উল্লেখ কৰে।
লগতে উচ্চ শিক্ষা প্ৰতিষ্ঠান তথা উদ্যোগিক প্ৰতিষ্ঠানৰ সৈতে বুজাবুজিৰ চুক্তিৰ দ্বাৰা শিক্ষক, শিক্ষয়িত্ৰী বৌদ্ধিক বিকাশ আৰু ছাত্ৰ ছাত্ৰীৰ স্বনিয়োজনৰ দ্বাৰা নিজকে আত্মনিয়োগ কৰাৰ ক্ষেত্ৰত প্ৰতিবন্ধকতা আঁতৰিব বুলিও দিছপুৰ মহাবিদ্যালয়ৰ অধ্যক্ষগৰাকীয়ে মন্তব্য কৰে।
ইফালে গিৰিজানন্দ চৌধুৰী বিশ্ববিদ্যালয়ৰ উপাচাৰ্য অধ্যাপক কন্দৰ্প দাসে কয় যেবিশ্ববিদ্যালয়, মহাবিদ্যালয় আৰু উদ্যোগিক প্ৰতিষ্ঠানৰ সৈতে বুজাবুজিৰ চুক্তিৰ বাস্তৱিক ৰূপে ৰাষ্ট্ৰীয় শিক্ষা নীতিৰ উদ্দেশ্য যথাযথ ৰূপায়ণ কৰাৰ উপৰিও গৱেষণা প্ৰশিক্ষণ তথা আন্তঃৰাষ্ট্ৰীয় পৰ্যায়ৰ প্ৰতিযোগিতাত সফলতা লাভ কৰিবলৈ সক্ষম হ’ব।
বিশ্ববিদ্যালয়ৰ পঞ্জীয়ক ড: দীপাঙ্কৰ সাহাই চৰকাৰী আৰু ব্যক্তিগত খণ্ডৰ সু-সমন্বয়ে উচ্চ শিক্ষা খণ্ডৰ আমূল পৰিবৰ্তন সাধন কৰিবলৈ সক্ষম হ’ব বুলি মন্তব্য কৰে। আনহাতে দিছপুৰ মহাবিদ্যালয়ৰ বাণিজ্য বিভাগৰ জেষ্ঠ অধ্যাপক ড: জ্যোতিষ গোস্বামীয়ে বুজাবুজিৰ চুক্তিৰ জৰিয়তে শিক্ষক শিক্ষয়িত্ৰীয়ে শৈক্ষিক, বৌদ্ধিক তথা সামাজিক প্ৰেক্ষাপটত এক বলীষ্ঠ পদক্ষেপ গ্ৰহণ কৰিবলৈ সক্ষম হ’ব বুলি আশা প্ৰকাশ কৰে।
দিছপুৰ কলেজৰ আভ্যন্তৰীণ মান নিৰ্ণায়ক কোষৰ সম্বনয়ক ড: অজয় মিত্ৰই কয় যে বুজাবুজিৰ চুক্তিৰ জৰিয়তে শৈক্ষিক উত্তৰণৰ লগতে নাকৰ বিভিন্ন দিশৰ যথাযথ ৰূপায়ণ সহায়ক হ’ব।
